खोज

सुर्खेत, ३ असोज ।

लोपोन्मुख राउटे समुदायका एक युवाको बुधबार राति ज्यान गएको छ । मृत्यु हुनेमा २२ वर्षीय वृषबहादुर शाही रहेका छन् । शाहीलाई उपचारपछि बसोबास स्थानमा फर्कने क्रममा बाटोमा ज्यान गएको हो ।

शाहीलाई भदौ ३१ गते उपचारको लागि प्रदेश अस्पताल लगिएको थियो । उपचार हुन नसकेपछि अहिले राउटे बसोबास गरेको स्थान गुराँस गाउँपालिका–१, सिमेलसाल फर्कँदै गर्दा बुधवार राति ९ बजे मृत्यु भएको राउटे परियोजनाका शिक्षक दुर्गा विसीले जानकारी दिइन् ।

विसीका अनुसार मृतक युवा ६ महिनादेखि बिरामी थिए । बिरामी राउटे युवक उपचारका लागि अस्पताल जान मानेका थिएनन् । उपचार गर्न अस्पताल जान नमान्ने राउटे समुदायलाई सम्झाई बुझाई गर्दा बल्ल भदौ ३१ मा उपचार गर्न सहमति जनाएका थिए । ‘६ महिना अघि देखि नै बिरामी युवकलाई उपचार गर्न लैजाउ भन्दा राउटेहरुले मानेनन्, हामीलाई त उसको लक्षण हेर्दा क्षयरोग हो की जस्तो लागेको भएर खकार देउ हामी परिक्षण गर्छाै भन्दा नि दिएनन्’ विसीले भनिन्, ‘अहिले अन्तिम अवस्थामा मात्र उपचार गर्न राजी भएका थिए तर, बचाउन सकिएन ।’

राउटे युवक शाहीलाई प्रदेश अस्पताल सुर्खेत ल्याइएको थियो । खकार चेक गर्दा क्षयरोग रोग देखियो । उपचारमा संलग्न चिकित्सकले सरुवा टिबी भएको जानकारी दिए ।

उनी राउटे समुदायभित्र पर्ने कल्याल जातीका मुखिया वीरबहादुर शाहीका साइँला सन्तान हुन् । यसअघि मृतकका दाजु कपिल शाहीको ६ वर्षअघि मृत्यु भएको थियो । वृषबहादुरको मृत्यु भएसँगै अब राउटेको जनसख्या घटेर १३४ मा झरेको छ । २०७५ असारदेखि यता यो समुदायमा ४३ जनाको मृत्यु भएको छ ।