खोज

रोल्पा, २९ कार्तिक ।
रोल्पाको रुन्टीगढी गाउँपालिका वडा नं. ४ मा रिक्त वडाध्यक्ष पदमा आगामी मंसिर १६ गते हुने स्थानीय तह उपनिर्वाचनका लागि रोल्पाका प्रमुख तीन दल नेपाली काँग्रेस, नेकपा एमाले र नेकपा माओवादी केन्द्रले उम्मेदवारी टुङ्गो लगाएका छन् । अन्य दलले समेत आफ्नो उम्मेदवार टुंग्याउने अन्तिम तयारीमा रहेको बताईन्छ ।

नेपाली काँग्रेसबाट वडाध्यक्षमा निर्वाचित टंकबहादुर पुनको निधन भएसँगै रिक्त रहेको वडाध्यक्ष पदमा हुने उपनिर्वाचनमा नेपाली काँग्रेसले भुपमणी पुनलाई उम्मेदवार बनाएको छ । यसैगरी नेकपा एमालेले बेगम पुनलाई उम्मेदवार बनाएको छ । पुन २०७९को स्थानीय तह निर्वाचनमा सोही वडाको वडाध्यक्ष पदमा ८ मतले पराजित भएका थिए । नेकपा एमालेले २०७९ सालकै उम्मेदवारलाई यसपटक दोहो¥याउने निर्णय गरेको हो ।

उम्मेदवारको टुङ्गो लगाएको काँग्रेसले निर्वाचन केन्द्रित गतिविधिहरू सञ्चालन गरिरहेको नेपाली काँग्रेस रोल्पाले जनाएको छ । उपनिर्वाचनमा नेकपा एमालेले पुनः उनलाई नै उम्मेदवार बनाउने निर्णय गरेको एमाले रोल्पाका अध्यक्ष अमृत बुढामगरले जानकारी दिए । उम्मेरदवार टुङ्गाएसँगै नेकपा एमालले घरदैलो अभियान संचालन गर्न लागेको छ । उसले कार्तिक २८ गते पार्टीको केन्द्रीय सचिव तथा लुम्बिनी प्रदेश ईन्चार्ज पद्मा अर्यालको उपस्थितिमा कार्यकर्ता भेला समेत आयोजना गरिसकेको छ । भेलामा जिल्ला कार्यक्षेत्र भएका केन्द्रीय सदस्यहरू, जिल्ला भित्रका केन्द्रीय सल्लाहकार परिषद सदस्यहरू, रोल्पा जिल्लाबाट लुम्बिनी प्रदेश कमिटीमा प्रतिनिधित्व गर्ने सदस्यहरू, जिल्ला पदाधिकारी तथा सचिवालय सदस्यहरू, सम्पूर्ण पालिका अध्यक्षहरू, रुन्टीगढी गाउँपालिका भित्रका जिल्ला कमिटी सदस्यहरू, रुन्टीगढी गाउँपालिका कमिटीका सदस्यहरू र रुन्टीगढी गाउँपालिका वडा नं. ४ का अगुवा कार्यकर्ताहरूलाई सो भेलामा उपस्थिति हुने बताइएको छ ।

सो वडामा नेकपा माओवादी केन्द्रले नरेशजङ सिंहलाई उम्मेदवार बनाउने निर्णय गरेको छ । सो पार्टीको पालिका स्तरीय कार्यकर्ता रहेका सिहंलाई उम्मेदवार बनाएको नेकपा माओवादी केन्द्र पनि चुनावी अभियानमा होमिएको जिल्ला संयोजक रेशम पुनको भनाइ छ । नेकपा माओवादी केन्द्रले केन्द्र तथा जिल्ला स्तरीय नेताहरूको उपस्थितिमा कार्यक्रम गरिसकेको छ । यस अघिको निर्वाचनमा सो पार्टीवाट शिवलाल रोका उम्मेदवार थिए ।

२०७९ सालमा सम्पन्न स्थानीय तह निर्वाचनमा सो वडामा नेपाली काँग्रेसका टंकवहादुर पुनले ४८८ मत प्राप्त गरी विजयी भएका थिए । पुनको निकटतम प्रतिस्पर्धी नेकपा एमालेका ४८० मत प्राप्त गरेका थिए ।
यसैगरी तेश्रो स्थान हासिल गर्ने नेकपा माओवादी केन्द्रका उम्मेदवार शिवलाल रोकाले २०३ मत प्राप्त गरेका थिए । आसन्न उप निर्वाचनमा दुई सत्ताधारी दल नेपाली काँग्रेस र नेकपा एमाले वीच नै मुख्य प्रतिस्पर्धा हुने वताईन्छ । ९ वडा रहेको रोल्पाको रुन्टीगढी गाउँपालिकाको अध्यक्ष उपाध्यक्ष सहित ३ वडा नेपाली काँग्रेसले जितेको छ । यसैगरी नेकपा एमाले र नेकपा माओवादी केन्द्रले समेत ३/३ वटा वडा जितेका छन ।

मिनि ईलेक्सको रूपमा हुन लागेको उपनिर्वाचनले दलहरूको पछिल्लो जनमत परीक्षण गर्ने वताईन्छ । देशभरका ४० स्थानीय तहको विभिन्न पदमा रिक्त भएको पदपूर्तीका लागि सरकारले मंसिर १६ गते उपनिर्वाचन गर्न लागको हो । रिक्त जिल्ला समन्वय समिति प्रमुख, नगर प्रमुख र उपप्रमुख, गाउँपालिका अध्यक्ष र उपाध्यक्ष तथा वडाध्यक्ष पदमा उपनिर्वाचन हुन लागेको हो ।