खोज

कपिलवस्तु, ०६असोज ।
कपिलवस्तुको राजा शुद्धोधनको राजप्रसाद बुद्धस्थल तिलौराकोट देखि बुद्ध जन्मस्थल लुम्बिनी सम्म बोधीबृक्ष कोरिडोर निर्माण पैदल पदयात्रा थालिएको छ । पीपल, नीम, तुलसी अभियान पटना भारत र जनकपुरधाम वन प्राबिधिक समाज जनकुपुरधामको संयुक्त आयोजना तथा तिलौराकोट साझेदारी वन उपभोक्ता समुहको संयोजनमा यात्रा थालिएको हो । बोधिबृक्ष कोरिडोर निर्माण सहयात्रा नाम दिईको सो यात्रामा नेपाल वन प्राबिधिक संघले समेत समन्वयकारी भुमिका खेलेको छ । अध्यात्मिक र धार्मिक महत्व संगसंगै मानव स्वास्थ्यका लागि बहुपयोगी पीपल, नीम र तुलसीको फाईदाबारे सचेतना गर्दै रुख रोप्दै शनिबार पैदल पदयात्रा सुरु गरिएको जनार्ईको छ । यो यात्रा दुई दिनमा तिलौराकोट देखी २८ किलोमिटर पदयात्रा गर्दै लुम्बिनी पुगेर सकिने छ । पदयात्राका क्रममा बाटोमा पर्ने विद्यालय, स्वास्थ्य संस्था, सामाजिक संस्था र कार्यालय परिसर र हातामा पीपल, नीम र तुलसीका रुख रोप्दै पदयात्रा अघि बढने छ । पहिलो दिन पदयात्रा कपिलवस्तुको पकडीमा बास बस्ने छ । पीपल, नीम तुलसी अभियान पटना भारतका डा. धमेन्द्रकुमारको नेतृत्वमा रहेको पदयत्रामा भारतका बिहार, उत्तरप्रदेश, उत्तराखण्ड, हरियाणा, उडिसा र हिमान्चल प्रदेशका १५ जना सहभागी छन् ।

पहिलो चरणमा भारतको बोधगया देखी राजगिर सम्म पिपल सहितका बृक्ष रोपिएको यो दोस्रो चरणको कार्यक्रम भएको जनकपुरधाम वन प्राविधिक समाजका महासचिव शुरेस शर्माले जानकारी दिए । शान्ति प्राप्तीमा बृक्षको भुमिका पुष्ट्याइँ गर्न यात्रा शुरु गरिएको शर्माले जानकारी दिए । कार्यक्रमको शुभारम्भ प्रमुख जिल्ला अधिकारी विश्वप्रकाश अर्यालले कपिलवस्तु संग्रहालयमा पिपलको रुख रोपेर गरेका थिए । पीपलको महत्व धार्मिक दृष्टिले मात्रै नभएर ज्योतिष, आयुर्वेद एवं वैज्ञानिक दृष्टिले समेत महत्वपूर्ण मानिन्छ । त्यस्तै आयुर्वेदिक गुणले भरिपूर्ण नीम स्वास्थ्यवर्धक जडिबुटी हो । नीमको रुखका हरेक भाग औषधिका रूपमा आयुर्वेद विज्ञानमा प्रयोग गरिन्छ । यसको बोक्रा, जरा, पात आदिबाट औषधि बनाइन्छ । त्यस्तै तुलसीको पनि धार्मिक अनि सास्कृतिक मात्र नभई स्वास्थका दृष्टिलेपनि उपयोगी मानिन्छ । बुद्धले बृक्ष मुनी नै ज्ञानको खोजी गर्नुका साथै शान्ति र आनन्द पाएकाले अध्यात्ममा बृक्षको भुमिका महत्वपूर्ण रहेको नेपाल वन प्राबिधिक संघका केन्द्रिय अध्यक्ष राकेश कुमार कर्णले बताए । अधात्ममा बृक्षको भुमिका दर्शाउन तथा बृक्षारोपणको महत्व बृद्धि गर्न बोधिबृक्ष कोरिडोर निर्माण सहयात्रामा समन्वयकारी भुमिका खेलेको तिलौराकोट साझेदारी वन उपभोक्ता समुहका अध्यक्ष जय प्रकाश पाण्डेयले बताए । पदयात्राको कार्यक्रममा पुर्वमन्त्री तथा भारतकना लागी पुर्व नेपाली राजदुत दिप कुमार उपाध्याय, पुर्वमन्त्री दान बहादुर चौधरी, प्रदेशसभा सदस्य सुधाकर पाण्डेय लगायतको सहभागीता रहेको थियो । अन्तरराष्ट्रिस्तरमा भारतले कपिलवस्तु भारतमा रहेको बिभिन्न दावी गर्दै गरेका बेला भारतिय पर्यावरणबिदको सहभागितामा राजा शुद्धोधनको राजधानी तिलौराकोट देखी बुद्ध जन्मस्थल लुम्बिनी सम्म गर्न थालिएको बोधिबृक्ष कोरिडोर निर्माण सहयात्रा महत्वपुर्ण हुने देखिएको छ ।