खोज

घाेराही, १५ भदौ ।

नेपाल सरकारका पूर्व सञ्चार तथा सूचना प्रविधि मन्त्री एवं नेकपा माओवादी केन्द्रका स्थायी समिति सदस्य रेखा शर्माले बेपत्ता पारिएका व्यक्तिको छानबिन, सत्यनिरुपण तथा मेलमिलाप आयोगसम्बन्धी विधेयक पारित हुनु जनता र देशका लागि सुखद परिणाम रहेकाे बताएकि छन् ।

प्रेस सेन्टर दाङ शाखाले आज घोराहीमा आयोजना गरेको पत्रकार सम्मेलनमा स्थायी कमिटी सदस्य शर्माले लामो समयपछि राजनीतिक दलहरुका बिच भएको सहमतिबाट बिधेयक पास भएसँगै १२ बुँदे सहमतिकाे कार्यभार पूरा हुन लागेको बताइन। पूर्वमन्त्री शर्माले नयाँ सरकारले लामाे समयसम्म समाधान हुन नसकेकाे टिआरसी विधेयक पारित गर्ने काम गरेसँगै संक्रमणकालिन न्यायकाे बाँकी काम टुंगो लाग्ने र देश समृद्धिको अभियानमा अघि बढ्ने विश्वास व्यक्त गरिन ।

प्रतिनिधि सभा सदस्य समेत रहेकी शर्माले आफ्नो पार्टी नेतृत्वको सरकारले सुशासन र समृद्धिका लागि महत्वपूर्ण काम गरेको भन्दै यसलाई जनताले मुल्याङ्कन गरेको बताइन् । देशलाई लोडसेडिङ मुक्त बनाउनेदेखि भ्रष्टाचार, अनियमिताका ठुला फाइल खोलेर सुशासनको नयाँ अभियान सुरु गरेको बताइन । माओवादीले अहिलेसम्म धेरै सम्हालेका उर्जा र सञ्जार मन्त्रालयले अहिले देशलाई परिवर्तनको अनुभूति दिलाइरहेको भन्दै उनले भुटानी शरणार्थी, लालिता निवास, सुन काण्डलगायत अनियमितताका थुप्रै ठुला फाइल खोल्दै दोषीलाई पक्राउ गरेर जनतालाई सुशासनको प्रत्याभुती दिलाउने कामको सुरुवात गरेकाे दावी गरिन ।

यसैगरी नेतृ शर्माले दाङको विकासका लागि घोराही–तुलसीपुर चारलेन सडक, तुलसीपुरमा रहेको एयरपोर्ट विस्तार, अन्तर जिल्ला जोड्ने घोराही–मुर्कुटी–प्युठान सडक, घोराही–होलेरी सडक र राप्ती राजमार्गसँगै राप्ती स्वास्थ्य विज्ञान प्रतिष्ठानमा एमबिबिए कक्षा सञ्चालनका लागि बजेट बिनियोजनसँगै आवश्यक तयारीको काम अघि बढाएको बताइन् । जिल्लाको विकासका लागि महत्वपूर्ण मानिएका यी काम हुन सके भने जिल्लाको विकासले फड्को मार्ने भन्दै उहाँले त्यसका लागि दलहरुका बिचमा एकता आवश्यक रहेको बताइन । जनताबाट निर्वाचित हुँदा आफुले सके जति राम्रो गर्ने प्रतिबद्धता व्यक्त गरेको स्मरण गर्दै मन्त्री शर्माले सरकारमा रहदा वा बाहिर रहदा जिल्लाको विकासका लागि पहल गरिरहने बताइन् ।