खोज

लमही ,४ असोज ।

दाङका वरिष्ठ पत्रकार नारायणप्रसाद शर्माको नेतृत्वमा सुरू गरिएको नेपाललाई शान्ति क्षेत्रुअभियानले हालै राष्ट्रिय स्तरमा महत्वपूर्ण चर्चा पाएको छ। अभियानले राजनीतिक दलका प्रमुख नेताहरूसँग सहमति कायम गर्न सफल भएको छ, जसको कारण आगामी दिनमा शान्ति र राष्ट्रिय स्वाधीनता कायम गर्न महत्वपूर्ण भूमिका खेल्ने विश्वास व्यक्त गरेका छन्।

शर्माका अनुसार, अभियानले हाल सघीय राजधानी काठमाडौमा उच्चस्तरीय नेतासँग संवाद गर्दै अभियानका उद्देश्य र महत्वको बारेमा जानकारी गराइरहेको छ। उनले प्रधानमन्त्री र विपक्षी दलका नेतासमक्ष ज्ञापनपत्र पनि बुझाएको जानकारी दिएका छन्। पूर्वप्रधानमन्त्री पुष्पकमल दाहाल प्रचण्डुले अभियानको महत्वको पुष्टि गर्दै विश्व स्तरमा भइरहेको राजनीतिको चपेटाबाट नेपाललाई जोगाउन आवश्यकता रहेको औँल्याए।

प्रचण्डले भने, शान्ति क्षेत्रको प्रस्ताव अब देश बचाउने महत्वपूर्ण एजेण्डा बन्न सक्छ। उनले पञ्चायतकालमा यस विषयमा भएको बहसको तुलना गर्दै अबको राजनीतिक परिस्थितिमा शान्ति क्षेत्रको घोषणाको महत्व बढेको बताए।

अभियानको उपाध्यक्ष दोर्जी छिरिङ शेर्पाले प्रधानमन्त्री केपी शर्मा ओलीलाई ज्ञापनपत्र बुझाउँदै संयुक्त राष्ट्रसंघको महासभामा यस विषयमा आवाज उठाउन आग्रह गरेका छन्। दाङबाट शुरू भएको यो अभियानले लुम्बिनी र काठमाडौंमा विचार गोष्ठीहरु आयोजना गरिसकेको छ।

शान्ति क्षेत्र अभियानको समर्थनमा दाहालले लुम्बिनीलाई विश्व शान्तिको केन्द्रका रूपमा अघि सार्न आवश्यक रहेको बताउँदै यसमा जनस्तरबाट बहस थालिनु सकारात्मक भएको बताएका छन्।

अभियानको अध्यक्ष शर्मा र प्रचण्डले आगामी केन्द्रीय समिति बैठकमा यस विषयमा छलफल गरिने र प्रस्ताव ल्याइने संकेत दिएका छन्। यस अभियानले नेपाली समाजमा शान्ति र एकताको महत्त्वलाई पुनः उजागर गर्ने आशा गरिएको छ।