खोज

बुटवल, ०६ असोज ।
बुटवल रामनगरकी झबिमाया थापाको जीवनशैलीमा परिवर्तन ल्याउने एक महत्वपूर्ण कदम लायन्स क्लब अफ बुटवल सयपत्रीले सिपमूलक तालिम आयोजना गरेर गरेको छ । अब झबिमाया बिहानका समयहरूमा घरको काम सकेपछि धूप बनाउन थाल्छिन्, जुन उनले क्लबले दिएको तालिमबाट सिकेकी हुन् । धूप बनाउनका लागि मैले नेपाली कागज र बजारबाट कच्चा पदार्थ ल्याउँछु । घरमा पूजा गर्दा धूपको प्रयोग हुन्छ भने यसलाई बजारमा बेचेर थोरै भए पनि आम्दानी गर्न सकिन्छ, उनले बताइन् ।

हरिकला ज्ञवाली पनि तालिममा सहभागी भएकी एक प्रतिभागी हुन् । उनले तालिमले दिएको सिपलाई व्यवसायमा बदल्ने सोच बनाएकी छ । ‘अब हामी बाटेको धूप उद्योग नै खोल्ने योजना बनाएका छौँ,’ उनले विश्वासका साथ भनिन् ।
यस्ता तालिमहरूले महिलाहरूलाई आर्थिक रूपमा सक्षम बनाउन सघाएको छ । घरेलु सामग्रीहरूको प्रयोग गरेर उत्पादन गरिएको धूप वातावरणमैत्री मात्र होइन, आर्थिक सम्भावनाले भरिपूर्ण छ । यसले महिलाहरूको दैनिक जीवनमा परिवर्तन ल्याउने कार्य गर्दैछ र उनीहरूलाई आत्मनिर्भर बनाउन मद्दत पुर्याएको छ । धूपको बजारिकरणमा समेत तालिमले सहयोगी भूमिका निर्वाह गर्ने आशा गरिएको छ ।

लायन्स क्लब बुटवल सयपत्रिका अध्यक्ष कमला बस्नेत कुँवरले धूप बनाउने तालिमको समापन समारोहमा भनिन्,–‘यस्ता सिपमूलक तालिमले महिलाहरूको जीवनमा सकारात्मक प्रभाव पारेको छ । साना उत्पादनहरूबाट आम्दानी गर्न सकिन्छ र स्वरोजगारको अवसर पनि प्राप्त हुन्छ ।’ उनले आफ्नो कार्यकालमा करीब ३०० जना महिलालाई यो तालिम प्रदान गर्ने योजना बनाएकी छन् । प्रशिक्षक सबिना श्रेष्ठले तालिमको प्रभावकारिताबारे कुरा गर्दै भनिन्,–‘महिलाहरूमा यस्ता तालिमप्रति ठूलो रुचि देखिएको छ । भाग लिएका महिलाहरूले आफ्नै व्यवसाय सञ्चालन गर्ने योजना बनाएका छन् । यो धेरै उत्साहजनक छ ।’
अधिकारकर्मी र सरोकारवालाहरूले महिलाहरूको सशक्तिकरणको लागि यस्ता साना तर महŒवपूर्ण कदमहरू चाल्नुपर्नेमा जोड दिएका छन् । भाषणभन्दा पनि यस्ता तालिमहरूले वास्तविक परिवर्तन ल्याउन सक्छन् । धूप बनाउने ३ दिने तालिममा करिब ३ दर्जन महिलाहरू सहभागी भएका थिए । लायन्स क्लब अफ बुटवल सयपत्रीले बुटवल उपमहानगरपालिका १० को दुर्गा टोल विकास संस्थाको सहयोगमा सञ्चालन गरेको हो ।