खोज

बुटवल, १५ असोज । आठौंं रुपन्देही जिल्लास्तरिय मेयरकप स्नुकर प्रतियोगिताको उपाधि भैरहवाका शिशिर गुरुङले आफनो नाम गरेका छन् । रुपन्देही पुल तथा स्नुकर संघको आयोजना तथा सिद्धार्थनगर नगरपालिकाको सहयोगमा भैरहवास्थित क्रेजि क्यु क्लब हाउसमा मंगलबार भएको फाइनलमा बुटवलका संजय कार्कीलाई ५–२ को सेटमा पराजित गर्दै गुरुङ च्याम्पियन बने । उपाधिसंगै उनले नगद ६१ हजार रुपैया, कप, मेडल, प्रमाणपत्रबाट पुरस्कृत भए । उपविजेता कार्की भने नगद २५ हजार रुपैया, कप, मेडल र प्रमाणपत्रमा चित्त बुझाए । प्रतियोगितामा ५१ को ब्रेक गरेका सुजन पुन मगर सर्वाधिक ब्रेकर घोषित हुदै नगद १० हजार रुपैया र प्रमोद थैव उदयमान खेलाडी घोषित हुदै नगद ५ हजार र प्रमाणपत्रबाट पुरस्कृत भए ।

एक समारोहका बिच विजेता, उपविजेता तथा उत्कृष्ट खेलाडीहरुलाई सिद्धार्थनगर नगरपालिकाका नगरप्रमुख इस्तियाक अहमद खाँ, वडा नम्बर १३ का अध्यक्ष सोम गुरुङ, बुटवल उपमहानगरपालिकाका प्रवक्ता शिव राना, संघका संस्थापक अध्यक्ष भुपेन्द्र क्षेत्री, खेलकुद संघका निवर्तमान कोषाध्यक्ष कोशिष खड्का, रुपन्देही पुल तथा स्नुकर संघका अध्यक्ष सुजन पुनले पुरस्कार वितरण गरे ।

कार्यक्रममा नगरप्रमुख खाँले स्नुकर खेल एउटा बौद्धिक खेल भएको बताए । शारीरिकसंगै मानसिक रुपमा समेत धेरै मेहनत हुने यो खेलबाट अन्तराष्ट्रिय पहिचान दिलाउने खेलाडीहरु रुपन्देहीमा उत्पादन हुनु गर्वको विषय भएको बताए । स्थानिय पालिका खेलकुद विकासमा सधै सकारात्मक रहेको भन्दै आगामी दिनमा सहयोग गर्ने उनले प्रतिवद्धता जनाए ।

कार्यक्रममा रुपन्देही पुल तथा स्नुकर संघका अध्यक्ष सुजन पुनले यो खेल अनुशासित र सभ्य खेलका रुपमा रहेको भन्दै खेलप्रतिको दृष्टिकोण परिवर्तनमा धेरै समय लागेको बताए । विश्वमा नै पुरानो र प्रतिष्ठित खेल भए पनि नेपालमा भने अझै ओझेलमा परेको भन्दै उनले राष्ट्रिय खेलमा यो समावेश हुनुपर्ने बताए ।

प्रतियोगिता आयोजना अवधिमा खेल समाचारमार्फत योगदान दिएका दैनिक लुम्बिनीका संवाददाता मोहम्मद हबिब र खबरपात्रोका दिपक घिमिरेलाई नगद सहित सम्मान गरिएको थियो । प्रतियोगितामा सहयोगी, निर्णायक, वरिष्ठ खेलाडी, फरक क्षमताका खेलाडीलाई समेत सम्मान गरिएको संघका अध्यक्ष सुजन पुनले बताए । यसअघि सात संस्करण बुटवलमा भएकोमा पहिलोपल्ट भैरहवामा आयोजित गरिएको उनले बताए । प्रतियोगितामा १२८ जना खेलाडी सहभागी रहेको प्रतियागिता संयोजक एवं संघका सल्लाहकार विजय थापाले बताए ।