खोज

सुर्खेत, १८ असोज ।

कर्णाली प्रदेशका मुख्यमन्त्री यमलाल कँडेलले साढे ५ महिनाको अवधिमा गरेका कामको विवरण सार्वजनिक गरेका छन् । शुक्रबार मुख्यमन्त्री तथा मन्त्रिपरिषद्को कार्यालयमा गरिएको पत्रकार भेटघाट कार्यक्रममा उनले १९ वटा सम्पादित कार्य सार्वजनिक गरेका हुन् ।

‘प्रदेश सरकार अन्तर्गतका सबै निकायहरुको वार्षिक कार्ययोजना स्वीकृत गराइ कार्ययोजना अनुसार कार्य सञ्चालन गरी समयमै प्रगति हासिल गर्न ९ बुँदे साझा प्रतिबद्धता गरिएको छ’ मुख्यमन्त्री कँडेलले भने, ‘सोही कार्ययोजना अनुसार कार्यसम्पादन भइरहेको छ ।’ कार्ययोजना तथा प्रतिवद्धता अनुसार भौतिक मन्त्रालय र उर्जा मन्त्रालय अन्र्तगत ठेक्का लगाउनुपर्ने ३ सय ५१ मध्ये झण्डै ६० प्रतिशत भन्दा बढी आयोजनाको ठेक्का आह्वान भइसकेको उनले जनाए ।

गतवर्ष कार्तिकमा जाजरकोट केन्द्रविन्दु भइ गएको भूकम्पका कारण क्षति भएका सामुदायिक विद्यालय र सरकारी अस्पतालको मर्मत तथा पूनर्निर्माणका लागि ५० करोड बजेट विनियोजन गरिएको मुख्यमन्त्री कँडेलले जनाए । ‘भुकम्पका कारण क्षतिग्रस्त विद्यालयको पुर्ननिर्माणको लागि छनौट प्रक्रियाको चरण शुरु भएको छ’ उनले भने, ‘यो कार्यक्रमबाट भुकम्पप्रभावित क्षेत्रका ७० वटा भन्दा बढी क्षतिग्रस्त विद्यालय तथा स्वास्थ्यचौकीको चालु आर्थिक वर्षभित्रै पुर्ननिर्माण गर्ने लक्ष्य राखिएको छ ।’

दशै तिहार जस्ता चाडपर्वमा हुन सक्ने सडक दुर्घटनालाई लक्षित गरी सरोकारवाला, यातायात व्यवसायी, प्रदेश प्रहरी लगायतका सुरक्षा निकाय, यातायात व्यवस्था कार्यालय लगायत सरोकारवालाहरूसँग छलफल कार्यक्रम आयोजना गरी सडक सुरक्षाको लागि सामूहिक प्रतिवद्धता गरिएको उनले जनाए ।

चालु आर्थिक वर्षको हालसम्म ४ दशलब ४४ प्रतिशत बजेट खर्च भएको छ । जसमा पूजीगततर्फ १ दशमलब ७१ प्रतिशत खर्च भएको कँडेलले जनाए ।

यस वर्षमा चारवटा महत्वपूर्ण विधेयक प्रदेश सभामा दर्ता भएको मुख्यमन्त्री कडेलले जनाए । लामो समयदेखी छलफलकै क्रमममा रहेको स्थानीय तहको सेवा सम्बन्धी विधयेक यसै चालु आर्थिक वर्षमा पटक पेश भई सभाबाट पारित भएको उनले जनाए ।

त्यसैगरी बजेट कार्यान्वयनको लागि कृषि, बन तथा सामाजिक मन्त्रालयसँग ४ वटा कार्यविधिहरु मन्त्रीपरिषद्ले पारित गरेको छ भने प्रदेश गौरवका आयोजना छनोट र अनुगमन तथा मूल््याङ्कन सम्बन्धी मापदण्डको मस्यौदा तयार गरिएको उनले जनाए ।

प्रदेश र स्थानीयतहबिचको अझ बढी समन्वय गर्ने उद्देश्यले योजना बनाउँदा र कार्यान्वयन गर्दा समन्वयको सुरुवात भएको छ । प्रदेशका निकायलाई स्थनीय तहमा कार्यान्वयन हुने आयोजनाका सम्बन्धमा जानकारी गराउने सहकार्यको संस्कृतिको सुरुवात गरिएको छ । जस अन्तर्गत प्रदेश सरकारबाट स्थानीय तहमा विनियोजन हुने आयोजनाहरुको नाम र बजेटबारे कार्यान्वयन हुनु पूर्व नै सम्बन्धित स्थानीय तहलाई अनिवार्य जानकारी गराउनु पर्ने व्यवस्था मिलाइएको छ ।

कर्णाली प्रदेश प्राप्तीको आन्दोलनका सहिद परिवारका एक÷एकजनालाई रोजगार दिने व्यवस्था मिलाउने गरी मन्त्रीपरिषद्ले पारित गरी कार्यान्वयनको चरणमा रहेको उनले जनाए । त्यसैगरी कर्णाली प्रदेशको दोस्रो पञ्चवर्षीय योजनाको मस्यौदा तयारीको कार्य अन्तिम चरणमा रहेको छ ।

प्रदेशका मन्त्रालयहरुको काम कारवाहीलाई थप प्रभावकारी र व्यवस्थित गर्न तथा कामको प्रकृतिलाई मिलाउने गरी मन्त्रालय तथा कार्यालयहरुको पुर्नसंरचनाको अध्ययन गरी प्रतिवेदन पेश गर्न आर्थिक मामिला तथा योजनामन्त्री राजीव विक्रम शाहको नेतृत्वमा अध्ययन समिति गठन भएको छ ।

यस्तै प्रदेशको एकीकृत प्रशासनिक भवन तथा परिसर निर्माणलाई प्रदेश गौरवको आयोजनाका रूपमा प्रदेश सरकारबाट स्वीकृत गरी कार्य अगाडि बढाइएको छ । राष्ट्रिय खेलकुद प्रतियोगितालाई लक्षित गरी रङ्गशाला वरिपरीको सडक तथा सुर्खेत विमानस्थल नजिकको पक्की नाला निर्माण लगायतको कार्यलाई तीव्रता दिइएको कँडेलले जनाए ।

विवादका कारण अवरुद्ध रहेको चिसापानी —बाबियाचौर —सुर्खेत ३३ केभि प्रसारण लाइनमा सहजीकरण पश्चात वीरेन्द्रनगरस्थित पावर स्टेशनमा जोडिएको छ । यस्तै कोहलपुर सुर्खेत १३२ केभिए प्रसारण लाइनको लागि राष्ट्रिय निकुन्ज तथा वन्यजन्तु आरक्षणमा पर्ने रुख कटानको लागि अनुमतिप्राप्त भई रुख कटान शुरु भएको छ ।

बागमति लगायतका प्रदेशमा हालै गएको बाढी पहिरोबाट प्रभावित क्षेत्रमा राहत तथा उद्धारमा सघाउन प्रदेश सरकारको तर्फबाट प्रधानमन्त्री दैवि प्रकोप उद्धार कोषमा रु ५० लाख जम्मा गर्ने निर्णय भएको छ ।