खोज

बुटवल, १७ भदौ ।
नेपाल सरकारबाट राजश्व छुट प्राप्त गरी सञ्चालनमा आएका एम्बुलेन्सहरू नै भाडामा लगाएको पाइएको छ । सामाजिक सेवाभावले स्थापना भएको ‘दाबी गरिएका’ ती संस्थाले असमान भाडा लिएका त छदैछन् पछिल्लो समयमा एम्बुलेन्स नै भाडामा लगाएर नाफा कामाउनतर्फ लागेको पाइएको छ ।
यसरी ती एम्बुलेन्स ठेक्कामा लगाउँदा एम्बुलेन्स संचालनको उद्देश्य माथि नै प्रश्न उठेको छ । यस्तै एउटा संस्थाले स्वामित्व लिएर सञ्चालन गर्दै आएका कतिपय एम्बुलेन्स बिक्री समेत भएको पाइएको छ । ‘सेवा नै धर्म हो’ नारा लेखिएका एम्बुलेन्सहरू नाफामुलक बाटोमा हिँड्दा नाराले नै गिज्याइरहेको छ । यातायातको सहज पँहुच नभएका स्थानमा बिरामीहरूको लागि सहज सेवा प्रदान गर्ने एम्बुलेन्स एक जिल्लाको संस्थाले सञ्चालन गर्दै आएकोमा अर्को जिल्लामा बिक्री समेत हुने गरेको छ ।

अर्घाखाँची डिर्भना रूपन्देही सम्पर्क मञ्च रूपन्देहीले संचालन गर्दै आएको लु २ च ६७०६ नम्बरको एम्बुलेन्स बिक्री भएर भैरहवा पुगेको छ । जिल्ला प्रशासन रूपन्देहीमा दर्ता गरी मानविय सेवामा सहयोग गर्ने उद्देश्य देखाउँदै एम्बुलेन्स भित्राएको संस्थाले पछिल्लो समय पैसाको चलखेलमा बिक्री गरिएको आरोप छ । एम्बुलेन्स किनेका ती चालकले मासिक रूपमा पैसा बुझाउने गरी लिएको बताउँछन् । औपचारिक रूपमा यातायात कार्यालयमा पास नहुने ती एम्बुलेन्स आपसी कागजात मिलाएर लेनदेन हुने गरेको छ । नयाँ संस्था वा व्यक्तिले किनेर चलाएको भएपनि ती एम्बुलेन्स पुरानै संस्थाबाट नवीकरण हुने गरेको छ ।

यस्तै सिद्धार्थ सेवा समाज भैरहवाले संचालन गरिरहेको लु १ च ३४६९ नम्बरको म्यास महिन्द्रा जीप (एम्बुलेन्स) बिक्री भएर बिरगञ्ज पुगेको छ । उक्त एम्बुलेन्स ४ लाख ५० हजार बढी मूल्यमा बिक्री भएको स्रोतको भनाइ छ । बुद्ध जागरण अभियान रूपन्देहीको नाममा रहेको लु १ च ६०९८ एम्बुलेन्स अहिले नवलपरासीको भुमहीमा रहेको जेसिका पोलीक्लिनिकलाई बिक्री गरिएको पाइएको छ । के कतीमा बिक्री भएको नखुलेपनि रूपन्देहीका कुनै पनि अस्पतालमा उक्त एम्बुलेन्स सञ्चालनमा नरहेको नेपाल एम्बुलेन्स चालक संघका एक सदस्यले बताए । कतिपय एबुलेन्सको सञ्चालन संस्थाको नाम नै परिवर्तन गरि नयाँ नामबाट सञ्चालनमा ल्याइएका छन् ।

रूपन्देहीमा सन्चालित धेरै एम्बुलेन्सहरू चालकहरूलाई ठेक्का दिएर सञ्चालन भैरहेका छन । समाचार स्रोतका अनुसार रूपन्देही जिल्ला भित्र करीब ९० बटा एम्बुलेन्स सन्चालनमा रहेकोमा धेरैजसो एम्बुलेन्स बजार केन्द्रित छन् । गाउँ–गाउँ मा सेवा दिने भनेर भित्रीएका एम्बुलेन्स लुम्बिनी प्रादेशिक अस्पताल, भैरहवा मेडिकल कलेज, भैरहवाको भिम अस्पताल र बुटवलको सिद्धार्थ महिला तथा बाल अस्पताल आसपासमा बिरामी बोक्ने गरी कुरिरहेका भेटिन्छन् । एम्बुलेन्सहरू ठेक्कामा सञ्चालन गर्न दिँदा आफ्नो दायित्व बहन गर्न नखोज्ने, बिरामीका आफन्तबाट तोकीएको भन्दा बढि रकम लिँदा सेवाग्राही मर्कामा पर्ने गरेका छन् ।

संयुक्त एम्बुलेन्स चालक संघ रूपन्देहीका अध्यक्ष मन बहादुर गुरुड्डले एम्बुलेन्स बिक्री भएको बारे आफूले पनि सुनेको बताए । केही एम्बुलेन्स बिक्री भएको बिषय जिल्ला प्रशासन कार्यालय रूपन्देहीमा समेत उजुरी परेको उनको भनाइ छ ।
अध्यक्ष गुरुड्डले भने, एम्बुलेन्स बिक्रीबारे छानबिन के कसरी भैरहेको छ भन्ने कुरा जानकारी भएन । यता रूपन्देहीका सहायक प्रमुख जिल्ला अधिकारी रामचन्द्र अर्यालले एम्बुलेन्स खरीद गर्ने संचालन गर्ने जिम्मा सम्बन्धित संस्थाको हुने र त्यसको बिक्री गर्न नमिल्ने बताए ।
सामाजिक सेवाभावले स्थापना गरिएका संस्थाले सञ्चालन गर्दै आएको एम्बुलेन्स बिक्री भएको र ठेक्कामा लगाइएको पाइए कार्बाही हुन्छ, हामी यसको अनुगमन गछौं, अर्यालले भने ।