खोज

लमही, १० कात्तिक ।

लुम्बिनी प्रदेश सरकारले यस वर्ष “घुम्न जाउँ बर्दिया“ अभियान सञ्चालन गर्ने भएको छ । जसको उद्देश्य बर्दियामा पर्यटकहरूको संख्या बढाएर आर्थिक समृद्धि हासिल गर्नु हो । अभियान २९ कात्तिकदेखि ठाकुरद्वारामा सुरु हुनेछ । उद्योग, पर्यटन तथा यातायात मन्त्री प्रचण्डविक्रम न्यौपानेले बर्दियालाई प्रमुख पर्यटकीय गन्तव्य बनाउन यस अभियानले महत्वपूर्ण भूमिका खेल्ने बताएका छन् ।

बर्दियाको मुख्य आकर्षणहरूमा बाघ, जंगल सफारी, दौलतपुर घाटमा डल्फिन, कृष्णसार, थारु संस्कृति, होमस्टे अनुभव र विभिन्न धार्मिक स्थलहरू छन्। अभियानका क्रममा पर्यटन प्रवर्धनका लागि प्रचारात्मक कार्यक्रमहरू सञ्चालन गरिनेछ । सामाजिक सञ्जालको भरपूर प्रयोगसँगै भारतीय सीमावर्ती क्षेत्रमा समेत प्रचारात्मक गतिविधि गरिनेछ ।

यसैगरी व्यावसायिक रुपमा कृषि क्षेत्रलाई अगाडि बढाएका विभिन्न स्थलहरु अवलोकन तथा कृषि अध्ययनका लागि पर्याप्त छ । स्थानीय कला संस्कृति झल्कने थारु नृत्य पनि बर्दियाको अर्को आकर्षणको केन्द्र हो । ‘बर्दियाामा मुख्यगरी बाघ हेर्न पाईन्छ, बाघ लगायत अरु जनावर जंगल सफारी गरेर हेर्न पाईन्छ’, मन्त्री न्यौपानेले भने,‘जंगलसफारी बर्दियाको प्रमुख आकर्षण हो, यससंगै कृष्णसार, डल्फिनको अवलोकन संगै यहाँका होम स्टेहरुमा पाइने स्थानीय परिकारको स्वाद तथा थारु संस्कृतिको नाच यो जिल्लाका पर्यटकीय आकर्षणका केन्द्र हुन्, यी क्षेत्रहरुको प्रवद्र्धन गरेर बर्दियामा पर्यटक भित्र्याउने लक्ष्य मन्त्रालयको छ ।’ यसैगरी धार्मिक पर्यटन अन्तर्गत बर्दियामा विभिन्न पुरातात्विक धार्मिक धामहरु समेत बर्दियाका थप आकर्षण हुन् ।

स्थानीय तहहरूसँग समन्वय गर्दै पर्यटकीय स्थलहरूको व्यवस्थापन र बसोबासको सुविधाको व्यवस्था गरिनेछ। अभियानमार्फत विदेशी र आन्तरिक पर्यटकलाई बर्दियाको आकर्षणबारे जानकारी दिन थालिएको हो।