खोज

बुटवल, २० असोज । चाडपर्वमा यात्रुहरुलाई सहज र सुरक्षित यात्राको लागि पहल भएपनि सडक संजाल चुनौती बनेको यातायात ब्यवसायीहरुले गुनासो गरेका छन । विजयादशमी, शुभ दिपावली तथा छठ पर्वको अवसरमा आईतबार बुटवलमा पश्चिम नेपाल बस ब्यवसायी प्रालिले आयोजना गरेको शुभकामना आदानप्रदान तथा सम्मान कार्यक्रममा ब्यवसायीहरुले यात्रुहरुलाई यातायात सेवा सहज बनाउने गरि लागेको बताए ।

कार्यक्रममा पश्चिम नेपाल बस ब्यवसायी प्रालिका अध्यक्ष दधिराम खरेलले आम ब्यवसायीहरुको हकहितसंग आम उपभोक्ताहरुको सुविधाको विषयमा संस्था सधै गम्भिर रहेको बताए । ‘चाडपर्वमा बुटवल भित्रने र बुटवलबाट बाहिर जाने सवारीको चाप बढ्छ ।’— उनले भने । सबै सवारी साधनलाई अनिवार्य संचालन र ब्यवसायीहरुलाई अतिरिक्त तेल ब्यवस्था समेत गरेको उनले बताए । सुविधासम्पन्न सवारी साधन युरो ६ सम्म प्रालिमा रहेको दाबी गर्दै उनले सडकको दुरावस्थाको कारण र नया लगानीकर्ता मुख्य चुनौतीका रुपमा देखापरेको बताए । उपभोक्तालाई सेवा दिने भनेर ल्याइएको ईभिको नाममा देखिएको दलाली रोक्न समेत उनले आग्रह गरे । यसैगरि उनले बाहिरबाट आएर यस क्षेत्रमा ठगी काम गर्ने सहकारीलाई प्रोत्साहन गर्न नहुने भन्दै स्थानिय सहकारीप्रति नकारात्क सोच त्याग्नुपर्ने बताए । यसैगरि बुटवलकै गरिमाको रुपमा रहेको अटो भिलेजलाई ब्यवस्थित गर्न समेत नया निर्वाचित टिम र स्थानिय सरकारको पहल जरुरी रहेको उनले बताए । एउटा संस्थाको गरिमा उचो गराउने गरि सानो पहल आफु र आफ्नो टिमबाट निरन्तर काम गर्दै आएको उनले बताए ।

कार्यक्रममा बुटवल उपमहानगरपालिकाका नगरप्रमुख खेलराज पाण्डेले स्थानिय सरकार नगरबासीहरुको सुविधा र सेवालाई प्राथमिकतामा राखेर काम गर्दै आएको दाबी गर्दै चाडपर्वमा हुने गरेको अपराधिक घटना र ठगी रोक्ने गरि विभिन्न सरोकारवाला निकायहरुसंग काम गरिरहेको बताए । धेरै यात्रुहरुको चाप हुने बसपार्कको सुरक्षा गतिविधिलाई सिसिटिभि क्यामराबाट निरिक्षण, सरसफाई, शौचालयलाई ब्यवस्थापन लगायतको काम भएको भन्दै यसमा सबै नगरबासीको साथ र सहयोग जरुरी रहेको उनले बताए ।

कार्यक्रममा ईलाका प्रहरी कार्यालय बुटवलका प्रहरी प्रमुख प्रहरी नायब उपरिक्षक विजयराज पण्डितले शान्तिसुरक्षाको विषयको गलत भाष्य बनाउन नहुने बताए । चाडपर्व नजिकिएसंगै आउने आम जनसमुदायको सुरक्षा, सहजताको विषयमा योजना बनाउने गरेको उनले दाबी गरे । बढि भाडा लिने, क्षमताभन्दा बढि सवारी चढाउने जस्ता गुनासोप्रति विशेष चासो दिएर रोक्नेतर्फ आफुहरु लागेको उनले बताए । ‘उपभोक्ता सचेत भएर सिट क्षमताभन्दा बढि नचढ्ने हो भने समस्या हुदैन ।’— उनले भने । शतप्रतिसत सुरक्षा विश्वको कुनै पनि क्षेत्रमा नहुने भन्दै अपराध र सुरक्षालाई रोक्न प्रहरी लाग्ने उनले बताए ।

कार्यक्रममा प्रालिका पुर्वअध्यक्ष चोपनारायण श्रेष्ठ, सुरेन्द्रमान श्रेष्ठ, रुपन्देही उधोग संघका अध्यक्ष दिलिप सापकोटा, यातायात मजदुर तथा ब्यवसायिक भलाई कोषका अध्यक्ष दिनेश फुल्लेल, पश्चिमान्चल पेट्रोलियम ब्यवसायी समितिका अध्यक्ष हिमाल गैरे, रुपन्देही होटल तथा रेष्टुरेन्ट ब्यवसायी संघका अध्यक्ष लेखनाथ भण्डारी, बुटवल अटो ईन्जिनियरिङ एशोसियसनका अध्यक्ष प्रेम गौचन, सुरक्षित यात्रा नेपालका अध्यक्ष कृष्ण बेल्बासे, नेपाल पत्रकार महासंघ रुपन्देहीका अध्यक्ष रामराज पोखरेल, बुटवल उधोग वाणिज्य संघका अध्यक्ष हरि अर्यालले
हरेक क्षेत्रमा निरासाको अवस्था रहेको भन्दै यसलाई चिर्ने गरि सबै मिलेर लाग्ने समय आएको बताए ।

कार्यक्रममा प्रालिका वरिष्ठ उपाध्यक्ष नारायण घिमिरेले यात्रुहरुको सुरक्षित यात्रा गर्ने अभियानमा लागेको दाबी गरे । सरोकारवाला निकायहरुसंग समन्वय गरि सहज र सुरक्षित यात्रामा विशेष योगदान दिएको दाबी गरे ।

यसैबिच प्रालिले बुटवल अटो ईन्जिनियरिङ एशोसियसनमा निर्वाचित अध्यक्ष प्रेम गौचनसहित पदाधिकारी तथा सदस्यहरुलाई सम्मान गरेको छ । विकास बहुउदेश्यीय सहकारी संस्था लिमिटेडमा निर्वाचित पदाधिकारीहरुलाई समेत सम्मान गरिएको प्रालिका कोषाध्यक्ष मोहन पिएसले बताए ।

सहचालक बिकको परिवारलाई १५ लाख बिमा रकम हस्तान्तरण

दुर्घटनामा ज्यान गुमाएका प्रालिका सहचालक एवं पश्चिम नेपाल बहुउदेश्यीय सहकारी संस्थाका शेयर सदस्य सन्तोष बिकको परिवारलाई बिमा वापतको रकम हस्तान्तरण गरिएको छ । बुटवल उपमहानगरपालिकाका नगरप्रमुख खेलराज पाण्डे, पश्चिम नेपाल बस ब्यवसायी प्रालिका अध्यक्ष दधिराम खरेल, सगरमाथा लुम्बिनी ईन्सुरेन्स कम्पनी लिमिटेडका प्रदेश प्रमुख विश्वदिपक नेपालले परिवारका सदस्य श्रीमति बिबिता श्रीष र छोरा कुशल सुनार (नाबालक) लाई १५ लाख रुपैया रकम हस्तान्तरण गरे ।
एउटा कर्मचारीको परिवारको हितमा संस्थागत रुपमा ठुलो सहयोग गर्न सफल भएको अध्यक्ष खरेलले बताए । विगतबाट नै कर्मचारी र ब्यवसायीहरुलाई समेटेर सहकारीमा जोड्ने काम गरेको उनले दाबी गरे ।