खोज

प्युठान, १७ भदौ ।

आउँदै गरेको हरितालिका (तीज) २०८१ को अवसरमा प्युठानको स्वर्गद्वारी क्याम्पसमा तीज मिलन कार्यक्रम मनाइएको छ । स्वर्गद्वारी बहुमुखी क्याम्पस पुण्यखोलाको स्वतन्त्र विद्यार्थीको आयोजनामा सोमबार कार्यक्रम मनाइएको हो ।

क्याम्पसमा अध्ययनरत विद्यार्थी, पूर्व विद्यार्थी, विद्यार्थी नेता, प्रध्यापकहरुले सामूहिक रुपमा दर खाएर रमाइलो गरेका थिए । स्ववियु अध्यक्ष टेकराज के.सी.को अध्यक्षतामा भएको कार्यक्रमा प्युठान नगरपालिकाका प्रवक्ता एवम् नगरपालिका वडा नं. ३ का वडा अध्यक्ष सुमनराज श्रेष्ठ, क्याम्पस प्रमुख गुञ्ज बहादुर खड्का, विद्यार्थी नेता, पत्रकारहरुले शुभकामना मन्तव्य राखेका थिए ।

नगरपालिकाका प्रवक्ता सुमनराज श्रेष्ठले विद्यार्थीहरुले तीजको गरिमालाई जोगाई राख्न मुख्यभूमिका निर्वाह गर्नु पर्ने बताए । ‘तीजका विकृतीहरुलाई हटाएर गरिमाबोध गराउनु विद्यार्थीको भूमिका हो’ श्रेष्ठले भने, ‘जर्गेना र महत्वबोधका लागि यस्ता कार्यक्रमहरु महत्वपूर्ण हुन्छन् ।’ उनले कार्यक्रम आयोजना गर्ने स्ववियूलाई धन्यावाद दिए ।

क्याम्पस प्रमुख गुञ्ज बहादुर खड्काले शुभकामना मन्तव्य राख्दै यस्ता कार्यक्रम संस्कृति र मौलिक कलाको संरक्षणका माध्ययम बन्ने विश्वास व्यक्त गरे । खड्काले तीजलाई भड्किलो हुनबाट बचाउन विद्यार्थीहरुलाई सुझाव दिए ।

कार्यक्रममा स्ववियू सचिव प्रेम विश्वकर्मा, कोषाध्यक्ष भुपेन्द्र के.सी., नेकपा एमाले जिल्ला समितिका सचिव इश्वरा आचार्य, विद्यार्थी नेता यांक पुन, जाल बहादुर के.सी., कल्याणविक्रम के.सी., पत्रकारहरु शशिधर भण्डारी र मधुसुदधन भण्डारीले तीजको शुभकामना तथा तीज प्रतिको धारणा राखेका थिए ।