खोज

नेपाली यु– १९ महिला क्रिकेट टिमले इतिहास रचेको छ । आयोजक यूएईलाई स्तब्ध पार्दै नेपाल पहिलोपटक यु– १९ महिला टी–२० विश्वकपमा छनोट भएको छ । नेपालको सिनियर पुरुष टोलीले दुईपटक टी–२० विश्वकप र यु–१९ टिमले ८ पटक विश्वकप खेलिसकेपनि महिला क्रिकेटमा नेपालको कुनै टोली विश्वकपमा पुग्न सकेको थिएन् । नेपाली क्रिकेटका लागि यो ऐतिहासिक खुसीको कुरा हो । यो जितले सिनियर महिला टिमलाई पनि अझै उत्साहित हुने र आउने नयाँ पुस्तालाई प्रेरणा दिने विश्वास गरिएको छ । अव नेपाली महिला टिमलाई सन् २०२७ मा बंगलादेशसँग मिलेर आफैँ यु १९ महिला टी २० विश्वकप आयोजना गर्दा अझ उत्साह बढ्ने अपेक्षा गर्नु अस्वाभाविक हुँदैन । सिनियर महिला टोली प्रारम्भिक छनोटबाट अघि बढ्न नसकेपनि यु–१९ महिला टोली यसपटक विश्वकपमा छनोट हुन सफल भएको छ । नेपालको खेलकुद क्षेत्रका लागि यो सफलताले सवै नेपालीलाई खुसी बनाएको छ । नेपाली महिला खेलाडीले अवसर पाए सफलता चुम्न सक्छन भन्ने यु– १९ महिला खेलाडीले प्रमाणित गरेका छन् । नेपालको यु –१९ महिला टोलीले यु– १९ विश्वकप छनोट खेलेको दोस्रोपटक हो र दोस्रो प्रयासमै नेपाल विश्वकप पुग्न सफल भएको छ । यसमानेमा नेपाली महिला टिम बधाईको पात्र बनेको छ । नेपालबाट कुनैपनि फम्र्याटको महिला विश्वकप खेल्ने यो पहिलो टोली बन्ने भएको छ । नेपाली महिला क्रिकेट खेलाडीले प्राप्त गरेको सफलताले नेपालको अन्तर्राष्ट्रिय क्षेत्रमा नाम चुलिएको छ । यसबाट नेपाली महिला खेलाडीहरूलाई खेल क्षेत्रमा लाग्ने उत्साह सिर्जना भएको छ । नेपालले बंगलादेशसँग मिलेर सन् २०२७ मा यू–१९ महिला टी २० विश्वकप आयोजना गर्दैछ । त्यसका लागि पनि यो जित ठूलो आधार हुने निश्चित छ । घरेलु मैदानमा हुने उक्त विश्वकपका लागि पनि अहिलेदेखि नै खेलाडी तयार पार्न यस पटकको विश्वकपले ठूलो सहयोग पुग्नेछ र प्रेरणा मिल्ने खेलाडीहरूको विश्वास छ ।
त्यसो त नेपाल सरकारले खेल क्षेत्रको विकासमा अहिलेपनि यथोचित ध्यान दिएको छैन । खेलाडीलाई कुनैपनि प्रकारको प्रोत्साहन छैन् । खेल पूर्वाधारको अभाव छ । अन्तर्राष्ट्रिय स्तरका खेल खेलाउन उही सय बर्ष पुरानो दशरथ रंगशाला बाहेक अरू मैदान छैनन् । संघीय, प्रदेश र स्थानीय पालिकाहरूले खेल क्षेत्रको विकासका लागि आवश्यक बजेट विनियोजन नगर्ने र भएका खेल पूर्वाधारको संरक्षणमासमेतमा ध्यान नदिने अहिलेको मात्र होइन, विगतदेखिकै निरन्तरता हो । मुलुक संघीय संरचनामा गएपछि मुलुकको खेल क्षेत्रले फड्को मार्ने आशा र अपेक्षा थियो । खेल प्रेमीमात्र होइन खेलाडीहरूले समेत तीन तहका सरकारले खेलको विकासमा आ–आफ्नो तर्फबाट योगदान पु¥याउने विश्वास गरिएको थियो तर खेलको विकासमा बेवास्ता गरिदै आएको छ । नेपालमा अवसर पाउने हो भने खेलाडीले राष्ट्रिय अन्तर्राष्ट्रिय स्तरमा राम्रो नतिजा देखाउन सक्छन् । खेलकै माध्यमबाट देशको नाम विश्वमै राख्न सक्छन तर बिडम्बना खेलाडीलाई कुनैपनि प्रकारको प्रोत्साहन छैन् । नयाँ खेलाडी उत्पादन र प्रोत्साहन गर्नेतर्फ कुनैपनि सरकारले योजना अघि बढाएका छैनन् । भएका खेल पूर्वाधारको बेवास्ता गरिएको छ । खेल प्रतियोगिता सञ्चालनमा समेत राज्यका तर्फबाट सहयोग नहुँदा यसअघि सञ्चालन भैरहेका प्रतियोगिता समेत रोकिएका छन् । खेलाडी विदेश पलायन हुन बाध्य भएका छन् । खेलाडीलाई नेपालमै रोजगारीको अवसर सिर्जना हुन सकेको छैन । खेलाडी राष्ट्रका गहना हुन । तर, ती गहना जोगाउने र संरक्षण गर्ने दायित्वबाट राज्य चुकेको छ । दुई साताअघि मात्र नेपाल साफ महिला फुटवलमा उपबिजेता बनेको छ । त्यो पनि महत्वपूर्ण उपलब्धि हो । पछिल्लोसमय नेपालको क्रिकेटले अन्तर्राष्ट्रिय स्तरमा पहिचान बनाउन सफल हुँदै गएको छ । खेलाडीले प्राप्त गरेको सफलताका पछि सरकारको प्रोत्साहन अव आवश्यक छ । यसतर्फ सरकारको ध्यान जाओस् ।