खोज

नवलपुर, १७ असोज ।

नवलपरासी पूर्व नवलपुरमा प्रहरीले चाडपर्व लक्षित सुरक्षा योजना तयार पारेको छ । चाडपर्वको समयमा हुन सक्ने चोरी ,लुटपाट अन्य घटना नियन्त्रण गर्न विशेष योजना तयार पारिएको जिल्ला प्रहरी कार्यालय नवलपुरका प्रहरी उपरीक्षक यादव ढकालले बताए ।

प्रहरीले चाडपर्वको समयमा यात्रुबसमा विशेष निगरानी राख्ने भएको छ । जस अनुसार जिल्लाको गैंडाकोट देखि दाउन्ने सम्म यात्रु बसमा सादा पोशाकका प्रहरी परिचालन गरिने प्रहरी उपरीक्षक ढकालको भनाइ छ । बस भित्र हुने सक्ने चोरी, लुटपाट, बढी भाडा लिए नलिएको लगायतको निगरानीका लागि सादा पोशाकका प्रहरी परिचालन गरिने प्रहरी उपरीक्षक ढकालले बताए ।

गैंडाकोटबाट प्रवेश गर्ने बसमा उक्त स्थानबाट सादा पोशाकका प्रहरी बसमा चढ्ने र दाउन्नेतर्फबाट आउने बसमा सोही स्थानबाट प्रहरी बसमा चढेर निगरानी गर्नेछन् । सबै बसमा निगरानी गर्न सम्भव नभएपनि छड्के रुपमा यस क्षेत्रमा चल्ने बसमा प्रहरीले निगरानी गर्ने प्रहरी उपरीक्षक ढकालले बताए।

कुनै शंकास्पद गतिविधि देखिए,यात्रुलाई कुनै असजिलो परे उक्त सूचना नजिकको प्रहरी कार्यालयमा दिने र प्रहरीले आवश्यकता अनुसारको कारवाही गर्ने उनको भनाई रहेको छ । प्रहरीले सार्वजनिक क्षेत्र, यात्रु चढ्ने ,उत्रने मुख्य स्थानहरुमा समेत निगरानी बढाउने उहाँले बताउनुभयो । यात्रु सहायताका लागि जिल्लाका विभिन्न स्थानमा यात्रु सहायता कक्ष समेत निर्माण गरिने उनको भनाई छ ।

यस बाहेक प्रहरीले विभिन्न युनिट निर्माण गरि अन्य क्षेत्रमा गस्ति गर्ने ढकालले बताए। चाडपर्वको समया हुन सक्ने घटना नियन्त्रणका लागि सुरक्षा प्रदान गर्न जिल्ला भर ३ सय ४५ प्रहरी परिचालन हुने प्रहरी उपरीक्षक ढकालले बताए । उनले पत्रकारसँगको भेटघाटमा आफूले जिल्लामा शान्ति सुरक्षा कायम राख्न, प्राकृतिक स्रोतको चोरी नियन्त्रण गर्न, जुवातास लगायतका अवैध गतिविधि नियन्त्रण गर्न लागि पर्ने बताएका छन ।