खोज

नवलपरासीको सुनवल नगरपालिकामा पशु सेवाका लागि पशु सेवा केन्द्रको भवन निर्माण कार्य सम्पन्न भएको दुई बर्ष बितिसक्दा पनि सञ्चालनमा ल्याउन सकेको छैन् । नगरपालिकाको नेतृत्व केन्द्र संचालनप्रति उदासिन देखिएको छ । साविक स्वाठी गाविसमा रहेको उक्त केन्द्र संचालनमा नआउनु नगरपालिकाको नेतृत्वको उपेक्षा हो । तत्कालिन नगरप्रमुख भिम बहादुर थापाको पहल र वार्डका वार्ड अध्यक्ष राजेन्द्र यादवको सक्रियतामा पशु सेवा केन्द्रको पूर्वाधार निर्माण भएको थियो । चिकित्सकको आवास सहितको केन्द्रिय योजना अनुसार केन्द्रको पुर्वाधार निर्माण गरिएको थियो । तर अहिलेको नगरको नेतृत्व सेवा केन्द्र संचालनप्रति चासो राखेको देखिदैन । स्थानीयको आरोप पनि अहिलेकै नेतृत्वप्रति चासो नभएको भन्ने छ । नगरपालिका भए पनि साविक स्वाठी अधिकाँस कृषकहरूको बसोबास भएको वार्ड हो । ति वार्डका बासिन्दाहरूको जनजिवन पशुपालन र कृषिमा नै जोडिएका छन् ।

नगरपालिकामा पशु सेवा शाखा छ पशु सेवा शाखा सहित यहिँ केन्द्रमा राखेर पनि सञ्चालन गर्न सकिन्छ तर नगरपालिका यो काम गर्न चाहिरहेको छैन् । पुर्वाधार पूरा नभएको बाहना गर्न पनि नगरपालिकासँग छैन् । संघिय सरकारले पुर्वाधार समेत निर्माण गरिदिएको छ,तर नगरपालिका नेतृत्व यो पशु सेवा केन्द्र सञ्चालन गर्न चाहदैन । यसबारे वार्ड अध्यक्षलाई पटक पटक स्थानियले पहल गर्न आग्रह गर्दै आएका समेत छन् ।

वार्ड अध्यक्षले पनि केन्द्र सञ्चालनका लागि पटक पटक नगर कार्यपालिकामा कुरा उठाउदै आएको तर नेतृत्वबाट उपेक्षा भई रहेको स्वीकार गरेका छन् । नेपाल सरकार कुषि तथा पशुपंक्षी विकास मन्त्रालय अन्तरगत नेपाल लाइभस्टक सेक्टर इनोभेसन आयोजनाले डेढ करोड बढि लगानीमा सेवा केन्द्र सञ्चालनका लागि भवन निर्माण गरिएको हो । कुल १ करोड ५१ लाख ३ हजार २ सय ४८ रुपियाँ लागतमा सम्पन्न संरचना प्रयोग आउनमा ढिलाइ हुनुहुन्न । अहिले अगामी आर्थिक बर्षका लागि योजनाहरू बनिरहेको हुदा योजनामा समावेश गराउन सकिने भएपनि त्यो काममा कसैको पहल हुन सकेको छैन् । पशु सेवा केन्द्रमा सञ्चालनका लागि के कति आवश्यक जनशक्ति र सञ्चालन खर्च लाग्ने हो,त्यसबारे पशु सेवा शाखाले बनाएको छैन् ।

नगरपालिका भित्र अन्य पशुपंक्षि उपचारका लागि सेवा केन्द्र छैन् । पशु विरामी परे जिल्ला सदरमुकाम परासी स्थित पशु अस्पतालमा सेवा लिन जानुपर्ने बाध्यता पशुपालक किसानलाई छ । पशु सेवा केन्द्र सञ्चालनमा ल्याउन सकिए सदरमुकाम धाउनुपर्ने बाध्यता हटछ । अर्कोतर्फ किसानले गाउँमै सेवा पनि पाउन सक्छन् । स्थानीय सरकारको हैसियतले सुनवल नगरपालिकाले संचालनको लागि पहल गर्न जरुरी छ । स्थानीय किसानलाई सेवा दिने र बनिसकेको भौतिक संरचनाको सदुपयोग गर्नु स्थानीय सरकारको दायित्व पनि हो । यसतर्फ सुनवल नगरपालिकाको ध्यान पुगोस् ।