खोज

सुर्खेत ।

राष्ट्रिय स्वतन्त्र पार्टी (रास्वपा)का सभापति रवि लामिछाने पक्राउको विरूद्धमा कर्णालीमा पनि विरोधका कार्यक्रमहरु आयोजना गरिएका छन् । कर्णालीका विभिन्न जिल्लाहरुमा शान्तिपूर्ण रुपमा प्रर्दशन गर्नुका साथै प्रमुख जिल्ला अधिकारी मार्फत ज्ञापनपत्र बुझाइएको छ ।

रास्वपा सुर्खेतले प्रमुख जिल्ला अधिकारी शंकरहरी आचार्य मार्फत ज्ञापनपत्र बुझाएको छ । लामिछानेलाई रिहाईको माग गर्दै शान्तिपुर्ण रुपमा प्रर्दशनमा आएका पार्टीका नेता तथा कार्यकर्ताहरुले प्रजिअ आचार्यलाई ज्ञापनपत्र बुझाएका हुन् ।

त्यसै गरी रास्वपा हुम्लाले आइतबार प्रमुख जिल्ला अधिकारी मार्फत रिहाईको माग गर्दै गृहमन्त्रालयलाई ज्ञापन पत्र बुझाएको छ । रास्वपाका कर्णाली प्रदेश कमिटि सदस्य तथा कार्यवाहक जिल्ला संयोजक बुधे बुढाको नेतृत्वमा गएको टोलीले सभापति लामिछानेको रिहाइको माग गर्दै प्रर्दशन समेत गरेको थियो । उनीहरुले सभापति लामिछानेलाई सरकारले राजनीतिक प्रतिशोधका आधारमा पक्राउ गरिएको आरोप लगाउँदै प्रमुख जिल्ला अधिकारी मार्फत ज्ञापनपत्र बुझाएका हुन् ।

सहकारी प्रकरणमा सार्वजनिक लेखा समितिका सभापति समेत रहेका एमालेका नेता ऋषिकेश पोखरेल र कांग्रेसका उपसभापति धनराज गुरुङलाई छानबिनको दायरामा नल्याएको ज्ञापनपत्रमा उल्लेख छ । निष्पक्ष छानविन नभए सडक र सदन दुबैमा रास्वपा आन्दोलनमा उत्रिने समेत भनिएको छ ।