खोज

सुर्खेत, १४ असोज ।

कर्णाली प्रदेश सरकारले प्रादेशिक सडकको गुरुयोजना निर्माणको काम अघि बढाएको छ । चालु आव २०८१÷८२ को नीति तथा कार्यक्रम र बजेटमा समेटेर योजना कार्यान्वयन गर्न लागिएको प्रदेश सरकारले जनाएको छ । सडक निर्माणको काम व्यवस्थित बनाउने उद्देश्यले गुरुयोजना निर्माणको काम अघि बढाइएको हो । हालसम्म गुरुयोजनाको खाका तयार गरिएको र स्वीकृत हुन बाँकी रहेको भौतिक पूर्वाधार तथा शहरी विकास मन्त्रालयका प्रवक्ता रमेश सुवेदीले जानकारी दिए । विकासका पूर्वाधारलाई दिगो, भरपर्दो र सुरक्षित बनाउन पहिचान भएका प्रदेश लोकमार्ग तथा मार्गको प्राथमिकीकरणसहित प्रादेशिक सडक गुरुयोजना निर्माण गर्न लागिएको मन्त्रालयले जनाएको छ ।

प्रादेशिक सडक गुरुयोजनाबिना सडक निर्माण गर्दा बजेट छरिने र लगानी अनुसारको प्रतिफल नहुने भएपछि प्रदेश सरकारले प्रादेशिक सडक गुरुयोजना निर्माण गर्न लागेको हो । यस आर्थिक वर्षबाट सरकारले बजेट विनियोजन गरेर योजना अघि सारेको हो । गतवर्ष सामान्य गुरुयोजनाको खाका निर्माण भएको थियो । अहिले त्यसैलाई परिमार्जन गरेर अघि बढाइएको मन्त्रालयका प्रवक्ता सुवेदीले जानकारी दिए । ‘गुरुयोजनाको काम हामीले अघिल्ला वर्षबाट हो सुरु गरेको तर, बेला—बेलामा हुने सरकारको परिवर्तनले यसको निर्माणको लागि प्रभाव परेको थियो’ उनले भने, ‘अघिल्लो वर्ष गुरुयोजना तयार गरेर योजना आयोगमा बुझाएका थियौ तर, सरकार परिवर्तन भए लगत्तै आयोग पदाधिकारी विहीन भएपछि काम अगाडि बढ्न सकेको थिएन ।’

गुरुयोजना तयार गर्न चालु आवमा २५ लाख रुपियाँ बजेट विनियोजन गरिएको मन्त्रालयले जनाएको छ । अहिलेसम्म उक्त रकम भने खर्च नभएको सुवेदीले जनाए ।

सुवेदीका अनुसार सडक व्यवस्थित गर्न गुरुयोजना निर्माणको योजना अघि सारिएको छ । प्रादेशिक सडकको गुरुयोजना बनाएपछि सडक पूर्वाधार निर्माण तथा मर्मत सम्भारका लागि प्रदेशको प्राथमिकता तय हुने उनले बताए । सडक निर्माण, मर्मत, सुधार, स्तरोन्नति तथा यातायात पहुँचको अवस्था र पुनर्निर्माण गर्नुपर्ने सडकको माग सङ्कलन, सडक यातायातसँग सम्बन्धित आवश्यक सेवा तथा सुविधाका लागि गुरुयोजनाले सहयोग पुग्ने प्रवक्ता सुवेदीले जानकारी दिए ।