खोज

बुटवल, १७ असोज ।

बुटवल उपमहानरपालिका वडा नम्बर ९ मा रहेको तेजश्वी बचत तथा ऋण सहकारी संस्थाको १२ औ बार्षिक साधारण सभा सम्पन्न भएको छ । विहिबार बुटवल देवीनगरमा आयोजना गरिएको साधारण सभामा बोल्दै बुटवल उपमहानरपालिका नगर प्रमुख खेजराज पाण्डेयले सहकारीलाई उद्यमशिलता संग जोड्नुपर्ने कुरामा जोड दिएका छन् । उनले बुटवल उपमहनारापलिकासंग अनुमति लिएर सञ्चालनमा आएका सबै सहकारीहरुको व्यवस्थापन, आर्थिक पारदर्शीताको लागि तालिम समेत आयोजना गरिएको जानकारी दिदै सहकारीको नीती, मुल्य मान्यता भन्दा बाहिर जाने जो कोही सहकारी पनि कारवाहीको दायरामा आउने समेत बताए ।

नगर प्रमुख पाण्डेयले सहकारीको उद्देश्य भन्दा बाहिरको कारोबार भएकै कारण कतिपय सहकारीहरु समस्यामा परेको भन्दै उद्देश्य अनुसार काम गर्न समेत सुझाव दिए । उनले भने–‘कृषि सहकारी भनेको छ, बचत तथा ऋणको मात्रै काम गरेकोछ, बहुउद्देश्यले पनि त्यही हालत छ, त्यसो हुनु भएन, बचत तथा ऋणले बचत ऋणको काम गर्न पाउँछ, अन्य सबै नीति अनुसार जान जरुरी छ ।’

कार्यक्रममा सहकारीका संंस्थापक अध्यक्ष तथा सल्लाहकार रुपन्देही बचत तथा ऋण सहकारी संघका अध्यक्ष भोज बहादुर बुढाथोकीले सहकारीमा सहकारिता आवश्यक हुनुपर्नेमा जोड दिए । उनले सहकारीले लिने र दिने मात्रै काम भन्दा पनि लगानी योग्य पुँजी निर्माण गर्नुपर्नेमा जोड दिएका थिए । उनले भने–‘अहिले लगानी थुप्रिएको छ, भनिन्छ तर लगानी केमा गर्ने, उत्पादनशिल क्षेत्रमा लगानी आवश्यक छ, त्यसो भएमा मात्रै सहकारीले सहकारिताको विकास गर्छ ।’

कार्यक्रममा सहकारीका सल्लाहकार महेन्द्र नारायण श्रेष्ठ, शेयर सदस्य दिपक पन्थी लगायतले आआफ्नो भनाई राखेका थिए । कार्यक्रममा संस्थाका अध्यक्ष दुर्गा पौडेलले अध्यक्षको प्रतिवेदन प्रस्तु गर्दै सहकारीमा हाल ६६९ जना सदस्यहरु रहेको जानकारी दिदै आगामी दिनमा थप गरी १ हजार बनाउने योजना रहेको बताएका थिए । यस्तै सहकारी को कुल पुँजी वृद्धि गरी लगानी समेत बृद्धि गर्ने योजना रहेको जनाएका थिए । कार्यक्रममा लेखा समितिका प्रतिवेदन सुझाव सहित संयोजक कृष्ण प्रसाद पाण्डेले प्रस्तुत गरेका थिए भने आर्थिक प्रतिवेदन कोषाध्यक्ष निर्दोष पन्थीले प्रस्तुत गरेका थिए । सो कार्यक्रममा जेष्ठ शेयर सदस्य, उत्कृष्ट ऋणी, एईई परिक्षामा उत्कृष्ठ नतिजा ल्याउने शेयर सदस्यका सन्ताललाई सम्मान गरिएको सहकारीका अध्यक्ष दुर्गा पौडेलले जानकारी दिए ।