खोज

प्यूठान, १२ कार्तिक ।
तिहार नजिकिएसँगै बारीमा फुलेका फूलले चार वर्षदेखि श्रीमान हराएका चेतकलाको मनमा खुशी ल्याएको छ । गाउँपालिकाले पुष्प खेती अन्तर्गत फुलखेतीलाई छनौट गरेपछि यस वर्ष उनका बारीमा १ हजार ६ बोटहरूमा सयपत्री फुलेका छन् ।
माण्डवी गाउँपालिका–३ लामाचौरकी ४४ वर्षिय चेतकला के.सी.ले उनको चार रोपनी क्षेत्रफल भएको बारीमा सयपत्री फूलको खेती गरेकी छन् । उनका बारीमा कर्मा, जयकिसान र स्थानीय जातका सयपत्री फूलहरूले ढकमक्क ढाकेका छन् । चार वर्ष अघि भारतको पुनामा नोकरी गरिरहेका श्रीमान हराएपछि विक्षिप्त भएकी उनी फूल उत्पादन गरेर घर चलाउने देखि छोरा पढाउनेसम्मका सपना बुनेकी छन् । ‘सानै देखि फुल राप्न साह्रै रहर लाग्दथ्यो, यो वर्षदेखि व्यवसायिक रूपमै लगाउन थाले’ चेतकलाले भनिन, ‘यस वर्षको नाफाबाट अर्को वर्षदेखि मल्चिङ लगाएर फुलाउने योजना छ ।’ उनका अनुसार यस वर्ष ५ क्विन्टलको फूल उत्पादनको लक्ष्य भएपनि साढे ३ क्विन्टल बिक्री योग्य बनाउन सकिएको छ । ५० के.जि. पहिल्यै बिक्री भइसकेको छ । पुजा, विवाह, ग्रामीण क्षेत्रमा हुने कार्यक्रममा समेत फूल विक्री भएको छ । तिहारका लागि स्थानीय वजारसंगै बुटवलबाट समेत माग आउँदा खुशी लागेको छ ।

चेतकलाका १५ वर्षीय छोरा छन् । उनी कक्षा ९ मा पढ्दै छन् । श्रीमान नहुँदा परिवारको काध थामेकी चेतकलाका सयपत्री फूलसंगै फक्रिएको खुशी फक्रिरहेका छन् ।
माण्डवी गाउँपालिकाले उनलाई प्राविधिक र प्रविधिमा सहयोग गर्दै आएको छ । फूलखेती प्रबर्धन कार्यक्रम अन्तरगत पालिकाले सहयोग पू¥याउँदै आएको गाउँपालिकाका अध्यक्ष नमराज अधिकारीले जानकारी दिए । गाउँपालिकाले पालिका भित्र प्लास्टिकका फूल र माला बिक्रीमा रोक लगाइएको छ । कृतिम प्लाष्टिकजन्य मालालाई निरुत्साहित गर्दै स्थानीय फूलको प्रबर्धनका लागि सो निर्णय गरेको स्थानीय तहले जनाएका छन् ।

तिहार जस्तो पवित्र चाडलाई कृत्रिम माला प्रयोग गरेर देखावटी गर्ने र स्वास्थ्यमा समेत असर गर्ने हुँदा प्लास्टिकका फूलमाला बिक्रीमा रोक लगाइएको माण्डवी गाउँपालिकाका अध्यक्ष नमराज अधिकारीले बताए । ‘रोक लगाउने मात्रै होइन, व्यवसायिक फूल खेतीमा माण्डवीले किसानलाई प्रोत्साहन गरेको छ’ अधिकारीले भने,‘गाउँमा धेरै घरका करेसा फूल खेती भएतापनि अपुग फूल पूर्ति होस्, फूलखेतिबाट उद्यमशिलता होस भनेर अनुदान समेत दिएका छौं ।’ उनले पालिका भित्र कृतिम वा प्लाष्टिक जन्य फूल र माला विक्री गरेको पाइए कारबाही हुने समेत बताए ।

९ स्थानीय तह रहेको प्यूठानमा माण्डवी गाउँपालिकासंगै प्यूठान नगरपालिका र स्वर्गद्वारी नगरपालिकाले समेत चाडपर्वको समयमा प्लास्टिकजन्य फूलमालाको बिक्री वितरणमा रोक लगाएको सूचना प्रकाशन गरेका छन् । ती पालिकाले छुट्टा छुट्टै सूचना जारी गर्दै तिहार र छठलगायत पर्वमा प्लास्टिक जन्य फूलमाला तथा अन्य सामग्रीको प्रयोग नगर्न आग्रह गरेका हुन ।