खोज

दाङ, १७ भदौ ।

नेपाल कम्युनिष्ट पार्टी (बहुमत) दाङले विभिन्न आरोप खेपेका लुम्बिनी प्रदेशका दुई सांसदलाई कानुनी कारबाहीको माग गर्दै चरणबद्ध आन्दोलनको घोषणा गरेको छ ।

नेपाली कांग्रेसबाट प्रतिनिधित्व गर्दै बाँकेबाट निर्वाचित लुम्बिनी प्रदेश सरकारका वन तथा वातावरण मन्त्री बादसाह कुर्मी र रुकुम पूर्वका डिबी भनिने धनबहादुर केसीलाई कानुनी कारबाही गर्न मागसहित चरणबद्ध आन्दोलनका कार्यक्रम घोषणा गरेको आज घोराहीमा पत्रकार सम्मेलन गरी जानकारी गराईएको छ । नेपाल कम्युनिष्ट पार्टी (बहुमत) का प्रदेश ईन्चार्ज तिलक पुनको अध्यक्षतामा भएको पत्रकार सम्मेलनमा भोलि मंगलबार लुम्बिनीका सबै प्रमुख जिल्ला अधिकारीहरूलाई सोही ब्यहोराको ज्ञापन पत्र बुझाउने जानकारी गराईएको छ । आरोपित व्यक्तिहरूमाथि कारबाही नभए भदौ २० गते प्रदेशका सबै जिल्लामा मशाल जुलुस गर्ने र भदौ २१ गते सरकारी गाडी चल्न नदिने लगायत थप आन्दोलनका कार्यक्रमहरू गर्ने भएको छ ।

पत्रकार सम्मेलनको सहजीकरण राप्ती इन्चार्ज नरेन्द्र बिकले गरेका थिए । यसअघि हिजो मात्रै नेकपा (बहुमत)का नेताहरूले लुम्बिनीका मुख्यमन्त्री चेतनारायण आचार्यलाई ज्ञापन पत्र बुझाएका थिए । ज्ञापन पत्र बुझाउँदै बहुमतले कुर्मी र केसीलाई उनीहरूको कसुर अनुरुप सांसद पदमा रहिरहन कानुन बिपरित रहेको हुँदा तत्काल सांसद पदबाट हटाउन माग गरेको थियो । मन्त्री कुर्मीमाथि बाँकेकी निर्मला कुर्मीलाई अपहरण तथा बन्धक बनाइ बेपत्ता पारेको गम्भीर आरोप छ ।

जसको विरोधमा बाँकेदेखि काठमाडौंसम्म पुगेर महिला अधिकारकर्मीहरू चरणबद्ध आन्दोलन गर्दै आइरहेका छन् । त्यस्तै सांसद केसीमाथि किर्ते गरेको अभियोग छ । २०४८ साल असार ६ गते तत्कालीन जिल्ला न्यायाधीश बमकुमार श्रेष्ठको इजलासले किर्ते मुद्दामा दोषी ठहर गर्दै एक वर्ष कैद र दुई हजार जरिवानाको फैसला सुनाएको थियो । श्रीमतीसँगको अंश मुद्दामा प्रदेश सांसद केसीले किर्ते गरेको अभियोगमा ३२ वर्ष पहिले अदालतले उनलाई त्यस्तो फैसला सुनाएपछि उनी फरारको सूचिमा रहँदै आएका छन् । तर, फैसला कार्यान्वयन हुन सकेको छैन ।