खोज

रुपन्देही, १ असोज ।

विश्वमै शैक्षिक क्षेत्रको पर्यायवाचीका रुपमा परिचित ब्रिटिस एजुकेशन ग्रुपको व्यवस्थापनमा सञ्चालित ब्रिटिस ग्रामर स्कुल रुपन्देही (नमस्ते एकडेमी) मा नमुना प्रतिनिधि सभा बैठक सम्पन्न भएको छ ।

संघ, प्रदेश तथा स्थानीय तहको सभा कसरी सञ्चालन हुन्छ र त्यहाँ कार्यविभाजन, नीति नियम, आचार संहिता, मर्यादा के कसरी व्यवस्थित गरिएको हुन्छ भन्ने देखाउने उद्देश्यले संघीय प्रतिनिधि सभाको नमुना बैठक सम्पन्न गरिएको हो ।

बैठकमा सरकार पक्षका दल र तिनका सांसद, विपक्षी दलका सांसदको बसाइ, संसदले उठाएका प्रश्न र तिनको सम्बन्धित मन्त्रालयका मन्त्रीमा सवालजवाफ तथा समग्रमा प्रधानमन्त्रीको सम्बोधनलाई समेत बैठकमा प्रस्तुत गरिएको थियो। बैठककमा राष्ट्रपतिको भूमिकामा प्रज्वल लिम्बू रहेका थिए भने बैठकको सञ्चालन सभामुख अशुमन ढकालले गरेको विद्यालयका प्राचार्य दिलबहादुर बुढाथोकीले बताए ।

कार्यक्रममा प्रतिनिधि सभाका सदस्यहरुले शिक्षा , परराष्ट्र, वन तथा वातावरण, अर्थ, उद्योग, कृषि, महिला तथा बालबालिका, गृह लगायतका मन्त्रालयसँग सम्बन्धित विषयमा प्रश्नहरु गम्भीरताका साथ उठाएका थिए भने सोसँग सम्बन्धित विषयको जवाफ सम्बन्धित मन्त्रीहरुले दिएका थिए ।

समग्र विषयमा प्रधानमन्त्री अन्जना न्यौपानेले देशको अहिलेसम्मको अवस्था र अब जगाउन सकिने आशाका बारेमा प्रतिनिधि सभाका सदस्यलाई आश्वस्त पार्ने गरी जवाफ दिएको कार्यक्रम संयोजक महेन्द्र पौड्याल र सह संयोजक राधिका शर्माले जानकारी दिए ।

मोफसलमा एक मात्रै प्रोग्रेसिभ शिक्षण पद्धति सञ्चालन गरेको ब्रिटिश ग्रामर स्कुलले नेपाली भाषामा सामाजिक विषय विद्यार्थीले कठिन मानिरहेको अवस्थामा यसरी व्यावहारिक रुपमा सिकाइ गर्दा पठनपाठन सहज, सरल हुने र यसको समग्र छाप विद्यार्थीको मस्तिष्कमा पर्ने गर्दछ । देशको संसद चलाउने प्रक्रिया, राष्ट्रपति, उपराष्ट्रपति, प्रधानमन्त्री, उपप्रधानमन्त्री, मन्त्री तथा सरकारी र प्रतिपक्ष दलका कार्य, संसद र सांसदहरूको भूमिका कोरा किताबी ज्ञानमा मात्रै नअल्झाइ र प्रयोगात्मक रुपमै प्रस्तुत गर्नु सम्पूर्ण विद्यालय, नागरिक समाज लगायत सबैको दायित्व भएको हुँदा यो महत्वपूर्ण कार्यक्रम गरिएको विद्यालयका संस्थापक प्राचार्य राजेन्द्र कुँवरले बताए ।

विद्यार्थीहरूले सिक्ने थलोको रूपमा रहेको विद्यालयलाई थप अतिरिक्त क्रियाकलापसहित अगाडि बढाउँदा थप रचनात्मक क्रियाकलापमा विद्यार्थीको रुचि विस्तार हुने उनले बताए ।