खोज

बुटवल (बुटवल टुडे), ।

लायन्स क्लब अफ बुटवल सयपत्रीले बुटवलका कुष्ठरोग प्रभावितलाई दर खुवाएका तीज मनाएका छन । समाजमा सकारात्मक प्रभाव पार्न तीजको अवसर पारेर लायन्सको हंगर रिलिफ अन्तर्गत दर खुवाउने तथा नगद सहयोग कार्यक्रम गरेको हो ।

कार्यक्रममा बोेल्दै संस्थाका अध्यक्ष कमला कुँवरले कुष्ठरोगले मानिसहरूलाई शारीरिक मात्र नभई मानसिक रूपमा पनि प्रभावित पार्ने, यो रोगले पीडितहरूलाई समाजबाट अलग गराउने, जसका कारण उनीहरूमा आत्मविश्वासको कमी हुने र समाजमा आफ्नो स्थान पाउन कठिनाइ महसुस गर्न थाल्ने भएकोले यस्ता व्यक्तिहरूको जीवनमा खुशीका पल ल्याउने प्रयास स्वरूप लायन्स क्लब अफ बुटवल सयपत्रीले यो कार्यक्रमको आयोजना गरेको बताईन ।

उनले, तीज पर्व, जुन नेपाली महिलाहरूका लागि विशेष महत्व राख्छ यो सामाजिक सद्भाव र एकताको प्रतीक पनि भएकोले कुष्ठरोगबाट पीडित व्यक्तिहरूलाई समाजको मुख्यधारमा समावेश गराउने र उनीहरूलाई माया, स्नेह, र सम्मान प्रदान गर्ने महत्वपूर्ण अवसर प्रदान गरेको बताईन ।

लायन्स डिष्ट्रिक गर्भनर पुरुषोत्तमभक्त प्रधानाङ्गले क्लबबाट कुष्ठरोग प्रभावित व्यक्तिहरूलाई मात्र नभई समाजमा समेत एउटा महत्वपूर्ण सन्देश दिएको बताए । ‘हामी सबै एक हौं र समाजको हरेक व्यक्ति सम्मानको हकदार छ ।’ उनले भने । यो अभियानले समाजमा सकारात्मक परिवर्तन ल्याउन र एकता, प्रेम, र सद्भावको भावना फैलाउन मद्दत गरेको उनले औल्याए । बुटवल उपमहानगरपालिका वार्ड नं. २ पाखापनी स्थित रहेको कुष्ठ रोगबाट प्रभावित कल्याण समिति अन्र्तगतका प्रभावित व्यक्तिहरू रहेको आश्रममा सम्पन्न कार्यक्रममा सिनियर डिष्ट्रिक एडभाईजर तथा क्लवका पूर्वाध्यक्ष सविना श्रेष्ठ, रिजन चियर पर्सन विष्णु उपाध्याय, फष्ट भिपि एलि क्षेत्री, कार्यक्रम संयोजक माया खड्का र क्लवका सचिव शान्ति लक्ष्मी अर्यालले बोलेका थिए ।