खोज

तिलोत्तमा, १ मंसिर ।

एफइसी धनकोष बचत तथा क्रृण सहकारी संस्थाको कुल पुँजी ७८ करोड ४६ लाख रुपियाँ पुगेको छ ।

रुपन्देहीको तिलोत्तमा नगरपालिका–९ स्थित मंगलापुरमा मुख्य कार्यालय रहेको संस्थाको शेयर पुँजी ८ करोड ६७ लाख ७० हजार रहेको छ भने बचत ६१ करोड २६ लाख ९७ हजार रहेको छ । त्यस्तै कर्जा लगानी ६५ करोड ९८ लाख रहेको छ भने जगेडा कोष ४ करोड ६३ लाख रुपियाँ रहेको छ ।

संस्थाले राहत कोषबाट मृत्यु हुने शेयर सदस्यका परिवारलाई शेयर बराबरको रकम र एक लाख रुपियाँ राहत प्रदान गर्ने गरेको छ ।

संस्थामा कुल शेयर सदस्य संख्या २३ सय भन्दा बढी रहेको सहकारीका अध्यक्ष तारानाथ कंडेलले जानकारी दिए ।

शनिबार आयोजित संस्थाको २९ औं वार्षिक साधारणसभामा बोल्ने सहकारी क्षेत्रका व्यक्तिहरुले एफइसी सहकारी सुशासन र पारदर्शीतामा अब्बल बन्दै गएको बताए । सञ्चालकहरुमा देखिएको संस्थागत सुशानको भावनाले पछिल्लो समय धेरै सहकारीहरु संकटमा पर्दा समेत एफइसी बिचलित नभइ आर्थिक रुपले सुदृढ संस्थाको रुपमा विकसित हुँदै आएको उनीहरुको भनाइ छ ।

कार्यक्रममा बोल्दै रुपन्देही बचत तथा क्रृण सहकारी संघका अध्यक्ष वसन्त ढकालले सहकारी नेतृत्वले शेयर सदस्य नचिन्ने र शेयर सदस्यले नेतृत्व नचिन्ने सहकारीहरु समस्यामा परेको उदाहरण दिंदै कठिन परिस्थितिमा एफईसी सहकारीले आफूलाई अव्वल संस्थाको रुपमा स्थापना गर्न सफल भएको बताए ।

सञ्चालक समितिको कुशल नेतृत्व र कुशल व्यवस्थापकीय टिम भएमा कुनै पनि सहकारी संस्थाहरु संकटमा नपर्ने भन्दै उनले एफईसी धनकोष त्यसको उदाहरण भएको बताए ।

सहकारीका वरिष्ठ सल्लाहकार हरिप्रसाद कंडेलले संस्थागत पारदर्शीताले नै सहकारीको भविष्य निर्धारण गर्ने भएकाले यसतर्फ लाग्न सम्पूर्ण शेयर सदस्यहरुलाई आग्रह गरे ।

वार्षिक प्रतिवेदन प्रस्तुत गर्दै सहकारीका अध्यक्ष तारानाथ कंडेलले सहकारीका मूल्य, मान्यता अनुसार पुँजी वृद्धि, वित्तीय सुशासन, प्रविधि प्रयोग, कारोबारको भोलुम वृद्धि, सेवा केन्द्र विस्तार, लगानीका हिसाबले प्रभावकारी देखिएको उल्लेख गर्दै सहकारीले प्रभावकारी वित्तीय सेवा दिएको दावी गरे ।

साधारणसभामा संस्थाका उपाध्यक्ष झविन्द्रप्रसाद कंडेलले कार्यक्षेत्र, सदस्य, पुँजी, कारोबारमा सहकारीले दायरा फराकिलो बनाएको बताए ।

गुलमी सेवा केन्द्रका संयोजक कमलप्रसाद श्रेष्ठले सहकारीप्रति आकर्षण बढ्दै गएको र नयाँ सदस्यहरु थपिने क्रम जारी रहेको बताए ।

संस्थाको वित्तीय अवस्थाबारे जानकारी दिंदै वरिष्ठ व्यवस्थापक मुकुन्दहरि ज्ञवालीले सञ्चालक समिति, विभिन्न उपसमिति, व्यवस्थापकीय टिम र कर्मचारी गरी ९९ जनाको पाइलटले सहकारीलाई कुशलतापुर्वक अगाडि बढाएको बताउँदै सहकारीको वित्तीय अवस्था सुद्धृढ र सवल रहेको बताए ।

सहकारीले सुशासनलाई मुख्य प्राथमिकता दिएकै कारण सदस्यहरुको भविष्य सुरक्षित रहेको भन्दै उनले डिजिटल कारोबारलाई सहकारीले प्राथमिकता दिएको र प्रविधि प्रयोग गरेर वित्तीय पारदर्शीतामा अब्बल बन्न सफल भएको बताए ।

कार्यक्रममा राममणि क्याम्पसका अध्यक्ष ध्रुवकुमार धिताल, कुन्जपार्कका अध्यक्ष लोक पुन, सम्मानितहरुको तर्फबाट भावना बन्जाडे, शेयर सदस्य सुशील घिमिरेलगायतले मन्तव्य व्यक्त गरेका थिए ।

त्यस अवसरमा संस्थाका जेष्ठ सदस्य, असल कारोबारीहरु, शैक्षिक तथा खेलकुदमा उत्कृष्टता हासिल गर्नेहरुलाई सम्मान गरिएको थियो । साधारण सभाका अवसरमा सहभागीहरुलाई मेडिटेक हस्पिटल प्रालि बुटवलबाट निःशुल्क स्वास्थ्य परीक्षण समेत गरिएको थियो ।