खोज

प्यूठान, १५ कात्तिक ।
निर्माण शुरू भएको आठ वर्षपछि प्यूठानको दम्ती सब–स्टेशन सञ्चालनमा आएको छ । बुधबार प्रतिनिधि सभा सदस्य सुर्य बहादुर थापा क्षेत्रीले सव–स्टेशन उद्घाटन गरेका हुन् ।
सव–स्टेसन सञ्चालनले जिल्लाबासीले विद्युत अनियमितता झेल्न नपर्ने विश्वास व्यक्त गरे । उनले अब मंसिरभरीमा नौबहिनीको वडा नं. १ र गौमुखी गाउँपालिकाको वडा नं. ३ रजवाराको आधाभागमा विद्युतीकरण नभएकोले विद्युतीकरण गर्नु आफू सहित सबैको पहिलो प्राथमिकता रहेको बताए ।

सञ्चालनमा आएको सव–स्टेसन ३३/११ केभी क्षमताको भएको नेपाल विद्युत प्राधिकरण प्यूठान वितरण केन्द्रका प्रमुख महेन्द्र कुमार दासले जानकारी दिए । दासका अनुसार सबस्टेसनबाट तीन वटा ११ केभी फिडरमार्फत जिल्लामा विद्युत् आपूर्ति गरिने छ । यसबाट करिब ३२ हजार जनता लाभान्वित हुनेछन् ।
उनले भने ,‘अब जुम्रीबाट ३३ केभीबाट दम्ती सबस्टेसन विद्युत जान्छ, त्यसपछि मात्रै ११ केभीबाट वितरण गरिने हुँदा भोल्टेज सुधार हुने र विद्युत् आपूर्तिको गुणस्तरीयता बढ्ने छ ।’

प्राधिकरण र श्री त्रिपुरेश्वर जय दुर्गे जेभीबीच ५ करोड ३६ लाख ६० हजार ६८२ रूपैयाँमा २०७४ जेठ १७ गते सबस्टेशनका लागि लाइन विस्तार र २०७२ असार ४ गते आरके विश्वनाथ जेभीले ७ करोड ४२ लाख ६७ हजार २३९ रूपैयाँमा सब स्टेशन निर्माणका लागि ठेक्का सम्झौता भइ काम शुरू गरिएकोमा बिजुवार, बाग्दुला, दम्तीका केही स्थानमा विवादका कारणले सम्पन हुन सकेको थिएन । सर्वपक्षीय छलफल पछि स्थानीयले काममा अवरोध गरेकोमा ठेकका तोडेर प्राधिकरणले काम सम्पन्न गरि अलपत्र सव–स्टेशन सञ्चालन गरिएको वितरण केन्द्र प्रमुख दासले जानकारी दिए ।

३३ केभिए प्रशारण लाईनलाई ११ केभिमार्फत वितरण गर्न सव–स्टेशनको भूमिका हुन्छ । सव–स्टेशन संचालनमा आएसंगै विद्युत वितरण र विद्युतिय जोखिमले हुने क्षति न्यूनिकरण गर्न मद्दत पुग्ने केन्द्रले जनाएको छ ।जिल्लाका ९ वटा स्थानीय तहका ६४ वडामध्ये नौबहिनी–१ को स्याउलीबाङ, गौमुखी–३ खराबाहेक सबै स्थानमा विद्युत् लाइन पुगेको प्राधिकरणले जनाएको छ । जिल्लाका ४५ हजार घरधुरीमध्ये ४४ हजार घरधुरीमा विद्युत् पुगेको छ ।