खोज

बुटवल, २८ भदौ । सुन्दर र सफा बुटवल हाम्रो अभियान नारालाई सार्थक बनाउने गरि रुपन्देही ब्यापार संघ, जुत्ताचप्पल बस्तुगत उपसमितिले सरसफाईमा जोड दिएको छ । शुक्रबार एक समारोहका बिच बुटवल उपमहानगरपालिका वडा नं ४ का वडाअध्यक्ष नरिश्वर पौडेललाई संघका अध्यक्ष दिपक अधिकारी, उपसमिति संयोजक उत्तम देवकोटाले २ सय पिस डस्टबिन र फुलसहितको गमलाहरु हस्तान्तरण गरेका छन ।

बुटवलको अमरपथ र राममन्दिर क्षेत्रमा डस्टबिन र गमला राखी कार्यक्रमको शुभारम्भ गरिएको उपसमिति संयोजक उत्तम देवकोटाले बताए । सफा र सुन्दर नगर बनाउन सबै नागरिकको भुमिका रहने भन्दै यो शुरुवात भएको बताए । राम मन्दिर लाईन र अमरपथ क्षेत्रमा शुरुवात भएर अन्य क्षेत्रमा समेत लगिने उनले बताए ।

कार्यक्रममा वडा नं ४ का वडाअध्यक्ष नरिश्वर पौडेलले बजार क्षेत्रमा पर्ने राम मन्दिर लाईन र अमरपथमा सरसफाइसंगै ट्राफिक ब्यवस्थापनमा जोड दिने बताए । नगरलाई आर्कषक बनाउन स्थानिय ब्यवसायीहरुको उत्तिकै दायित्व भएको भन्दै उनले यसमा स्थानिय सरकारबाट सहयोग गर्ने प्रतिबद्धता जनाए । यो काममा स्थानिय टोल समितिलाई जिम्मेवार बनाउनेतर्फ विशेष अगुवाई गर्ने समेत उनले बताए ।

कार्यक्रममा संघका अध्यक्ष दिपक अधिकारीले सामाजिक उत्तरदायित्वमा नगरका सबै संघसंस्थाहरुको अहम भुमिका हुने भन्दै उपसमितिबाट राम्रो शुरुवात भएको बताए । कार्यक्रममा संस्थापक महासचिव गोपाल अधिकारी, वरिष्ठ उपाध्यक्ष प्रकाश ढकाल, प्रथम उपाध्यक्ष दयानिधी भण्डारी, महासचिव फर्सुराम पन्त, उपसमितिका सचिव विजय घिमिरेले अभियानको सफलताका लागि निरन्तर लाग्ने बताए ।