खोज

सुर्खेत, १७ भदौ ।

कर्णाली प्रदेश सरकारले ‘जनतासँग मुख्यमन्त्री’ कार्यक्रमलाई थप परिष्कृत गरेर सञ्चालन गर्न लागेको छ । सरकार र नागरिकबिच छलफलको वातावरण बनाउन ‘जनतासँग मुख्यमन्त्री’ कार्यक्रम सुरु गर्न लागिएको हो ।

चालु आर्थिक वर्ष २०८१÷०८२ को नीति तथा कार्यक्रम र बजेटमा ‘जनतासँग मुख्यमन्त्री’ कार्यक्रम समेटिएको छ । कार्यक्रम कार्यान्वयनका लागि चालु आर्थिक वर्षमा ३० करोड बजेट विनियोजन गरिएको मन्त्रालयले जनाएको छ ।

मुख्यमन्त्री तथा मन्त्रीपरिषद्को कार्यालयद्वारा यसअघिदेखि नै सञ्चालित ‘हाम्मा कुडा, हाम्मा मुख्यमन्त्री’ कार्यक्रम सञ्चालन हुँदै आएको थियो । सोही कार्यक्रमलाई नै थप व्यवस्थित बनाई जनतासँग मुख्यमन्त्री कार्यक्रम सञ्चालन गर्न लागिएको हो । आर्थिक वर्ष २०७५÷०७६ मा ‘हाम्मा कुडा, हाम्मा मुख्यमन्त्री’ कार्यक्रम सञ्चालनमा ल्याए पनि प्रभावकारी हुन नसकेकाले त्यसैलाई परिष्कृत गरेर नयाँ कार्यक्रम सञ्चालनमा ल्याउन लागिएको छ ।

प्रदेश सरकारको कार्यसम्पादनको सम्बन्धमा मुख्यमन्त्रीको प्रत्यक्ष सहभागितामा अन्तरक्रिया तथा छलफल गर्ने उद्देश्य नयाँ कार्यक्रमको रूपमा अघि सारिएको जनाइएको छ । जनताको माग र समस्याको बारेमा सम्बोधन गरी प्रदेश सरकारलाई जनउत्तरदायी बनाउन ‘जनतासँग मुख्यमन्त्री’ कार्यक्रम ल्याइएको हो ।

कार्यक्रम कार्यान्वयनको अवधारणा पत्र निर्माणको चरणमा रहेको मन्त्रालयले जनाएको छ । कार्यक्रम कार्यान्वयनको मोडालिटी तयार भइरहेको छ । कार्यविधि निर्माण गरेर कार्यक्रम कार्यान्वयन हुनेछ । कर्णालीका दशवटै जिल्लामा मुख्यमन्त्रीको प्रत्यक्ष सहभागितामा छलफल तथा अन्तरक्रिया कार्यक्रम गरिनेछ । जनता स्वयंको प्रत्यक्ष जिज्ञासा, गुनासा, सुझाव र प्रश्न लिएर प्रदेशको विकास,सुशासनमा गति दिने मुख्य उद्देश्य राखेर ‘जनतासँग मुख्यमन्त्री’ कार्यक्रम सञ्चालन गर्न लागिएको मन्त्रालयका प्रवत्ता कृष्णप्रसाद खरेलले जानकारी दिए । ‘विभिन्न तरिकाबाट नागरिकका गुनासो लिने कार्यक्रम त छदैछ त्योसँगै मुख्यमन्त्री प्रत्यक्ष नागरिकको बीचमा गएर गुनासो सुन्ने कार्यक्रम पनि थप भएको छ’ प्रवत्ता खरेलले भने, ‘यसले गर्दा आम नागरिकका गुनासा तथा समस्याहरुको पहिचान भई सेवा सुविधालाई प्रभावकारी बनाउन सहयोग पुग्दछ ।’ प्रत्यक वडासम्म मुख्यमन्त्री रोजगारलगायतका अन्य कार्यक्रमहरु सञ्चालन भएको र कार्यक्रमको प्रभावकारिताको विषयमा पनि बुझ्ने मौका मिल्छ ।

‘पछिल्लो समय प्रदेश सरकारप्रति नागरिकको वितृष्णा बढ्दै गएको छ’ खरेल भन्छन् , ‘यस अवस्थामा प्रदेश सरकारले सञ्चालन गरेका कार्यक्रमका विषयमा पनि जानकारी दिने गर्छाै ।’ उनले असोज महिनादेखि कार्यक्रम सञ्चालन गर्ने तयारी रहेको जानकारी दिए । कार्यक्रमको प्रभाव दूरदराजसम्म पुगेको, सीमान्तकृत, दलित, आदिवासी जनजाति र अल्पसंख्यक समुदायको समस्यालाई सम्बोधन गर्न सफल भएको, गुनासो आउने दरमा वृद्धि भएकाले थप व्यवस्थित बनाउन लागिएको जनाए ।