खोज

सल्यान, ०१ मंसिर ।
अख्तियार दुरूपयोग अनुसन्धान आयोग सुर्खेतका प्रमुख रामकृष्ण पुडासैनीले भ्रष्टाचार नियन्त्रणको पहिलो दायीत्व सम्बन्धीत निकायकै भएको बताएका छन् । सल्यानमा आयोजित एक कार्यक्रममा बोल्दै उनले जनप्रतिनिधी, कर्मचारी, उपभोक्ता समितिमा बसेर काम गर्ने वा सार्वजनिक श्रोतसाधनको प्रयोग गरेर काम गर्ने जो कोहिले पनि भ्रष्टाचार सम्बन्धीत क्षेत्रको ऐन, नियम पूर्ण परिपालना गर्नुपर्नेमा जोड दिएका हुन् ।

आयोगको आजोजनामा विहिबार सल्यानको छत्रेश्वरी गाउँपालिकाका आयोजित भ्रष्टाचार नियन्त्रण तथा सुशासन प्रवद्र्धन सम्बन्धी पालिका स्तरीय अन्तरक्रिया कार्यक्रममा बोल्दै उनले भने, ‘अख्तियार मात्रै भ्रष्टाचार नियन्त्रण गर्ने एउटै संस्था हो भन्ने बुझ्नु गलत हो । सबैभन्दा पहिलो दायीत्व सम्बन्धीत निकाय, कार्यालय र इकाइको हो । सम्बन्धीत कुराहरू र ऐन नियमको परिपालना तथा परिणामसंग सम्बन्धीत रहेर काम गर्नुपर्छ ।’ उनले कर्णाली प्रदेशमा विशेष गरेर निर्माण तथा सामान खरिद, परामर्श सेवा खरिद, नियुक्ती एवम् पारदर्शीता नअपनाएका विषयमा बढीजसो उजुरी आउनेगरेको बताए ।
अख्तियार दुरूपयोग अनुसन्धान आयोग सुर्खेत कार्यालयले गाउँपालिकाका जनप्रतिनिधि, कर्मचारी, विद्यालय तथा वन समूह र निर्माण समितिका पदाधिकारीहरू लगाएत सरोकारवालाहरूका लागि भ्रष्टाचार नियन्त्रण र सुशासन प्रवर्द्धनको उद्देश्यसहित अन्तरक्रिया कार्यक्रमको आयोजना गरेको हो ।

कार्यक्रममा छत्रेश्वरी गाउँपालिकाका अध्यक्ष ओज बहादुर बुढाथोकीले पारदर्शी र जवाफदेही भूमिका सुशासनको महŒवपूर्ण आधारशिला भएको उल्लेख गर्दै ऐन, नियमको पालनामा आफूहरूले सक्दो र इमान्दार प्रयास गरिरहेको बताए । यद्यपी अख्तियार भन्नेवित्तिकै तर्सिनुपर्ने अवस्था समेत रहेको भन्दै उनले काम गर्दा प्रकृयागत त्रुटी हुनसक्ने तर त्यसलाई सच्याएर अघि बढ्नुपर्ने बताए । यस्तै गाउँपालिका उपाध्यक्ष बुद्ध कुमारी खत्री, प्रमुख प्रशासकीय अधिकृत गुरु प्रसाद योगी, गाउँपालिकाका प्रवक्ता फौद बहादुर बस्नेत लगाएत पत्रकार, विद्यालय, उपभोक्ता समिति, वन समूहका प्रतिनिधिहरूले विभिन्न जिज्ञासा र सुझाव प्रदान गरेका थिए । कार्यक्रममा आयोगको सुर्खेत कार्यालयका शाखा अधिकृत विष्णु प्रसाद न्यौपानेले भ्रष्टाचार र यसका कारण तथा असरहरू, भ्रष्टाचार नियन्त्रणमा अख्तियार दुरूपयोग अनुसन्धान आयोगको भूमिका, स्थानीय तहसँग सम्बन्धित भई आयोगमा पर्ने उजुरीका विषयवस्तुहरू एवं स्थानीय तहलाई आयोगका सुझावहरूका सम्बन्धमा कार्यपत्र प्रस्तुत गरेका थिए । उनले अख्तियार दुरूपयोग अनुसन्धान आयोगले उपचारात्मक, निरोधात्मक र प्रवद्र्धनात्मक गरी मूख्य रूपमा तीन किसिमका रणनीतिक उपायहरूमार्फत भ्रष्टाचार नियन्त्रणसम्बन्धी कार्य गर्दै आएको उल्लेख गरे । भ्रष्टाचार नियन्त्रण तथा सुशासन प्रवद्र्धनका लागि अख्तियारको सुर्खेत कार्यालयले चालु आर्थिक वर्षमा पालिकास्तरमा ३० वटा कार्यक्रम गर्ने लक्ष्य राखेकोमा हाल सम्म छत्रेश्वरी सहित ४ वटा पालिकामा कार्यक्रम सम्पन्न भइसकेको जनाए ।

उनले जिल्ला स्तरमा ५ वटा र प्रदेश स्तरमा एउटा कार्यक्रम गर्ने लक्ष्य रहेको पनि जानकारी दिए । अख्तियारले भ्रष्टाचारमा संलग्न जोकोहीलाई कारबाहीको दायरामा ल्याउने जनाएको छ । अभिमुखिकरण कार्यक्रममा स्रोतको पारदर्शी र न्यायोचित उपयोग, जनताको सहभागिता, र विभिन्न क्षेत्रमा देखापर्न सक्ने अनियमितताहरूको बारेमा पनि छलफल गरिएको थियो । वडा अध्यक्ष तथा कार्यपालिका सदस्यहरू, कर्मचारीहरू, विद्यालय, वन समूह र निर्माण समितिका पदाधिकारीहरू सहभागि कार्यक्रममा सहभागिहरूलाई स्रोतसाधनको सदुपयोग गर्दै सुशासनलाई कायम राख्न र आगामी दिनमा भ्रष्टाचार नियन्त्रणका लागि सचेत रहन आग्रह गरिएको थियो ।