खोज

दाङ, ७ भदौ ।

सधै कक्षाकोठामा देखिने विद्यार्थी शुक्रबार विद्यालय परिसरमा छरिएर बसेका देखिन्थे । झट्ट हेर्दा के भएछ आज विद्यार्थी किन समूहमा बसेका छन् भन्ने जो कसैलाई पनि लाग्न सक्छ । तर विद्यार्थीहरु सबैका हातमा सालको पात र सिन्का समातेर दुना टपरी बनाउने सीप सिक्न ब्यस्त देखिन्छन् ।

घोराही उपमहानगरपालिका –६ मा रहेको श्री माध्यमिक विद्यालय जजरागाउँमा शुक्रबारका दिन (बुक फ्री) ब्यावहारिक शिक्षा सिकाइएको छ । सोही अन्तर्गत सालको पातबाट दुना टपरी बनाउने सीप सिकाइएको हो । किताबको ज्ञानले मात्रै जीवन चलाउन अप्ठ्यारो हुने भएकाले विद्यार्थीहरुलाई विद्यालयबाटै व्यावहारिक ज्ञान सिकाउन सुरु गरेको विद्यालयका प्रधानाध्यापक तिलप्रसाद घर्तीले बताए ।

कक्षा १ देखि १२ कक्षा सम्म पढाई हुने सो विद्यालयमा ५ सय ५० जना विद्यार्थी अध्यनरत छन् । ब्यावहारिक सीप अन्तर्गत शुक्रबार भएको कार्यक्रममा कक्षा ५ देखि १२ कक्षा सम्मका विद्यार्थीलाई सिकाइएको उनले बताए । पात र सिन्काको व्यवस्थापन विद्यालयले गरेको हो । विद्यार्थीहरु ब्यावहारिक ज्ञान लिन पाउँदा धेरै खुशी भएको उनले बताए ।

सोही विद्यालयमा कक्षा १० मा अध्यनरत सर्मिला ओलीले दुना टपरी गाँस्न सिकेकोमा खुशी लागेको बताइन् । “घरमा तैले जान्दैनस् नगर भनी आमाले दिनुहुँदैन थियो तर गरेपछि जानिदो रैछ । पढाईलाई प्राथमिकता दिंदा अन्य काम गर्न भ्याइदैनथ्यो । राम्रो बनाउन नजाने पनि काम चलाउ बनाएको छु”–आफुले बनाएको दुना देखाउँदै उनले खुशी व्यक्त गरिन् । घर भित्रको काम छोरी मान्छेले मात्रै गर्नुपर्छ भन्ने मान्यता भए पनि विद्यालयमा छात्र छात्रा दुबैले मिलेर सिक्न पाउँदा काममा विभेद नहुने उनले बताइन् । सोही विद्यालयमा कक्षा ९ मा अध्ययनरत छात्र विशाल भण्डारीले दुना टपरी गाँस्ने काम केटी मान्छेको भन्ने लाग्ने गरेकोमा विद्यालयमा सिक्ने अबसर पाएपछि काममा विभेद नहुने बताए । “मैले सिन्का समाउन पनि जानेको थिएन । आज आफैले दुना खुटेर देखाए खुशी लागेको छ । दैनिक जीवनमा काम लाग्ने सीप सिक्न पाउँदा खुशी लाग्यो, कामको विभेद गर्नुहुदैन भन्ने पनि प्रष्ट भएको छ”–उनले भने ।

प्रत्येक हप्ताको शुक्रबार विद्यालयमा व्यावहारिक सीप सिकाउने गरेको विद्यालयका शिक्षक रिमा गौतम बताउँछिन् । कहिले बत्ती कात्ने, कहिले दुनाटपरी बनाउने, चित्रकला प्रतियोगिता, कहिले खानेकुरा पकाउने जस्ता जीवन उपयोगी सीप सिकाउने गरेको उनले बताइन् । किताबी ज्ञानले मात्रै नहुने भएकाले व्यावहारिक ज्ञान सिकाउने गरेको उनले बताइन् ।