खोज

गुल्मी, २७ कार्तिक ।
हरिबोधिनी एकादशी पर्वको अवसर गुल्मीमा स्थानीय पालिकाहरूले एक दिन सार्वजनिक बिदा दिएका छन । जिल्लाको पबित्र धार्मिक सथल रेसुङ्गा पोखरीमा लाग्ने धार्मिक मेलाको अवशरमा रेसुङ्गा नगरपालिका र गुल्मीदरबार गाउँपालिकाले मंगलबार सार्वजनिक बिदा दिने निर्णय गरेका हुन ।

रेसुङ्गा नगरपालिकाकी कार्यवाहक नगरप्रमुख अमृतादेवी कुँवरले आज सार्वजनिक सूचना प्रकाशन गरि नगरपालिकाको कार्यपालिका बैठकबाट गरिएको निर्णय अनुसार कार्तिक २७ गते नगरपालिका क्षेत्रका सम्पूर्ण कार्यालयहरू, वडा कार्यालयहरू, सम्पूर्ण शिक्षण तथा स्वास्थ्य संस्थाहरू र अन्य सार्वजनिक संघं सस्थाहरूमा बिदा दिने निर्णय गरिएको जानकारी दिएकी छन । त्यसैगरि गुल्मीदरबार गाउँपालिकाले पनि गाउँ कार्यपालिकाको नियर्णयानुसार पालिका अन्तर्गतका सम्पूर्ण वडा कार्यालयहरू, विद्यालय एवं स्वास्थ्य चौकीहरू तथा विभिन्न संघ संस्थाहरूमा मंगलबारका दिन बिदा दिने निर्णय गरेको प्रमुख प्रशासकीय अधिकृत भेषराज घिमिरेले बताए ।

हरिबोधिनी एकादशीको अवशरमा गुल्मीको धार्मिक स्थल रेसुङ्गा पोखरीमा प्रत्यक वर्ष ठूलो धार्मिक मेला लाग्ने गर्दछ । एकादशी मेलाको अशरमा त्यस क्षेत्रमा बिहानैदेखि श्रद्धालुहरूको घुँईचो लाग्ने गर्दछ । एकादशीको दिन रेसुङ्गा पोखरीको पानीले स्नान गरेपछि चारधाम जान नपर्ने र आफुले अञ्जानमा गरेका सम्पूर्ण पापहरू समेत नष्टभई संवृद्धि प्राप्त हुने धार्मिक विश्वास रहिआएको छ । त्यही मान्यता र विश्वासका कारण गुल्मी लगायत छिमेकी जिल्लाहरूबाट पोखरीमा स्नान गर्न आउने श्रद्धालुहरूको ठूलो घुँईचो लाग्ने गर्दछ ।

रेसुङ्गा पोखरीमा चारधामवाट ल्याएको जल मिसाईएको हुँदा यहाँको पोखरीमा स्नान गर्नाले चारधाम जान पर्दैन भन्ने मान्यता रहिआएको छ । मानिसहरूले पोखरीमा स्नान गरेपछि नजिकै रहेको यज्ञशाला मन्दिरमा पुगेर पुजाआजा गर्ने र बर माग्ने गर्दछन । ठुलो एकादशीको रूपमा चिनिने हरिबोधनी एकादशीलाई गुल्मीमा विशेष महत्वको रूपमा मनाउने गरिन्छ । रेसुङ्गा पोखरीमा स्नान गर्नका लागि गुल्मी लगायत अर्घाखाँची, पाल्पा, स्याङ्जा, वाग्लुङ्ग, प्यूठान, रूपन्देही लगायत धेरै टाढा टाढावाट पनि श्रद्धालुहरू आउने गर्दछन् । एकादशीको अवशरमा रुद्रवेणी र कालीगण्डकी नदीमा पनि स्नान तथा पुजापाठ गर्नेहरूको घुइँचो लाग्ने गर्दछ ।

रामपुर नगरपालिकामा मंगलबार सार्वजनिक बिदा
हरिबोधिनी एकादशीको अवसरमा रामपुर नगरपालिकाले भोलि मंगलबार सार्वजनिक बिदा दिएको छ । नगरपालिकाले आज एक सूचना जारी गर्दै विदा दिएको जनाएको हो ।हरिबोधिनी एकादशीलाई यस क्षेत्रमा धार्मिक उत्सवको रूपमा मनाउने भएकाले नगर कार्यपालिकाको निर्णय अनुसार विदा दिने निर्णय गरेको रामपुर नगरपालिकाका नगर प्रमुख रमण बहादुर थापाले जानकारी दिए । सोमबार बसेको नगर कार्यपालिकाको बैठकले निर्णय गरी विदा दिएको हो ।
प्रमुख प्रशासकीय अधिकृत सुर्यदर्शन पण्डितले सूचना जारी गर्दै नगरपालिका मातहतका सम्पूर्ण सरकारी कार्यालय, स्वास्थ्य संस्था, सहकारी र शैक्षिक संस्था लगायतका कार्यालयमा विदा दिईएको जानकारी दिए ।
कालिगण्डकी नदी किनारका विभिन्न स्थानमा हरिबोधिनी एकादशीको अवसरमा मेला लाग्दै आएको छ । नगरपालिकाले विगतका वर्षहरूमा पनि हरिबोधनी एकादशीको अवसरमा सार्वजनिक विदा दिएको थियो । ठूलो एकादशीको रूपमा लिईने हरिबोधिनी एकादशीको अवसरमा कालीनदी किनार अन्तर्गत रामपुर नगरपालिकाको केलादी घाट, रामघाट, कोप्चेघाट, तातोपानी, बर्दले, स्याउली बजार लगाएतका विभिन्न स्थानमा मेला भर्न तथा स्नानका लागि भक्तजनहरू पुग्ने गर्दछन् ।