खोज

बुटवल, २८ भदौ ।
नेपाल सरकार विज्ञापन बोर्डको आयोजनामा देशभरका राष्ट्रिय दैनिकका प्रकाशकहरूको राष्ट्रिय भेला बाट विज्ञापनलाई एकरूपता दिने निर्णय गरिएको छ । विज्ञापन बोर्डका अध्यक्ष लक्ष्मण हुमागाईं प्रेस काउन्सिल नेपालको वर्गीकरणमा परेका र विज्ञापन बोर्डमा सूचीकृत भएका राष्ट्रिय दैनिक पत्रिकामा छाप्नुपर्ने संघीय, प्रदेश र स्थानीय तहका सरकारी बोल टेण्डर लगायतका सूचना तथा विज्ञापन र कर्पोरेट विज्ञापनको प्रकाशन दररेटलाई एकरूपता कायम गर्नेगरी संयुक्त प्रतिवद्धता जारी गरेको बताए ।

प्रतिवद्धतामा राष्ट्रिय दैनिकमा विज्ञापन तथा सूचना प्रकाशन गर्दा आफ्नो सञ्चारमाध्यममा विज्ञापन प्रकाशन गर्नका लागि अधिकतम् तथा न्यूनतम् विज्ञापन दररेट विज्ञापन बोर्डमा सूचीकृत गरिएको हुनुपर्ने छ । विज्ञापन प्रकाशन गर्दा विज्ञापन बोर्डले तोकेको न्यूनतम दरभन्दा कममा बिलिङ गर्न पाईने छैन ।
संयुक्त प्रतिबद्धता पत्र अनुसार राष्ट्रिय दैनिकमा विज्ञापन तथा सूचना प्रकाशन गर्दा अधिकतम दररेट केकति भन्ने आफैले तय गरी विज्ञापन बोर्डमा सूचीकृत गर्नुपर्ने र न्यूनतम दर प्रति सिसी रु ५ सय कायम गर्ने र उक्त रकममा १५ प्रतिशत मात्रै एजेन्सी छुट दिइने तथा त्यस बाहेक अन्य कुनै प्रकारको छुट उपलब्ध नगराउने निर्णय भएको छ ।

त्यस्तैगरी नेपाल सरकार विज्ञापन बोर्डले माग गरेको न्यूतम दररेट पेश गर्दा सोही अनुरूप पेश गर्ने र कायम भएको दररेट बमोजिम कारोबार भए नभएको अनुगमन विज्ञापन बोर्डलाई गर्न अनुरोध गर्ने निर्णय समेत भएको छ । त्यस्तैगरी बोर्डलाई अनुगमनको काममा सबै राष्ट्रिय दैनिकहरूले सहयोग गर्ने र राष्ट्रिय दैनिकको अनुमति बेगर टेण्डर विड गरेको विज्ञापन एजेन्सीले कम दरमा टेण्डर पारेको पाईएकोले त्यस्ता विज्ञापन कसैले पनि प्रकाशन नगर्ने समेत प्रतिबद्धता पत्रमा निर्णय गरिएको छ ।

त्यस्तैगरीअब आइन्दा टेण्डर विड गर्दा राष्ट्रिय दैनिकको अनुमति पत्र लिएर मात्र विड गर्न सबै विज्ञापन एजेन्सीलाई अनुरोध गर्ने निर्णय गरिएको छ । त्यस्तैगरी गरी सहमति पत्र बेगर टेण्डर गरेको पाईएमा विज्ञापन बोर्डमा कारबाहीको अनुरोध गर्ने निर्णय समेत गरिएको छ ।

उक्त भेलामा मिडिया एलाइन्सका प्रमुख भाष्करराज राजकर्णिकार, कान्तिपुर पब्लिकेसन्स लिमिटेडका अध्यक्ष कैलाश सिरोहिया, अन्नपूर्ण पोष्ट राष्ट्रिय दैनिकका अध्यक्ष रामेश्वर थापा, बुटवल टुडे राष्ट्रिय दैनिकका प्रबन्ध सञ्चालक ÷प्रबन्ध सम्पादक नवराज कुँवर, नागरिक दैनिकका अध्यक्ष विनोद ज्ञवाली, जनकपुर टुडेका प्रमुख सञ्चालक वृजकुमार यादव, दैनिकपत्र राष्ट्रिय दैनिक का कार्यकारी प्रमुख तथा प्रधान सम्पादक डा. बालकृष्ण चापागाईं, कारोबार राष्ट्रिय दैनिकका सञ्चालक शिशीर भट्ट, मेचीकाली दैनिकका कार्यकारी प्रमुख विष्णु गैरे, दैनिक लुम्बिनीका प्रबन्ध सञ्चालक महेश रिजालको उपस्थिति रहेको थियो ।

त्यस्तैगरी आदर्श समाज दैनिकका प्रमुख सञ्चालक कृष्ण प्रसाद बास्तोला, राजधानी दैनिकका आशीष शेरचन, कामना न्यूज पब्लिकेसन्सका दिरेकलाल श्रेष्ठ, नयाँ पत्रिका राष्ट्रिय दैनिकका प्रमुख सञ्चालक कृष्णज्वाला देवकोटा, न्यू बिजनेश एज ली का सविता सुवेदी, सौर्य दैनिकका बोधराज त्रिपाठी, नयाँ युगबोध दैनिकका आशीष रेग्मी, मध्यान्ह दैनिकका मदन कुमार श्रेष्ठ, जनसवाल दैनिकका रामजी बगाले, प्रभाव दैनिकका कृष्ण कार्की, मिसन टुडे दैनिकका विनोद पौडेललगायतका देशभरका राष्ट्रिय दैनिकका प्रकाशकहरूको उपस्थिति रहेको थियो ।