खोज

प्युठान, ११ असोज ।
सरुमारानी गाउँपालिकाले सञ्चालन गरेको ‘छोरी पेवा बचत कार्यक्रम’ गाउँपालिकाका ७ सय ४७ छोरी सहभागी भएका छन् । छोरा र छोरीमा गरिने लैङ्गिक विभेद हटाउने उद्देश्यले आर्थिक वर्ष २०७५÷०७६ देखि शुरु गरिएको थियो । पालिकाका सवै छोरीलाई शिक्षामा पहुँच पु¥याउँदै विभेद कम गर्न कार्यक्रम सञ्चालन गरेको हो ।

गाउँपालिकाका अध्यक्ष झग बहादुर बिश्वकर्माले छोरीमा हेर्ने दृष्ट्रिकोणमा परिवर्तन ल्याउन ल्याइएको कार्यक्रम प्रभावकारीसंगै लोकप्रिय भएको बताए । ‘बालबिबाह हटाउन, छोरी प्रति हेरिने दृष्ट्रिकोणमा परिवर्तन गर्न कार्यक्रम ल्याएका हौं’ बिश्वकर्माले भने,‘सोचेँ भन्दा प्रभावकारी तथा लोकप्रिय बनेको विश्वास छ ।’ कार्यक्रमले छोरीको बचतमा पहुँच, छोरीलाई औषधि उपचार, पठनपाठनमा राहत मिलेको पाएको उनको धारणा छ । २०७६ साल पछि जन्म भएका छोरीको नाममा पालिकाभित्रका दुईवटा सहकारीमा रकम जम्मा गरिदिने गरेको छ । ऐरावती बहुउद्देश्यीय साना किसान सहकारी संस्था बड्डाँडा र साना किसान कृषि सहकारी संस्था बांगेशालसँग सहकार्य गरि रकम जम्मा गरिदिने गरेको छ ।

कार्यक्रममा हालसम्म ७ सय ४७ जना छोरीहरू लाभान्वित भएका छन् । आर्थिक वर्ष २०८०/०८१ मा ९३ जना छोरीहरू थपिएको प्रशासन शाखा प्रमुख भावना सिंहले जानकारी दिइन् । आ.व. २०७५/०७६ मा ७८ जनालाई १ सय रूपैया प्रतिमहिना दिने गरी सुरु भएको कार्यक्रममा हाल ५ सय रूपैया प्रतिमहिना दिने गरिएको छ । मासिक १ सय रूपैंया वचतबाट शूरु भएको कार्यक्रम दोश्रो वर्षमा २ सय हुँदै पाँचौ वर्षमा ५ सय रूपैंया रकम गाउँपालिकाले खातामा जम्मा गर्ने गरेको सिंहले बताइन् ।

प्रत्येक वर्ष १०० रूपैंयाका दरले बढाउँदै १० वर्षसम्म पालिकाले छोरीको नाममा रकम जम्मा गरिदिने छ । अभिभावकले त्यसलाई थप गर्दै थप १० वर्ष रकम जम्मा गरिदिने छन् । छोरीहरू २० वर्षपुगेपछि उक्त रकम निकाल्न मिल्नेछ । कार्यक्रम कार्यान्वयनका लागि पालिकाले कार्यविधी समेत बनाएको छ ।
कार्यक्रम लागु भएपछि अभिभावक समेत खुशी भएका छन् । पालिकाले शुरु गरेको वचतमा अभिभावकहरूले पनि रकम थप गरी बचत गर्ने अभ्यास गरेको सरुमारानी गाउँपालिका–४ सोमैटोल की मिना कुमारी सोमैमगरले बताइन् । उनका एक छोरा र एक छोरी छन् । गाउँपालिकाले कार्यक्रम ल्याएपछि छोरी बचतको पहुँचमा आएकी छन् भने छोरा छैनन् । कार्यक्रमले गर्दा छोरीलाई सहकारीमा बचत गर्ने वातावरण बनेको उनले सुनाइन । ‘पहिले बाल बचत गर्नुपर्दछ भन्ने नै लागेको थिएन’ मिनाले भनिन्,‘अहिले छोरीको नियमित वचत समेत गरिदिएकी छु ।’