खोज

बुटवल, ६ कात्तिक ।

सहकारी बचत अपचलनमा पक्राउ परी कास्कीबाट रुपन्देही ल्याइएका पुर्व डिआइजी छविलाल जोशीको मंगलबार बयान लिइएको छ ।

जिल्ला सरकारी वकिलको कार्यालयमा मंगलबार ११ बजेदेखि सुरु भएको बयान लिने क्रम साँझ सकिएको रुपन्देहीका प्रहरी प्रमुख प्रहरी उपरीक्षक रञ्जितसिंह राठौरले जानकारी दिए । बयान सकिएकाले जोशीलाई बुधबार दिउँसो कास्की पठाउने तयारी गरिएको छ ।

जिल्ला सरकारी वकिल कार्यालयका प्रमुख प्रेमराज पौडेलको रोहवरमा इलाका प्रहरी कार्यालय बुटवलका प्रमुख प्रहरी नायब उपरीक्षक विजयराज पण्डित, अनुसन्धान अधिकृतहरू यमलाल बन्जाडेसहित प्रहरी अधिकारीहरूले जोशीको बयान लिएका हुन् । बचत अपचलनमा पक्राउ परी कास्की प्रहरीकै हिरासतमा रहेका राष्ट्रिय स्वतन्त्र पार्टीका सभापति रवि लामिछानेलाई भने रुपन्देही ल्याउने योजना अहिलेसम्म नरहेको प्रहरी प्रमुख राठौरले बताए । “कास्कीमा अनुसन्धान भैरहेकाले रुपन्देही ल्याउने अहिलेसम्म योजना बनेको छैन, बयानका क्रममा ल्याउनैपर्ने अवस्था देखियो भने ल्याउन पनि सकिन्छ”–उनले भने ।

जोशीको बयान लिइरहँदा जिल्ला अदालत बाहिर भने सहकारीपीडितहरुले प्रदर्शन गरेका छन् । सहकारी ठगीमा संलग्नलाई कारवाहीको माग गर्दै भैरहवामा पीडितहरुले विरोध प्रदर्शन गरेका हुन् । रुपन्देही जिल्ला अदालत अगाडि ठूलो संख्यामा जम्मा भएका उनीहरुले बचत रकम फिर्ता र ठगीमा संलग्नलाई कारवाहीको माग गर्दै प्रदर्शन गरेका हुन् ।

बुटवलस्थित सुप्रिम बचत तथा ऋण सहकारी संस्था लिमिटेडबाट पीडितले विगतदेखि नै सुप्रिम पीडित संघर्ष समितिमार्फत् आन्दोलन गर्दै आएका छन् ।

उनीहरुले सुप्रिमको बुटवल शाखा व्यवस्थापक सागर केसी र सहकारीका अध्यक्ष गितेन्द्रबाबु राई (जीवी) लाई राजनीतिक संरक्षणमा भगाइएको आरोप समेत लगाएका छन् ।

अदालतअघि विरोध प्रदर्शन गरिरहेका पीडित सरकारी वकिल कार्यालय अघि जान खोज्दा प्रहरीले रोकेको थियो । वडा प्रहरी कार्यालय भैरहवाका प्रमुख प्रहरी निरीक्षक नेत्र बुढाले प्रहरीले अनुसन्धान सुरु गरिरहेको भन्दै विरोध प्रदर्शन नगर्न आग्रह गरेका थिए । त्यसपछि पीडितले अदालत अघि नै प्रदर्शन गरेका हुन् ।

बचत रकम फिर्ता गर, हाम्रो रगत–पसिनाको कमाई फिर्ता गर, सहकारी ठगी बन्द गर, दोषीलाई कारबाही गर, सागर केसीलाई पक्राउ गर, जीवी राईलाई पक्राउ गर लगायतका प्लेकार्ड बोकेर पीडितले विरोध गरेका हुन् । उनीहरुले रवि लामिछाने, जोशी र जीवी राईलाई राजनीतिक संरक्षण भएको समेत आरोप लगाएका छन् । सुप्रिम पीडित संघर्ष समितिका संयोजक विजय नेपालले न्याय, रकम फिर्ता र सहकारीको रकम अपचलन गर्नेलाई कारबाहीको माग गर्दै प्रदर्शन गरिएको बताए ।

संसदीय छानबिन विशेष समितिको सिफारिस कार्यान्वयनका क्रममा असोज ६ गते जोशी काठमाडौंबाट पक्राउ परेका थिए । सुप्रिम बहुउद्देश्यीय सहकारी संस्थाबाट १० करोड भन्दा बढी रकम गोर्खा मिडिया नेटवर्कको खातामा गएको प्रहरी अनुसन्धानले देखाएको छ । सहकारी प्रकरणमा राष्ट्रिय स्वतन्त्र पार्टी (रास्वपा) का सभापति रवि लामिछाने पनि अहिले पोखरा प्रहरीको हिरासतमा छन् ।