खोज

बुटवल, २८ भदौ । ६० औ बाल दिवसको अवसरमा लायन्स क्लब अफ बुटवल तिलोत्तमा मायादेवीले आयोजना गरेको हेल्थि बेबि प्रतियोगितामा बुटवलका यारिका सैजु प्रथम भएकी छन् । प्रथम हुन सफल यारिकासहित अभिभावक काजल सैजुलाई सम्मानसहित गिफ्टह्याम्पर प्रदान गरिएको छ । ‘हरेक बच्चाका लागि हरेक अधिकार’ भन्ने मूल नाराकासाथ शुक्रबार लायन्स क्लब अफ बुटवल तिलोत्तमा मायादेवी र परिवार नियोजन संघ रुपन्देहीको आयोजनामा २२ सौ संस्करणको प्रतियोगितामा निशा बज्राचार्यकी शिशु यस्मी द्वितीय हुन सफल भइन् भने सरिता पौड्यालको शिशु विष्णु तृतीय हुन सफल भए । यसैगरी शिल्पा पौडेलकी शिशु समृद्धि, उजिरा खानको शिशु अरमान र कृति बज्राचार्यका शिशु विमान सान्त्वना हुन सफल भएका थिए ।

प्रतियोगितामा ६ महिनादेखि १८ महिनासम्मका बालबालिकाहरु भागलिने पाउने क्लबका अध्यक्ष तारा श्रेष्ठले बताईन । चिकित्सकबाट स्वस्थ जाच गरेर उमेर अनुसारको वृद्घि विकासलाई मुख्य आधार बनाएर बिजेता घोषित गरिने उनले बताईन । पहिलो संस्करणमा विजेताका बच्चा यो पटक विजेता भएको उनले बताईन ।

एक कार्यक्रमका बिच लायन्स इन्टरनेश्नल ३२५ पी का डिष्ट्रिक गभर्नर पुरुषोत्तमभक्त प्रधानाङ्गले विजेता बालबालिका र परिवारलाई पुरस्कार वितरण गर्दै आजका शिशु भोलीका भविष्य भएको बताए । बालबालिकाको शारिरीकसंगै मानसिक बिकासमा पनि ध्यान दिनुपर्नेमा उनले जोड दिए ।
कार्यक्रममा बोल्दै निर्णायक मण्डलका संयोजक तथा आम्दा अस्पताल बुटवलका मेसु तथा बाल रोग विशेषज्ञ डा. विनोद पराजुलीले शिशुको स्वास्थ्यका लागि परिवारको वातावरण स्वस्थ हुनु पहिलो शर्त रहेको उल्लेख गरे । घर परिवारबाट नै शिशुले पहिलो र अधिकांश व्यवहारिक सीप, ज्ञान हासिल गर्ने हुँदा अभिभावकले उनीहरुको हेरचाहमा ख्याल गर्नुपर्ने बताए । शिशुको उमेर, शारिरीक वृद्धि, बौद्धिक बिकास, नियमित खोपको अवस्था, खानपान लगायतका कुराहरुका आधारमा उत्कृष्ट र स्वस्थ शिशु छनोट गरिएको निर्णायक समितिका संयोजक डा.पराजुलीले बताए ।
कार्यक्रमका अवसरमा बोल्दै परिवार नियोजन संघ रुपन्देहीका सभापति प्रदीप शाक्यले प्रतियोगिता प्रतिस्पर्धाका लागि मात्र नभई सचेतनाका लागि आयोजना गरिएको उल्लेख गरे ।

पछिल्लो समय डिजिटल प्रविधिहरुको प्रयोगसँगै बालबालिकाहरु र अभिभावक बिचको दुरी बढ्दै जाँदा उनीहरुको मानसिक तथा सामाजिक बिकासमा असर परिहेको बताउँदै उनले सचेत हुनु पर्ने समय आएको उल्लेख गरे ।
प्रतियोगितामा ३५ जना शिशुहरु सहभागी भएका क्लबका सचिव सिर्जना वझाले बताईन ।