खोज

सुर्खेत, १४ भदौ । पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ले संविधानको व्याख्यात्मक टिप्पणीमा ‘माओवादी जनयुद्ध’ शब्द प्रयोग गरिएको बताएका छन् । पार्टी प्रशिक्षण कार्यक्रममा शुक्रबार सुर्खेत विमानस्थलमा सञ्चारकर्मीहरूसँग कुरा गर्दै उनले विस्तृत शान्ति सम्झौतालाई संविधानकै अंग बनाइएको जनाए । सदन मै हिंसा शब्द प्रयोग गर्नुलाई जायज मान्न नसकिने भन्दै उनले संविधानमा नै जनयुद्ध शब्द प्रयोग भएको उल्लेख गरे ।

भ्रष्टाचारीलाई जोगाउनकै लागि सरकार परिवर्तन भएको भन्दै उनले सो तथ्य पुष्टि हुँदै गएको दाबी गरे । उनले गलत कार्य गर्नेलाई माओवादी केन्द्रले नछोड्ने चेतावनी समेत दिए । ‘गलत गरे छोड्दैनौँ, यो विद्रोहको भाषा होइन’, उनले भने ।

प्रचण्डले नेतृत्व हस्तान्तरण आवश्यक नरहेको समेत उल्लेख गरेका छन् । सरकारबाट बाहिरिएपछि आफू पार्टीलाई मजबुत बनाउन लागिपरेको बताए । ‘म सधैँ नेतृत्वमा बसिरहनु पर्छ भन्ने छैन, प्रचण्ड अध्यक्ष भन्दा माथि भइसक्यो’ उनले भने, ‘एउटा राम्रो टिम बनेपछि म अर्का भूमिकामा जाने सोचिरहेको छु ।’

पार्टी फुटको चर्चा गलत भएको पुष्टि भइसकेको भन्दै प्रचण्डले यो विषय एकथरी मान्छेले गलत प्रचार गर्न नियोजित रूपमा सतहमा ल्याएको बताए । साथै उनले पार्टी भित्र कुनै आन्तरिक विवाद नरहेको जिकिर गरे ।