खोज

रास्वपा सभापति रवि लामिछानेलाई अनुसन्धानका लागि प्रहरीले पक्राउ गरेपछि उनका कार्यकर्ताहरूले दिनहुँ प्रदर्शन गर्दै आएका छन् । सहकारी ठगीमा संलग्न भनिएका रविको मुद्दा अदालती प्रकृयामा गईसकेकोले अव अदालतको आदेश पर्खनु बाहेक अर्को विकल्प छैन । रवि आफैले पनि अदालतप्रति विश्वास रहेको र अदालतले गर्ने निर्णय स्वीकार गर्ने बताईसकेको अवस्थामा अदालतलाई प्रभावित गर्ने उद्देश्यले दिनहुँ आन्दोलन गर्नु कानुनी शासनमाथि खिल्ली उडाउने काम मात्र हो । आन्दोलनको जोडबलमा अदालतलाई प्रभावित गर्न सकिन्छ कि भन्ने मनसायले गरिएको आन्दोलनले निकास दिदैन् । रास्वपा विधि र कानुनी शासनको पक्षमा रहेको हो भने अव उसका नेता कार्यकर्ताले अदालतबाट आउने आदेशको प्रतिक्षा गर्नुपर्दछ । त्यसैपनि रास्वपा पार्टी दर्ता हुँदैगर्दा नेपालको संविधान, विधि र कानुनी शासनप्रति प्रतिवद्धता जनाएरै निर्वाचनमा भाग लिएको हो । तसर्थ लोकतन्त्रमा विधि र कानुनी शासनको पालना, सम्मान र आत्मसाथ गर्नु जरुरी छ । तर, रास्वपाका सभापति रवि लामिछानेका समर्थकहरूले सडक प्रदर्शन गरेर न्यायिक प्रक्रियामा हुने प्रारम्भिक अनुसन्धानलाई नै प्रभावित गर्ने र राज्यका तटस्थ निकायहरूलाई त्रसित पारी अनुचित दवाव सिर्जना गर्ने गतिविधि गरिरहेको आरोप लागेको छ । लोकतन्त्रमा विरोध प्रदर्शन गर्ने छुट जुनकुनै पार्टीलाई छ तर न्यायपालिकालाई नै दवाव दिने गरि गरिने आन्दोलन कानुनी र विधिसम्मत हुन सक्दैन् । राज्यका वैधानिक निकायबाट भइरहेको निष्पक्ष अनुसन्धान र न्यायिक निरूपणको कार्यलाई वाधा पु¥याउने, नागरिकको व्यक्तिगत स्वतन्त्रता र सामाजिक सद्भाव र स्थानीय शान्ति सुरक्षामा समेत खलल पु¥याउने गतिविधि प्रति नागरिक समाज र दलहरूले गम्भीर आपत्ति प्रकट गरेका छन् । निश्चितरूपमा कानुन सबैका लागि समान हुने र हुनुपर्दछ । रवि लामिछानेलाई यो देशको कानुनले पर्गेल्नुपर्ने कुनै कारण छैन । तर, उनको पार्टीका नाममा भइरहेको गतिविधिहरूले विधिको शासनको खिल्ली उडाउने काम गरेको आरोप छ । न्यायालयको फैसाला प्रतिक्षा गर्नुपर्नेमा आन्दोलन गरेर नेपाली जनताको विधिको शासन पालना गर्ने चाहनालाई अवमूल्यन र उपहास गरेको हो कि भन्ने भान भैरहेको छ । लोकतन्त्रप्रति विश्वास राख्ने, कानुन र विधिको शासनको सम्मान गर्ने कांग्रेस, माओवादी लगायतका पार्टीले विगतमा आफ्ना नेताप्रति लागेका भ्रष्टाचारका आरोपमा आफ्नै दल सरकारमा हुँदासमेत कतै दवाव दिएको देखिएन । तर, रास्वपाका नेता कार्यकर्ताहरू न्यायिक प्रकृयामा गैसकेको मुद्दा निरूपणमा प्रतिक्षा गर्न नसक्नु कमजोरी हो । सहकारी ठगीमा संलग्न आरोपितहरूमध्ये गोर्खा मिडिया कम्पनीका सञ्चालक अध्यक्ष जीवी राई फरार रहेको, छविलाल जोशी केही समय पहिल्यै पक्राउ परी अनुसन्धानको क्रममा प्रहरी हिरासतमा रहेकोले यी सवै प्रकृयामा अव रास्वपा पर्ख र हेरको अवस्थामा रहनुपर्दछ ।

रास्वपाका सभापति रवि लामिछाने आफैले अदालतको आदेश पालना गर्छु भनेका छन् । अदालतप्रति उनले विश्वास पनि दर्शाएका छन तर फेरी आफ्ना नेता कार्यकर्तालाई आन्दोलनमा उतारेर अदालतको न्यायिक प्रकृयालाई प्रभावित गर्ने काम गर्नु दोधारे चरित्र हो । राजनीतिज्ञहरूले राजनीति कहाँ गर्ने, कसले गर्ने, आफू कुन ठाउँमा छु, आफ्नो कर्तव्य के हो भन्ने कुरा विर्सनु हुँदैन । राजनीति त भोली पनि गर्न सकिन्छ । जनताको विश्वास जित्न सके रवि फेरीपनि सत्तामा पुग्न सक्छन तर अहिल्यै हतास मानसिकतामा राज्यका अवयवप्रति बितृष्णा फैलाउने मनसायले भैरहेको दवावमूलक प्रदर्शन सुहाउने गरि भएको छैन भन्दा अत्युक्ति हुँदैन । विगतमा नेपाली कांग्रेसका नेता बालकृष्ण खाँण, एमालेका टोपबहादुर रायमाझी र माओवादीका नेता कृष्णबहादुर महरा जेल पर्दा पार्टीहरूले कुनैपनि प्रकारको आन्दोलन गरेनन् । बरु लोकतन्त्रमा विधिको शासनको पालना गर्ने भन्दै दलहरूले अदालतको आदेशको पालना र प्रतिक्षा गरे । रास्वपाले पनि त्यो नैतिक इमान्दारीता देखाउनुपर्दछ ।