खोज

बुटवल, १४ भदौ । रुपन्देहीमा सम्पन्न अन्तर विद्यालय फुटसल प्रतियोगिताको उपाधि न्यु होराईजन माबिले चुमेको छ । एभरेष्ट एण्ड अक्सन एजुकेशन एण्ड माईग्रेसन सर्भिसको मुख्य प्रायोजन, राईट पाथको सहप्रयोजनमा आरके तेक्वान्दो एकेडेमीको आयोजना तथा ईभेन्ट ईन बुटवलको संयोजनमा तिलोत्तमा नगरपालिकास्थित मोनालिसा फुटसल एरिनामा शुक्रबार भएको फाईनल खेलमा न्यु होराईजनले अक्सफोर्ड ईगलिस बोर्डिङ स्कुललाई ५—४ गोल अन्तरले पराजित गर्दै उपाधि चुमेको हो ।

उपाधिसंगै न्यु होराईजनले नगद ३० हजार रुपैया, कप, मेडल, प्रमाणपत्र तथा उपविजेता अक्सफोर्डले नगद २० हजार, कप, मेडल, प्रमाणपत्रबाट पुरस्कृत भएको छ । प्रतियोगितामा न्यु होराईजनका हिमाल थापा उत्कृष्ट खेलाडी घोषित भए । अक्सफोर्डका बिवश सुनारी मगर उत्कृष्ट गोलकिपर र अस्मित शर्मा सर्वाधिक गोलकर्ताबाट पुरस्कृत भए ।

एक कार्यक्रमका बिच बुटवल उपमहानगरपालिका वडा नं. ३ का वडाअध्यक्ष बिष्णु ढकाल, आर.के तेक्वान्दो एकेडेमीका अध्यक्ष राजकुमार पाण्डे, ईभेन्ट बुटवलका अध्यक्ष सुसान्त पाण्डेले विजेता, उपविजेता तथा उत्कृष्ट खेलाडीहरुलाई पुरस्कार वितरण गरे ।

खेलाडीहरुलाई प्रोत्साहन हुने गरि विद्यालयस्तरको प्रतियोगिता आयोजना गरेको संयोजक पाण्डेले बताए । प्रतियोगितामा रुपन्देहीका ३० विद्यालयका टिमले प्रतिस्प्रर्धा गरेका थिए ।