खोज

बुटवल, २९ भदौ ।

लायन्स क्लब अफ बुटवल सयपत्रीले अन्तर्राष्ट्रिय बाल दिवसको अवसरमा रुपन्देही जिल्लाको तिलोत्तमा नगरपालिकास्थित कोटिहवामा रहेको अविनास अनाथ आश्रममा रहेका बालबालिकालाई विशेष सहयोग प्रदान गरेको छ। यो कार्यक्रम लायन्स क्लबको अन्तर्राष्ट्रिय ग्लोबल क्जको ह्युमन रिलिफ अन्तर्गत आयोजना गरिएको थियो, जसले समाजका कम भाग्यशाली बालबालिकाहरूलाई सहयोग पुर्याउन र उनीहरूको जीवनस्तरमा सुधार ल्याउन केन्द्रित छ।

कार्यक्रममा अनाथ बालबालिकाहरूलाई पौष्टिक आहार वितरण गर्दै खेलकुद सामग्री प्रदान गरिएको थियो। साथै, आश्रममा खाना खुवाउने कार्यक्रम पनि सम्पन्न भयो। लायन्स क्लब बुटवल सयपत्रीले आफ्नो सामाजिक उत्तरदायित्व अन्तर्गत यो सहयोग कार्यक्रम आयोजना गरेको हो। क्लबकी अध्यक्ष लायन कमला बस्नेत कुंवरले बालबालिकाको स्वास्थ्य, खुशी, र समग्र विकासमा योगदान पुर्याउनु क्लबको मुख्य उद्देश्य रहेको बताईन। उनका अनुसार, विभिन्न कारणले अभिभावक गुमाएका बालबालिकाहरूलाई शारीरिक र मानसिक रुपमा सबल बनाउन खेलकुद सामग्री वितरणले सहयोग गर्नेछ। साथै, पौष्टिक आहारले उनीहरूको स्वास्थ्य सुदृढ गर्न महत्वपूर्ण भूमिका खेल्नेछ।

अध्यक्ष कुंवरले बाल दिवसको अवसरमा बालबालिकालाई विशेष महत्व दिएर यो कार्यक्रम आयोजना गरिएको बताईन । “बालबालिकाको खुशी र स्वास्थ्यमा ध्यान पुर्याउनु भनेको उनीहरूको भविष्यमा सकारात्मक प्रभाव पार्नु हो,” उनले भनिन । यसले बालबालिकाको आत्मबल उच्च राख्न र उनीहरूमा सकारात्मक सोच विकास गर्न मद्दत पुर्याउने उनको भनाइ थियो।

सिनियर डिष्टिक एडभाइजर लायन प्रतिभा श्रेष्ठले पनि कार्यक्रममा आफ्नो विचार राख्दै लायन्स क्लब बुटवल सयपत्रीले अन्तर्राष्ट्रिय बाल दिवसको अवसरमा अनाथ बालबालिकालाई सहयोग गर्नु एउटा महान कार्य भएको बताईन। “यो कार्यक्रम लायन्सको अन्तर्राष्ट्रिय ह्युमन रिलिफ अभियानको एक महत्वपूर्ण हिस्सा हो। समाजमा कम भाग्यशालीलाई सहयोग गर्दै लायन्स क्लबले समाजमा सेवा र समान अवसरको भावना प्रवर्द्धन गरिरहेको छ,” उनले भनिन। साथै, उनले लायन्स क्लबले महिनामा एक पटक अनिवार्य रूपमा कुनै न कुनै आश्रममा गएर खाना खुवाउने कार्यक्रम गर्दै आइरहेको समेत उल्लेख गरीन ।
कार्यक्रममा सिनियर डिष्टिक एडभाइजर लायन सागरराज श्रेष्ठ, सिनियर डिष्टिक एडभाइजर लायन सविना श्रेष्ठ, एओजी लायन कल्पना सिवाकोटी एमजेएफ, र अविनास आश्रमका संरक्षक कृष्ण ज्ञवालीलगायतले पनि आफ्नो धारणा व्यक्त गरे। सबैले लायन्स क्लबको सामाजिक सेवा र समाजप्रति उत्तरदायित्वको भावना प्रति प्रशंसा व्यक्त गरे।

अविनास अनाथ आश्रमका संरक्षक कृष्ण ज्ञवालीले लायन्स क्लब बुटवल सयपत्रीलाई आश्रममा रहेका बालबालिकाहरूलाई सहयोग पुर्याएकोमा धन्यवाद ज्ञापन गर्दै यसरी बालबालिकाहरूको जीवनमा सहयोग पुर्याउनु अत्यन्त महत्वपूर्ण रहेको बताए। उनले बालबालिकाको शारीरिक र मानसिक स्वास्थ्यको ख्याल राख्दै गरिएको यो कार्यक्रमले उनीहरूको भविष्य निर्माणमा सहयोग गर्ने आशा व्यक्त गरे ।

कार्यक्रमका संयोजक सुनिता बन्जाडे घिमिरेले सहभागीहरूलाई धन्यवाद ज्ञापन गरेकी थिईन भने कार्यक्रमको सञ्चालन लायन्स क्लबकी सचिव शान्ती लक्ष्मी अर्यालबाट भएको थियो।
यस कार्यक्रमले अनाथ बालबालिकाहरूलाई खुशीको अनुभव गराउनुका साथै उनीहरूको स्वास्थ्य र भौतिक विकासमा सहयोग पुर्याएको छ। समाजमा सेवा, सहयोग, र समान अवसरको भावना प्रवर्द्धन गर्ने उद्देश्यका साथ लायन्स क्लब बुटवल सयपत्रीले यस्ता कार्यक्रमहरूलाई निरन्तरता दिने जनाएको छ।
लायन्स क्लब अफ बुटवल सयपत्रीले यसरी अनाथ बालबालिकाहरूलाई सहयोग गरेर समाजमा सकारात्मक परिवर्तन ल्याउने प्रयास गरिरहेको छ, जसले समाजमा सेवा र समर्पणको भावना बढाउँदै जाने विश्वास व्यक्त गरिएको छ।

समाजको हरेक वर्गलाई समेटेर सेवा पुर्याउने उद्देश्यले अगाडि बढिरहेको लायन्स क्लब सयपत्रीले आगामी दिनहरूमा पनि यस्तै सेवामुखी कार्यहरू गर्दै जाने योजना बनाएको अध्यक्ष कमला बस्नेत कुँवरले जनाईन।