खोज

बुटवल, ३० भदौ ।

बुटवलमा संचालित कल्याणकारी बहुउद्देश्यीय सहकारी संस्थाले पछिल्लो समयमा सहकारीहरुलाई हेर्ने दृष्टिकोणमा देखा परेको शंका उपशंकालाई प्रष्ट पार्न साधारण सभालाई प्रशिक्षणका रुपमा मनाएको छ । सहकारीले आफ्नो २४ औं वार्षिक साधारण सभालाई भाषणवादबाट मुक्त गरी सहकारी विज्ञद्वारा शेयर सदस्यहरुलाई सहकारीको अवस्था, शेयर सदस्यले गर्नुपर्ने काम, कर्तब्य, अधिकार, संचालक र कर्मचारीको कामको वारेमा करिव २ घण्टा प्रशिक्षण प्रदान गरेको हो ।

जिल्ला सहकारी संघ रुपन्देहीका महासचिव तथा सहकारी विज्ञ प्रशिक्षक दामोदर पंगेनीले समग्र देशको सहकारीको अवस्था, रुपन्देहीमा संचालित सहकारीको अवस्था र कल्याणकारी बहुउद्देश्यीय सहकारीको अवस्थाका वारेमा शेयर सदस्यहरुलाई प्रष्ट हुने गरी जानकारी गराएका थिए ।

महासचिव पंगेनीले सहकारीका शेयर सदस्यले लिएको कर्जाको प्राप्त व्याज नै सहकारीको आम्दानी हुने र सोही आम्दानी शेयर सदस्यका लागि नाफा हुने भएकाले लगानीको असुलीमा शेयर सदस्यहरु चनाखो हुनु पर्ने बताए ।

सहकारीहरु शेयर सदस्यका लागि जन्मदा, मृत्युमा, वृद्ध हुँदा आर्थिक रुपमा समस्या पर्दाका साथी भएकाले सहकारी संस्थालाई बन्द गराउन षडयन्त्र गर्नेहरुसंग सजग हुन जरुरी रहेको पनि उनले बताए । नेपालमा ३१ हजार सहकारी संस्था रहेकोमा ५ प्रतिशत भन्दा कम सहकारी संस्थाहरुमा समस्या रहेको भन्दै जिल्ला तहमा दर्ता भएका भन्दा पनि केन्द्र र प्रदेशमा दर्ता भै शाखा विस्तार गरेका केही सहकारीका कारण समस्या उत्पन्न भएको खुलासा गरे ।

उनले अस्वाभाविक रुपमा प्रतिफल दिने लोभ देखाउने सहकारीहरुसंग सचेत रहन र त्यस्ता सहकारीहरुसंग कारोवार नगर्न पनि सुझाव दिए ।

कार्यक्रममा कल्याणकारी बहुउद्देश्यीय सहकारी संस्थाका अध्यक्ष लक्ष्मण आचार्य क्षेत्रीले संस्थाको वार्षिक प्रगति प्रतिवेदन प्रस्तुत गरेका थिए । अध्यक्ष क्षेत्रीले सहकारी ऐनको व्यवहारमा पालना गर्न शेयर सदस्यहरुलाई आग्रह गरे ।

साधारण सभाले अध्यक्ष आचार्य, कोषाध्यक्ष टंक कुमार खडका, लेखा समिति संयोजक बालुराम गिरीको प्रतिवेदन छलफल गरी पास गरेको सचिव कृष्ण प्रसाद ज्ञवालीले बताए । सोही अवसरमा सहकारीका जेष्ठ सदस्य र ७० वर्ष पूरा भएका सदस्यहरुलाई सम्मान गरिएको उपाध्यक्ष दोल राम पाण्डेले बताए ।