खोज

तिलोत्तमा, १८ असोज ।

तिलोत्तमा व्यापार संघले विजयादशमी, दीपावली, छठ एवं नेपाल संवतको अवसरमा शुक्रबार शुभकामना आदानप्रदान कार्यक्रम सम्पन्न गरेको छ । संघको सचिवालयमा आयोजित कार्यक्रममा आन्तरिक राजस्व कार्यालय भैरहवाका नवआगन्तुक प्रमुख प्रेमराज पोखरेललाई स्वागत एवं सम्मान समेत गरिएको थियो ।

कार्यक्रममा बोल्दै तिलोत्तमा नगरपालिकाकी उपप्रमुख जगेश्वरदेवी चौधरीले यहाँको व्यवसाय खुला सीमानाका कारण धरासायी बन्दै गएको बन्दै खुला सीमा नियन्त्रणतर्फ संघीय सरकारले अग्रसरता लिनुपर्ने बताइएकी थिइन् । उनले स्वदेशी बजार फस्टाउन सकेमात्रै मुलुकमा आर्थिक गतिविधि चलायमान हुने भन्दै त्यसका लागि स्थानीय सरकारले आफ्नो क्षेत्राधिकारभित्र रहेर व्यवसायीमैत्री वातावरणको निर्माण गर्ने बताइन् ।

नेपाल चेम्बर अफ कमर्श लुम्बिनी प्रदेश उपाध्यक्ष एवं संघका संस्थापक अध्यक्ष जेपी कंडेलले चाडपर्वहरुको आगमनसँगै मुलुक आर्थिक संकटबाट मुक्त हुने, अर्थतन्त्र चलायमान हुने र व्यवसायीमाथि आइपरेका कठिनाइहरु अन्त्य हुन सकोस् भनी शुभकामना दिए । साथै उनले आगामी दिनमा व्यवसायीहरुको हकहितका साथै सामाजिक क्षेत्रमा समेत तिलोत्तमा व्यापार संघले आफ्ना गतिविधिहरुलाई प्रभावकारी रुपमा अगाडि बढाउनुपर्नेमा जोड दिए ।

कार्यक्रममा बोल्दै आन्तरिक राजस्व कार्यालय भैरहवाका प्रमुख प्रेमराज पोखरेलले अवेध कारोबारलाई राजस्वले कहिल्यै प्रश्रय नदिने भन्दै सही व्यापार व्यवसाय गर्न र कर सम्बन्धी व्यवसायीले भोगेका कठिनाईलाई संबोधन गर्दै राजस्व कार्यालयको ढोका सधै खुला रहेको बताए ।

संघका अध्यक्ष नेत्रप्रसाद न्यौपानेले बिगतमा १०० रुपियाँको सामान ल्याउँदा भन्सार शुल्क तिर्ने व्यवस्था लागू भएपनि अहिले भने त्यो कागजमा मात्रै सीमित भएको भन्दै खुला सीमा नियन्त्रण नगर्ने हो भने यहाँको व्यापार व्यवसायमा अझै ठूलो गिरावट आउने बताए ।
त्यस अवसरमा संघका निवर्तमान अध्यक्ष बाबुलाल भुसाल, उद्योग व्यापार संगठन रुपन्देहीका सचिव गौतमकुमार गुप्ता, तिलोत्तमा उद्योग बाणिज्य संघका अध्यक्ष ज्ञानेन्द्रबहादुर कार्की, इलाका प्रहरी कार्यालय मंगलापुरका प्रहरी निरीक्षक सुनिल थापा नेपाली, संघका कानुनी सल्लाहकार नुमेन्द्र पौडेल, प्रेस सल्लाहकार लक्ष्मण पौडेल, उपाध्यक्ष मानबहादुर बर्मा लगायतले बोल्दै सस्थाले लिएका उद्देश्य, लक्ष्य र कार्ययोजनालाई सार्थक बनाउन आग्रह गरेका थिए ।