खोज

प्यूठान, ११ कार्तिक ।
प्यूठानका तीन स्थानीय तहमा प्लास्टिकका फूल र माला विक्रीमा रोक लगाइएको छ । कृतिम प्लाष्टिकजन्य मालालाई निरुत्साहित गर्दै स्थानीय फूलको प्रबद्र्धनका लागि सो निर्णय गरेको स्थानीय तहले जनाएका छन् ।
तिहार जस्तो पवित्र चार्डलाई कृतिम माला प्रयोग गरेर देखावटी गर्ने र स्वास्थ्यमा समेत असर गर्ने हुँदा प्लास्टिकका फूल र माला विक्रीमा रोक लगाइएको माण्डवी गाउँपालिकाका अध्यक्ष नमराज अधिकारीले बताए । ‘रोक लगाउने मात्रै होइन, व्यवसायिक फूल खेतीमा माण्डवीले किसानलाई प्रोत्सहन गरेको छ’ अधिकारीले भने,‘गाउँमा धेरै घरका करेसा फुल खेती भएतापनि अपुग फुल पूर्ती होस्, फूलखेतिबाट उद्यमशिलता होस भनेर अनुदान समेत दिएका छौं ।’ उनले पालिका भित्र कृतिम वा पलाष्टिक जन्य फूल र माला विक्री गरेको पाइए कारबाही हुने समेत बताए ।

९ स्थानीय तह रहेको प्यूठानमा माण्डवी गाउँपालिकासंगै प्यूठान नगरपालिका र स्वर्गद्वारी नगरपालिकाले समेत चाडपर्वको समयमा प्लास्टिकजन्य फूलमालाको बिक्री वितरणमा रोक लगाएको सूचना प्रकाशन गरेका छन् । ती पालिकाले छुट्टा छुट्टै सूचना जारी गर्दै तिहार र छठलगायत पर्वमा प्लास्टिक जन्य फूलमाला तथा अन्य सामग्रीको प्रयोग नगर्न आग्रह गरेका हुन ।
स्वर्गद्वारीले प्राकृतिक फूलमालाको उपलब्धता सहज होस भनेर नगर क्षेत्रभित्र फूल खेती गरेका किसानको नाम, ठेगाना र सम्पर्क फोन नम्बर पनि सार्वजनिक गरेको छ । स्थानीय तहले प्लास्टिकजन्य फूलमाला विस्थापन गर्ने पालिकाको नीति रहेको बताउछन् । माण्डवी गाउँपालिका–३ लामाचौरमा फुल खेती गर्दै आएकी चेतकला के.सी.ले प्लास्टिकका फूल माला प्रयोगमा रोक लगाउने पालिकाको निर्णयले तिहारको मौलिकता जोगिने र कृतिम मालाहरूको प्रयोगमा समेत कमि हुने बिश्वास ब्यक्त गरिन । यस बर्ष उत्पादित फूलले राम्रो बजार पाउने आशामा रहेको के.सी.ले बताइन ।