खोज

बुटवल, २९ भदौ ।

यातायात व्यवसायीको हितको लागि व्यावसायिक संघ संस्थाको बिचमा एकता आवश्यक रहेको एक कार्यक्रमका सहभागीले जोड दिएका छन् । बुटवल अटो ईन्जिनियरिङ्ग एशोसिएशनको २९ औ बार्षिक साधारण सभा तथा १५ ओं अधिवेशनको उद्घाटन कार्यक्रममा बोल्दै बुटवल उपमहानरपालिकाका प्रमुख खेलराज पाण्डेयले व्यावसायिक हितको लागि ३ वटा संस्थाका बिचमा एकता आवश्यक रहेको बताए । पश्चिम नेपाल बस व्यवसायी, ट्रक समिति र अटो ईन्जिनियरिङ्ग एशोसिएसन लगायतका संस्थाहरुको बिचमा रहेका समस्या समाधानको लागि एकमुष्टरुपमा आउनुपर्ने र यसमा नरपालिकाले पूर्ण साथ दिने बताएका हुन् । कार्यक्रममा बोल्दै नगर प्रमुख पाण्डेले भने–‘मेरो पालामा नभएको समस्या समाधान वा सम्बोधन अन्यको पालमा हुन सक्दैन, यसको लागि कहाँ कस्तोगरी के गर्न सक्छ, नगरपालिकाले नगर प्रमुखको हिसावले जिम्मेबारी लिएर म गर्न तयार छु । ’

यातायात क्षेत्रमा भएका समस्या समाधानको लागि सबैजनाले आ आफ्नो स्थानबाट भूमिका निर्वाह गर्न आवश्यक रहेको भन्दै उनले स्थानीय सरकारको नाताले ती समस्या समाधानको लागि सक्दो पहल गर्ने प्रतिवद्धता समेत जनाएका हुन् ।

नेपालकै नमुना अटो भिलेज बनाउनको लागि नगरपालिकाले पहल जारी राखेको भन्दै उनले अहिले सबैभन्दा बढी रकम वडा नम्बर ११ मा नै विनियोजन गरिएको जानकारी दिए । व्यवसायीहरुले जे कामको लागि अटो भिलेजको जग्गा लिएको हो, त्यो काममा प्रयोग नभएको भन्ने गुनासाहरु पनि आएको भन्दै उनले यसको लागि व्यवसायीहर पनि सच्चिएर जानुपर्ने अवस्था आएको बताए । अटो भिलेज स्थापनाको लागि जग्गा उपलब्ध गराएर स्थापना भएपनि होटल तथा रेष्टुरेन्ट स्थापना गरेर काम गर्नु आफैमा गलत भएको मेयर पाण्डेयको भनाई छ ।

मैनावगर क्षेत्रमा खाली रहेको जग्गामा डिपीआर निर्माण गरी के कामको लागि आवश्यक हो, सोही अनुसार त्यसलाई प्रयोग गर्न सकिने भन्दै उनले अव मागमा आधारित कार्यक्रममा बुटवल उपमहानरपालिका अगाडि बढेको बताएका थिए । ‘स्थानीय तहले अव जनताको माग अनुसारको काम अगाडि बढाउने छ, हामी यो बर्ष देखि के योजना, आयोजना वा आवश्यक हो ? भन्ने कुरा माग आएपछि काम अगाडी बढ्छ, यसमा सबैको साथ र सहयोग चाहिन्छ’ मेयर पाण्डेयले भने ।

कार्यक्रममा नेपाल अटो मेकानिक्स व्यवसायी महासंघका केन्द्रीय अध्यक्ष जनार्दन गैरेले अटो व्यवसायीहरुको हितको लागि सरकार गम्भीर भएर लाग्नुपर्ने बताए । बुटवलमा स्थापना हुन खोजिएको अटो ईन्जीनियरिङ्ग कलेजको विषयमा सबैले सहकार्य गरेर अगाडी बढ्नुपर्ने बताएका थिए ।

एशोसिएशन बुटवलका संस्थापक अध्यक्ष खड्ग बहादुर गौतमले व्यवसायीको हितको लागि सबैजना एकजुट भएर लाग्नुपर्ने बताएका थिए ।

कार्यक्रममा पश्चिम नेपाल बस व्यवसायी प्रालिका अध्यक्ष दधिराम खरेलले यातायात व्यवसायी र अटो क्षेत्रका विचमा सहकार्य नभएको बताउँदै यसमा सहकार्य जरुरी रहेको बताएका थिए । अटो मेकानिक्स व्यवसायीले कहिलेकाही डुब्लीकेट पार्ट्स प्रयोग गरेको कारण सवारी दुर्घटना समेत भएको दावी गर्दै खरेलले यसमा व्यवसायी सम्बेदनशिल हुन आवश्यक रहेको बताएका थिए । कार्यक्रममा नेपाल चेम्बर अफ कमर्श लुम्बिनीका अध्यक्ष तथा संस्थाका सल्लाहकार टंक पोखरेल, बुटवल उद्योग बाणिज्य संघका बरिष्ठ उपाध्यक्ष टंक गैरे, पुर्व अध्यक्ष केवल प्रसाद यादव, सयनसिंह गौतम, चिन बहादुर गुरुङ्ग, राजन पाण्डे लगायतले आ आफ्नो भनाई राखेका थिए ।

कार्यक्रममा संस्थाको बार्षिक प्रतिवेदन प्रस्तुत गर्दै अध्यक्ष तुल्सीराम न्यौपानेले अटो ईन्जिनियरिङ्ग कलेज स्थापनाको लागि पहल जारी रहेको बताएका थिए । उनले अहिले सम्मको अवस्थामा आउनको लागि पुर्व अध्यक्ष तथा सल्लाहकार, संस्थापकहरुको महत्वपूर्ण योगदान रहेको भन्दै संस्थाको हितको लागि आफु जहिले पनि लागिरहने बताएका थिए । कार्यक्रममा संस्थाका प्रेस सल्लाहकार दामोदर खनाल सहित पुर्व अध्यक्ष, उत्कृष्ट व्यवसायी, कर्मचारीहरुलाई सम्मान गरिएको थियो ।