खोज

बुटवल, १८ असोज ।

श्वास–प्रश्वास तथा फोक्सोका विरामीहरूलाई लक्षित गर्दै बुटवलमा पहिलो ब्रोन्कस्कोपी मेशिनसहितको विशेषज्ञ सेवा सुरु भएको छ । यो सेवा विशेषगरी श्वासप्रश्वाससम्बन्धी समस्या भएका विरामीहरूको रोग निदान र उपचारमा महत्वपूर्ण मानिन्छ । छाति तथा फोक्सोरोग विशेषज्ञ डा प्रशान्त कुवर र कृष्ण पोखरेलले संघर्ष फार्मेसी, बुटवल पल्मो क्लिनिकमार्फत मेशिन सहितको यो सेवा शुभारम्भ गरेका हुन ।

ब्रोन्कस्कोपी प्रविधिबाट फोक्सो र श्वासनलीको आन्तरिक भागको निरीक्षण गर्न सकिने डा. प्रशान्त कुवरले बताए । ‘विभिन्न प्रकारका श्वासप्रश्वाससम्बन्धी रोगहरू, क्यान्सर, संक्रमण वा अन्य समस्याहरूको पहिचान गर्न यसले मद्दत गर्दछ ।’—उनले भने । यो मेशिन बहुउपयोगी भएको भन्दै उनले छातीमा दागहरु जुन छातिको क्यान्सर वा टिबि दुबै हुनसक्छ त्यो पहिचान गर्न सजिलो हुने उनले दाबी गरे । ब्रोन्कस्कोपी मेशिनको प्रयोगले चिकित्सकहरूले श्वासप्रश्वाससम्बन्धी समस्या, क्यान्सर, संक्रमण वा अन्य रोगको पहिचान गर्न बायोप्सीमार्फत टिस्यु नमूना सजिलै प्राप्त गर्न सकिने भएको छ । नमूनाको परीक्षणले रोगको सही पहिचान र उपचार योजना बनाउन महत्त्वपूर्ण भूमिका खेल्ने उनको दाबी छ । स्वासनलीमा अड्किएको बस्तु निकाल्न साथै आईसियुमा रहेका बिरामीको स्वास नलीमा जम्मा हुने कफ समेत हटाउन सकिने उनले बताए ।

एक कार्यक्रमका बिच वरिष्ठ फिजिसियन डा नन्दु पाठक र डा कुवरको छाति तथा फोक्सोरोग विशेषज्ञ डा प्रशान्त कुवरका बुबा धर्म ध्वज कुवरले संयुक्त रुपमा क्लिनिकको उद्घाटन गरे ।

यो सेवा बुटवलमा स्थापित भएपछि अब श्वासप्रश्वासका समस्याहरू भएका विरामीहरूलाई उपचारका लागि राजधानी काठमाडौँ वा अन्य ठूला सहरहरू जानुपर्ने बाध्यता हट्ने डा. नन्दु पाठक बताउछन । स्वास्थ्य सेवामा गुणात्मक सुधार ल्याउदै स्वास्थ्य हब बनाउन मद्यत मिल्ने उनको दाबी छ ।

क्लिनिकका संचालक कृष्ण पोखरेलले रोगको सहि पहिचान नहुदा दुख पाएका बिरामीहरुलाई यो सेवा बरदान साबित हुने बताए । बुटवलमा नै पहिलो निजि लगानीमा छाति तथा फोक्सो उपचार केन्द्र भएको उनले बताए । सामाजिक उत्तरदायित्व अन्तरगत असहाय, जेष्ठ नागरिकलाई निशुल्क सेवा दिन तथा औषधीमा विशेष छुटको ब्यवस्था रहेको उनले बताए ।