खोज

तिलोत्तमा, १९ असोज । ३६ औं झरना रनिङ शिल्ड नकआउट फूटबल प्रतियोगिताको उपाधि लिस्नु युवा क्लबले हात पारेको छ । स्वर्गिय खगी गुरुङसेनीको पुण्य स्मृतिमा कुन्जलापुरस्थित फुटबल मैदानमा शनिबार भएको फाइनल प्रतिस्पर्धामा आयोजक झरना स्पोर्ट्स क्लबलाई १–० गोल अन्तरले पाखा लगाउँदै उपाधि चुमेको हो । उपाधिसंगै उसले नगद ३ लाख ३१ हजारसहित रनिङ शिल्ड, मेडल तथा प्रमाणपत्र प्राप्त गरेको छ । उपविजेता झरनाले नगद १ लाख ८१ हजार रुपैया, शिल्ड, मेडल तथा प्रमाणपत्रमा चित्त बुझायो ।

निक्कै प्रतिस्प्रधात्मक खेलको पहिलो हाफ गोल रहित बराबरी भयो। खेलको ६२ औ मिनेटमा झरनाका डोकु ईजराईलीले लिस्नुका ओहेनेवा अदुसी पोकु हेनरीलाई डिबक्सभित्र लडाएपछि पाएको पेनाल्टीलाई क्याप्टेन एन्जल महर्जनले जाली चुमाए । यो नै निर्णायक गोल बन्यो । खेलमा झरनाका जितेश गुरुङ सर्वाेत्कृष्ट खेलाडी बन्न सफल भए । उनले नगद १५ हजार,कपबाट पुरस्कृत पाए ।

त्यस्तै, झरनाका कुलदीप क्षेत्रीले उत्कृष्ट डिफेन्डर, लिस्नुका विशाल केसी उत्कृष्ट गोलरक्षक, झरनाका सन्तोष खत्री उत्कृष्ट मिडफिल्डर, लिस्नुका सुशील राइले उत्कृष्ट स्ट्राइकर, लिस्नुका बुद्धि पुन उत्कृष्ट प्रशिक्षक घोषित हुदै जनही १० हजार रुपैया, कपबाट पुरस्कृत भए । खेल अवधिभरि अनुशासनमा रहेर खेलेकोमा योङ स्टार मडाहाले फेयर टिमको पुरस्कार पाएको थियो ।

एक समारोहका बिच प्रमुख प्रायोजक नरजंग गुरुङ, अखिल नेपाल फुटबल संघका उपाध्यक्ष दिर्घ बहादुर केसी, क्लबका अध्यक्ष धनेन्द्र पौडेल, क्लबका सदस्य ठाकुर अधिकारीले विजेता, उपविजेता टिम तथा खेलाडीहरुलाई पुरस्कार वितरण गरे ।

२०२७ सालमा स्थानीय युवाबाट स्थापना भएको झरनाले हरेक वर्ष प्रतियोगिता गर्दै आएको छ । १६ टिम सहभागी भएको खेलमा रुपन्देही बाहेक कपिलवस्तु, पश्चिम नवलपरासी र स्याङ्जाको वालिङबाट समेत टिमको सहभागिता रहेको थियो ।