खोज

बुटवल, ९ भदौ ।

लुम्बिनी फलफुल तरकारी थोक ब्यवसायी संघका पूर्व अध्यक्ष केशव कुँवरले सामाजिक संजालमा लेखेका छन । ‘यहाँका स्थायी जन्मजातका नागरिक ब्यवसायी ब्यापार संघमा छ ? सबै आयातित नै हौ । भाटभटनीले बुटवल लगायत नेपाल भरिका लाखौं ब्यबसायीहरुलाई बिस्थापित गराउँदा अझैसम्म आवाज उठाएको पाइएन । यो लिखित सूचना जारी गर्दा सोच र विचार पुर्याएको देखिएन । लहैलहैमा स्वार्थ अनुसार नजान सुझाव छ । भाटभटेनी पूँजिवादको नमुना हो । एक जनाले लाखौंलाई डुबाउने यस्ता विषयमा छलफल गरौ !’

दोस्रो बुटवल जुत्ता÷चप्पल व्यापार मेला २०८१ को उद्घाटनको तयारीमा आइतबार बिहानै देखि कर्मचारीहरु खटिएका थिए । डेल्टा परिसरमा लगाइएको टेन्टमा विभिन्न आठ कम्पनीका जुत्ता उनीहरु सजाउँदै थिए । बिहान ९ बजेको समयमा एकाएक एक हुल ब्यापारीहरु आएर ब्यानर र गेट तोडफोड गरे । उनीहरुले कर्मचारीलाई हातपात समेत गरेको भिडियोहरु सामाजिक संजालमा आए । आगलागीबाट ठुलो क्षति ब्यहोरेको डेल्टाले दुई महिनापछि फेरि उठ्ने प्रयास गरेको हो । टेन्ट लगाएर जुत्ता मेलामार्फत आफ्ना उपभोक्तालाई सेवा दिने तयारी भैरहँदा यहाँकै केही ब्यापारीहरुबाट नै बिरोध भएको हो ।बिरोधमात्र गरेर मेलास्थलमा आएर कुनै पनि हालतमा मेला लगाउन नदिने उनीहरुबाट धम्की आएको कर्मचारीहरुले बताए ।

मेलाका संयोजक प्रकाश भुसालले स्वदेशी उत्पादनलाई प्रोत्साहन गर्ने उद्देश्यका साथ नेपाली लुगा घरले डेल्टा कम्प्लेक्स परिसरमा जुत्ता मेला गर्न लागेको बताए । ‘हामीले बिदेशी सामान बेच्ने होईन’—उनले प्रष्ट पारे । स्वदेशी उद्योगका जुत्ताहरु बुटवलका उपभोक्तालाई छुटमा दिने गरी मेला लगाउन लागेको उनले दाबी गरे । ‘हामीले वडाबाट समेत स्वीकृति लिएका छौ’—उनले भने ।

यता, रुपन्देही ब्यापार संघले उक्त मेला रोक्नका लागि बुटवल उपमहानगरपालिका वडा नम्बर ८ लाई ध्यानाकर्षण पत्र पठाएको थियो । पत्रमा बुटवल बाहिरका समूहले जुत्ता तथा फेन्सी मेला लगाउन वडाबाट स्वीकृति प्रदान गरिदा यसले बुटवलका ब्यापारीलाई प्रत्यक्ष रुपमा असर पर्ने हुँदा बन्द गर्नुपर्ने भनिएको छ ।

मेला स्थलमा तोडफोडको विषयमा संघका अध्यक्ष दिपक अधिकारीले भने आफूलाई कुनै जानकारी नभएको दाबी गरेका छन् । यद्यपि उक्त मेलाबाट स्थानीय व्यवसायी मर्कामा पर्ने भएकाले संघले मेला रोक्न ध्यानाकर्षण गराएको उनले उल्लेख गरे ।

रुपन्देहीका प्रमुख जिल्ला अधिकारी गणेश अर्यालले विश्वव्यापीकरणको दुनियाँमा हरेक नागरिकले जुनसुकै ठाउँमा गएर व्यापार व्यवसाय गर्न पाउने बताए । यद्यपि यो स्थानीय पालिकाको सरोकारको विषय भएकाले आफूले यसमा केही गर्न नसक्ने उनले उल्लेख गरे ।