खोज

बुटवल,०४ कार्तिक ।
नेपालीहरूको विभिन्न चाडपर्वमा परम्परा अनुसारका गतिविधिहरू गर्दै आएको होटल पौवाले यस वर्षको बडादशैँको अवसरमा शुक्रबार सराय नाच प्रस्तुत गरेको छ । होटल पौवाको तिलोत्तमा–३ योगिकुटीमा रहेको शाखाले गुल्मी छत्रकोट गाउँपालिका–१ हुँगाका कलाकारहरू ल्याएर सराय नाच प्रस्तुत गरेको हो ।

सराय नाचसँगै पौवाका विभिन्न परिकारहरूको स्वादमा दर्शकहरूले मनोरञ्जन लिएका थिए । करिब २ हजार दर्शकको सहभागिता रहेको कार्यक्रममा सराय नाच, ढाल नाच, खुडा नाच, लौरो नाच लगायतका विभिन्न साँस्कृतिक प्रस्तुती रहेका थिए । यसैगरी होटल पौवाले तयार पारेका परम्परागत परिकारहरू सेलरोटी, चुकौनी, गुन्द्रुकको अचार, काँक्राको अचार लगायतका खानाका परिकार रहेका थिए ।

दशैंका बेला पश्चिम नेपालका केही भागमा गरिने मनोरञ्जनात्मक नाचको रूपमा रहेको सरायँबारे नयाँ पुस्तालाई समेत जानकारी गराउने उद्देश्यले कार्यक्रम आयोजना गरिएको होटल पौवा बुटवल शाखाका प्रबन्धक प्रकाश पाठकले बताए । विशेष गरी लुम्बिनी प्रदेशका गुल्मी, अर्घाखाँची, प्यूठान, कपिलवस्तु, रूपन्देही, दाङ तथा गण्डकी प्रदेशको बागलुङ, स्याङ्जा तथा अन्य विभिन्न जिल्लाहरूमा कोट तथा शक्तिपिठहरूमा नाचिने सरायँ नाचको संरक्षण गरी पर्यटन प्रवद्र्धन गर्न सकिने उद्देश्यसाथ विगत वर्षदेखिनै होटल पौवाले कार्यक्रम गर्दै आएको छ ।

सो अवसरमा शुभकामना व्यक्त गर्दै होटल पौवाका चिप अपरेटिङ अफिसर कृष्ण गौतम, बोर्ड अफ डाइरेक्टर धुर्व न्यौपाने तथा सराय नाचका संयोजक गोविन्द न्यौपाने, सरायँ नाच गाइड होम पल्ली मगर लगायतले परम्परा र सँस्कृतिलाई जगेर्ना गर्नका लागि नयाँ पुस्तामा हस्तान्तरण गर्न जरुरी रहेकोमा जोड दिएका थिए । हिन्दु परम्परा अनुसार हरेक वर्षको बडादशैँका बेला एकादशीदेखि पूर्णिमासम्म सरायँ नाच्ने प्रचलन रहेपनि नयाँ पुस्तामा यसको महत्व हराउँदै गएकाले यसको जगेर्नाका लागि आफूहरूले कार्यक्रम आयोजना गरिएको होटल पौवाका ब्राण्डिङ प्रमुख बिष्णु भण्डारीले बताए ।

यसैबीच होटल पौवाले यस वर्षको बडादशैँको अवसरमा आफ्ना विभिन्न ७ वटा शाखामा लिङ्गे पिङ राखेर अतिथीहरूलाई मनोरञ्जन प्रदान गरेको थियो । ‘जहाबाट आतिथ्यताको सुरुवात हुन्छ’–भन्ने मूल नारासहित नेपाली हस्पिटालिटी सहितको सेवा दिने उद्देश्यले देशभर आफ्नो शाखा बिस्तारलाई समेत तिब्रता दिँदै आएको होटल पौवाले लुम्बिनी प्रदेशका प्रायः सबै पर्यटकीय स्थलमा पहुँच बिस्तार गरेको छ । हालसम्म देशभरीका १५ स्थानबाट होटल पौवाले सेवा दिइरहेको छ । छिमेकी प्रदेश कर्णालीको जुम्ला, सुदूरपश्चिमको धनगढी, दाङको भालुवाङ, घोराही र लमही, कपिलवस्तुको गोरुसिङ्गे, रूपन्देहीको योगीकुटी र भैरहवाको चिल्ड्रेन पार्क, पाल्पाको तानसेन, गुल्मीको रेसुङ्गा, गण्डकी प्रदेशको राजधानी पोखरा र नवलपुर खोटाङको हलेसी बाग्मती प्रदेशको सिन्धुली तथा संघीय राजधानी काठमाडौंको गौशालामा पौवाको सेवा संचालनमा रहेका छन् । यसैगरी बागमती प्रदेशकै चितवनको भरतपुरमा र लुम्बिनी प्रदेशको औद्योगिक राजधानी बाँकेको नेपालगन्जमा शाखा बिस्तार गरी शिघ्र संचालनको तयारीमा रहेको छ ।

‘स्वदेशी तथा विदेशी पाहुनालाई नेपाली आतिथ्यको न्यानोपन दिनु हाम्रो दायित्व हो । यसका लागि हामीले हाम्रा खानामा लगातार परिमार्जन गरिरहेका छौं ।’–ब्राण्डिङ प्रमुख भण्डारीले भने, नेपाली रैथाने खानालाई स्वदेशी र विदेशी पर्यटकमाझ लोकप्रिय बनाउँदै नेपाली खानाको अन्तर्राष्ट्रियकरण गर्ने अभियानमा हामी एक कदम अघि बढ्दैछौं ।