खोज

लमही, १९ असोज ।
खाद्य व्यवस्था तथा व्यापार कम्पनी लिमिटेडको मुख्य कार्यालय तुलसीपुरमा खसीबोका बिक्री गर्ने किसानहरूको ठूलो भिड लागेको छ ।
कम्पनीले दशैंलाई लक्षित गरेर शुक्रबारदेखि खसीबोका खरीद प्रक्रिया सुरु गरेको हो । किसानहरू खसीबोका बिक्री गर्नका लागि उत्साहित देखिएका छन् । कम्पनीले यस वर्ष दाङबाट चार सय खसीबोका खरीद गरेर काठमाडौं पठाउने योजना छ ।
सहुलियतमा चामल बिक्री गर्दै आएको कम्पनीले किसान तथा सहकारीमार्फत खसीबोका खरीद गर्न लागेको हो । खाद्य व्यवस्था तथा व्यापार कम्पनीका प्रमुख तिलक सुनारका अनुसार, यस वर्षको दशैं तिहारका लागि चार सय खसीबोका खरीद गरेर काठमाडौं पठाउने निर्देशन प्राप्त भएको छ ।
गत वर्षको तुलनामा यो वर्ष खसीबोकाको संख्या झण्डै आधाले घटेको छ । गत वर्ष ७ सय ५६ खसीबोका खरिद गरिएको थियो भने यस वर्ष चार सय मात्रै खसीबोका खरीद गर्न लागेको कार्यालय प्रमुख सुनारले बताए ।
यस वर्ष बोकाको खरिद बिक्री मूल्य पनि घटेको छ । कम्पनीले यस वर्ष २० देखि ४० केजीका खसीबोका प्रतिकेजी ५६० रूपैयाँ र १८ देखि ३० केजीका बोकालाई ५४० रूपैयाँमा खरीद गर्दैछ । गत वर्षको तुलनामा यस वर्षको खरिद मूल्यमा कमी आएको सुनारले बताए ।
गत वर्ष जिउँदो खसीको मूल्य २५ केजीभन्दा माथिका प्रतिकिलो ५ सय ६२ रूपैयाँ, २० देखि २५ केजीसम्मको खसी प्रतिकिलो ५ सय ४५ रूपैयाँ र १८ केजी भन्दामाथिको बोका प्रतिकेजी ५ सय ४२ रूपैयाँ मूल्यमा खरिद गरेर काठमाडौं पठाएको थियो । व्यापार कम्पनीले भोलिसम्म खसी–बोका खरिद गरिने जनाएको छ ।