खोज

लुम्बिनी प्रदेश सरकारको गौरवको आयोजनाको रूपमा रहेको लुम्बिनी प्रादेशिक अस्पताल बुटवलको १२ तले अत्याधुनिक भवनको शनिवार औपचारिकरूपमा शिलान्यास गरिएपछि बुटवलबासीका लागि एउटा खुसी थपिएको छ । प्रदेश राजधानी दाङ सर्दा बुटवलबासी जति दुःखी थिए, प्रादेशिक अस्पताल १२ सय शैयामा विस्तार हुँदैछ भन्ने सुन्दा बुटवलबासीका लागि राजधानी सर्दाको पीडामाथि मल्हम लगाउने प्रयास भएको छ । बुटवलका उद्योगी व्यवसायीले अव बुटवलको खस्केको व्यापारमा सुधार आउने अपेक्षा गरेका छन् । स्थायी राजधानी दाङ कायम भएपछि खस्केको बुटवलको व्यवसाय दिगोरूपमा चलायमान र गुल्जार बनाउन यो अस्पताल ‘गेमचेन्जर’ प्रोजेक्ट हुने उद्योगी व्यवसायीहरूको विश्वास छ । बुटवलको लुम्बिनी प्रादेशिक अस्पतालले बिरामीको उपचार मात्रै गर्ने छैन, खस्केको बुटवलको व्यापार व्यवसायलाई बचाउन समेत योगदान गर्ने विश्वास गरिएको छ । एक सय १४ वर्ष पुरानो यो अस्पताललाई १२ सय शैयामा विस्तार गर्ने योजना अनुसार सुविधा सम्पन्न १२ तले भवनको अर्थमन्त्री बिष्णु पौडेलले शनिवार शिलान्यास गरेपछि बुटवलका लागि त खुसीको कुरा छँदैछ, समग्र लुम्बिनी प्रदेशका आम प्रदेशबासी नागरिकमा समेत खुसीको लहर सिर्जना गरेको छ । लुम्बिनी प्रादेशिक अस्पतालमा अहिलेपनि प्रदेशका १२ वटै जिल्लाका विरामीले सेवा लिदै आएका छन् । जेहोस यो अस्पतालले बुटवलको मुहार त फेर्ने नै छ, साथमा रूपन्देहीलाई अव आर्थिक हबको रूपमा समेत विकास गर्न महत्वपूर्ण कोसेढुंगा सावित हुने आम विश्वास छ । ६ अर्ब १८ करोड ७५ लाख रुपियाँको लागतमा निर्माण हुने अस्पताल नेपालकै सवैभन्दा ठूलो अस्पतालको रूपमा विकास हुनेछ ।

अव अस्पतालको पूर्वाधार विस्तारमा सरकारले ध्यान दिनु जरुरी छ । अस्पतालको भवनमात्रै बनेर हुँदैन, जबसम्म त्यहाँबाट दिने सेवा छिटो, छरितो र गुणस्तरीय हुँदैन तबसम्म यो अस्पतालप्रति आम नागरिकको विश्वास र भरोसामा बृद्धि हुँदैन । अर्को दुःखको कुरा के छ भने अहिले लुम्बिनी प्रादेशिक अस्पतालमा उपचार गराउन विरामीले निकै सास्ती खेप्नु परेको छ । अनलाईन टिकटको व्यवस्था गरिएपनि विरामीले डाक्टर फेला पार्न करिव दुई तीन घण्टा सास्ती पाउनुपर्दछ । जेनतेन डाक्टर भेटिएपनि विरामीको बढ्दो भीडका कारण विरामीले आफ्नो समस्या भन्न नभ्याउँदै डाक्टरले प्रेस्किप्सन लेख्न हतार गर्नुपर्ने बाध्यता छ । अस्पतालको यो रोग जहिलेसम्म अन्त्य हुँदैन तबसम्म अस्पताल जति नै भौतिकरूपमा सम्पन्न भएपनि त्यसले आम विरामीमा दिने भरोसा र विश्वास कायम राख्न सक्दैन् । संघीय अस्पतालमा आपिडी सेवा दुई सिफ्टमा संचालन गर्ने व्यवस्था गरिएजस्तै यो अस्पतालमा पनि अव ओपिडी सेवा विस्तारमा सरकारको ध्यान जाओस् । दैनिक दुई हजार विरामीले उपचार सेवा लिदै आएको यो अस्पतालमा सेवा लिन सास्ती पाउने अवस्थाको अन्त्य गर्न तत्काल पहल गरियोस् । अर्को चिन्ताको कुरा के छ भने अस्पतालमा अपरेशनका लागि विरामीलाई दुई बर्षसम्मको म्याद थमाउने गरिएको छ । तत्काल अपरेशन गर्नुपर्ने विरामीलाई दुई बर्षपछि आउनु भन्दा त्यो विरामीको अवस्था के होला ? अस्पतालले प्रशासनले यो अवस्थाको तत्काल अन्त्य गर्ने पहल गरोस् । यसका लागि संघीय र प्रदेश सरकारले जनशक्ति थप गर्नेतर्फ पहल गर्नु जरुरी छ । जेहोस यो अस्पताल लुम्बिनी प्रदेशको गौरवको आयोजना हो । अव यो अस्पताल प्रदेशको ‘गेमचेञ्जर’ को रूपमा विकास हुने अपेक्षा गरिएको छ । तर, त्यसका लागि सवैले होस्टेमा हैंसे गरेमात्र यो अस्पताल आम जनताको भरोसाको रूपमा विकास हुनेछ ।

शनिवार शिलान्यास भएको अस्पताल भवन २०८५ साल पुससम्ममा तयार हुनुपर्ने छ । त्यसका लागि भारतीय निर्माण कम्पनी क्याप साइट आशिष रेलिग्रेट भेन्चरले समयमै काम सक्ने प्रतिवद्धता जनाएको छ । यो खुसीको कुरा हो । यो अस्पताल आम नागरिकको सम्पत्ति हो । तसर्थ यो आयोजना सम्पन्न गर्ने दौरानमा यसमा जनस्तरबाट पनि निगरानी गर्नुपर्ने आवश्यकता छ । अर्थमन्त्री विष्णु पौडेलले १२ सय शैयाको अस्पतालमा ठूलो संख्यामा दक्ष जनशक्ति आवश्यक पर्ने भन्दै विशेषज्ञ चिकित्सकसहित जनशक्तिको व्यवस्थापनमा अबको दिनमा ध्यान दिनुपर्ने बताएका छन । पौडेलले भनेजस्तै यो अस्पतालको जनशक्ति व्यवस्थापन अवको प्राथमिकता बन्नुपर्दछ ।