खोज

भैरहवा, १४ भदौ ।

उपप्रधान एवं अर्थमन्त्री विष्णु पौडेलले उत्पादन घट्दा राजस्वमा गम्भीर असर परेको बताएका छन्।

आर्थिक वर्ष २०८०÷८१ मा राजस्व असुलीमा कमी र उत्पादनमा आएको ह्रासका कारण ६ प्रतिशतको आर्थिक वृद्धि भएको प्रसंंग निकाल्दै उनले यसलाई क्षतिपूर्ति गर्नका लागि पनि चालु आर्थिक वर्षमा राजस्व लक्ष्यको ३० प्रतिशत वृद्धि गर्नुपर्ने आवश्यकता औंल्याए ।

राष्ट्रिय उद्यमी सम्मेलनको भैरहवामा उदघाटन गर्दै अर्थमन्त्री पौडेलले सरकारले उद्यमीलाई दुःख दिने काम नगर्ने बताए । “उद्यमीलाई दुःख दिएर सरकारले राजस्वको लक्ष्य हासिल गर्न सक्दैन”, उनले भने ।

उत्पादन र उत्पादकत्व वृद्धि र रोजगारी सिर्जना गर्नेतर्फ सरकारले मुख्य ध्यान केन्द्रित गरेको भन्दै अर्थमन्त्री पौडेलले सरकारले ल्याएको स्टार्ट अप कार्यक्रम युवा उद्यमीका लागि महत्वपूर्ण हुने बताए । यद्यपि यो प्रयाप्त नभएकाले आगामी दिनमा अझ बढी ध्यान दिने उनको भनाई छ ।

सरकारले उद्योगीको मनोवल उठाउने र कानुनसम्मत ढंगले उत्पादनमा लागेर निजी क्षेत्रलाई माथि उठाउने काममा जोड दिएको अर्थमन्त्री पौडेलले बताए । उद्यमीहरुले आफूसँग भएको सीमित पुँजीलाई उद्योग स्थापनामा लगानी गर्नुपर्नेमा जोड दिंदै उनले सरकारले औदोगिक क्षेत्र स्थापना गरी जग्गा उपलव्ध गराउने गरी गृहकार्य गरिरहेको बताए ।

राष्टिय उत्पादन र राष्टिय अर्थतन्त्रको सवलीकरणका लागि सरकारले उद्यमीहरुलाई प्रोत्साहनको नीति लिएको र साथमा लिएर अगाडि बढ्न चाहेको पनि अर्थमन्त्री पौडेलले बताए ।

देशभरका १४० उद्यमी सहभागी भएको राष्टिय उद्यमी सम्मेलन शनिबार सकिने छ । राष्टिय युवा उद्यमी मञ्चले देशभरका उद्यमी सहभागी गराएर भैरहवामा उद्यमी लिडरसिप सम्मेलन आयोजना गरेको हो ।