खोज

चन्द्रौटा(कपिलवस्तु),२ कार्तिक । शिवराज नगरपालिकाका नगर प्रमुख अजय थापाले नगरपालिकाले शिक्षापछि कृषिलाई प्राथमिकतामा राखेको बताएका छन् । कपिलवस्तुको खरेन्द्रपुरमा रहेको शिवराज कृषि सहकारी संस्थाको ९औं साधारणसभालाई सम्बोधन गर्दै उनले यस्तो बताएका हुन । स्थानीय उत्पादनलाई प्राथमिकताको योजना अघि सारेको समेत उनले बताए ।

विशेषगरी स्थानीय उत्पादनलाई व्यापारी, उद्योगी र उपभोक्तालाई समेत प्रयोग गर्न आग्रह समेत थापाले गरे । तिहारलाई लक्षित गरि प्लास्टिकजनय फूलको माला लगायतका वस्तु बिक्रीवितरणमा रोक लगाउँदै स्थानीय उत्पादनलाई प्रोत्सहन गर्न आग्रह गरेको थापाले बताए ।बजारीकरण, बीउबिजन, सिँचाइ लगायत मलखादको व्यवस्थापन क्रमिक रुपमा गर्ने प्रमुख थापाको भनाइ छ ।

यस्तैबीच शिवराज नगरपालिका–३ का वडा अध्यक्ष टेकलाल सापकोटाले सहकारीले सर्वसाधारण कृषकलाई बचत गर्ने बानीको विकास गरेको बताए । कृषिजन्य सामाग्री सुलभ तवरले उपलब्ध गर्ने गराएको बताउँदै स्थानीयस्तरमा आइ एम ई सञ्चालन गरि ग्रामिण भेगका सर्वसाधारणलाई सुविधाले जोडिएको सापकोटाले प्रशंसा गरे ।

मलखाद लगायत कृषि सामाग्री कृषकसँग जोड्दै वडालाई कृषिमा अब्बल बनाउन आफू लागि परेको सापकोटाले बताए । वडाका कृषकहरूलाई आत्मनिर्भर बनाउन व्यावसायिक रूपमा कृषि पेशालाई अगाडि बढाउनुपर्ने उनले जनाए । वडा अध्यक्ष सापकोटाले सहकारीले कृषि क्षेत्रमा धेरै काम गरेकोले अब किसानले उत्पादन गरेका बस्तुलाई सहकारीले खरिद गर्नुपर्ने उनको भनाइ छ । वडाले प्रत्येक वर्ष कृषि क्षेत्रमा विभिन्न कार्यक्रम राखेकोले आगामी दिनमा समेत निरन्तर दिने बताए । कतिपयले अनुदानको लागि मात्र कृषि पेसा गर्ने गरेकोले त्यो अब सम्भव नरहेको सापकोटाले जिकिर गरे ।

गत आर्थिक बर्ष २०८०/०८१ मा ९३ लाख ७ हजार ३ सय ९७ रुपैयाको कारोबार भएको सहकारीको प्रतिवेदनमा उल्लेख छ । सहकारीका अध्यक्ष केरसिंह अदैले वार्षिक प्रगति प्रतिवेदन प्रस्तुत गर्दै सहकारीले सर्वसाधारणको समस्यालाई मध्यनजर गरि आइ.एम.इ. सञ्चालन गरेको जनाए ।

किसानहरूको लागि मल बिक्री वितरण लगायतका कामले कृषकहरूलाई सहज भएको दावी गरे । चालु आवमा कृषकहरूलाई तालिम प्रदान गर्ने, मल बिउ खरिद गर्ने र सामूहिक खेतीको लागि पहल गर्ने लगायतका योजना अघि सारेको सहकारीले जनाएको छ ।