खोज

दाङ ।

लुम्बिनी प्रदेशका मुख्यमन्त्री चेतनारायण आचार्यले पूर्वाधार निर्माणमा हुने ढिलासुस्तीलाई सरकार सहन नसक्ने बताए। उनले निर्माणको जिम्मा लिने तर, समयमा काम सम्पन्न नगर्ने प्रवृत्ति अन्त्य गर्ने योजना सरकारको रहेको स्पष्ट पार्दै ढिलासुस्ती स्वीकार्य नहुने चेतावनी दिए।

दाङको धार्मिक पर्यटकीय स्थल बाह्रकुने दहमा मंगलबार आयोजित छलफल कार्यक्रममा मुख्यमन्त्री आचार्यले पूर्वाधार निर्माणमा ढिलासुस्ती सहन नसकिने र अटेरी गर्ने निर्माण व्यवसायीलाई कालोसूचीमा राखेर कारबाही गरिने चेतावनी दिए। बाह्रकुने दह क्षेत्रमा बहुउद्देश्यीय पार्क निर्माण योजना अघि बढेपनि कामले गति नलिएको बारे स्थलगत अनुगमन गर्न उनी स्वयं उपस्थित भएका थिए। उनले निर्माण व्यवसायीलाई समयमा काम सम्पन्न गर्न निर्देशन समेत दिए।

घोराही उपमहानगरपालिका–१३ मा अवस्थित बाह्रकुने दह क्षेत्रमा बहुउद्देश्यीय पार्क निर्माण योजना सञ्चालनमा रहेको छ। उद्योग, पर्यटन तथा यातायात मन्त्रालयअन्तर्गत पर्यटन डिभिजन कार्यालयबाट ६ करोड ६ लाखको बजेटमा निर्माण अघि बढाइएको छ, जसको जिम्मा नागार्जुन\शिव निर्मल जेभी सल्यानले लिएको छ। बहुउद्देश्यीय पार्क अन्तर्गत दहको मुख्य गेट, बाँध लगायतका पूर्वाधार निर्माणको सम्झौता गरिएको थियो, तर प्रभावकारी रूपमा काम अघि नबढेकाले मुख्यमन्त्री र विभागीय मन्त्रीले यसमा गम्भीर चासो व्यक्त गरे।

ब्रह्मक्षेत्र संरक्षण तथा धार्मिक समिति अध्यक्ष देवबहादुर घर्तीको अध्यक्षतामा सम्पन्न कार्यक्रममा उद्योग, पर्यटन तथा यातायात व्यवस्था मन्त्री प्रचण्डविक्रम न्यौपानेले सरकारको उद्देश्य पर्यटन क्षेत्रलाई पूर्वाधार सम्पन्न बनाउने रहेको बताए। प्रदेश सरकारले पर्यटन क्षेत्रको विकासका लागि व्यापक योजना अघि सारेकोले नागरिक तहबाट सहयोगको अपेक्षा राखे।

लुम्बिनी प्रदेशलाई पर्यटन सर्किट निर्माण गरेर आपसमा जोड्ने संकल्प प्रदेश सरकारले लिएको छ। यसअन्तर्गत लुम्बिनी भ्रमणमा आउने पर्यटकलाई १२ जिल्लाका धार्मिक र पर्यटकीय स्थलहरूमा पुर्‍याउने तथा विस्तारित भ्रमण गराउने उद्देश्यले पर्यटन सर्किट अवधारणा अघि सारिएको छ। यस वर्ष प्रदेश सरकारले ‘घुमौं बर्दिया’ अभियान समेत सञ्चालन गरेको छ।